Josué 6 - Sharanahua: Diospan Tsain

Israelifoan Jericó anoafo cuyoshquiai cuscan

¹ Ascan pushu rasi Jericó anoafo Israelifoqui fasi musucani. Aton pushu rasi cunu cuyacoin tarati huayacuna. Nan cunu ahuun shoi caincaiti fupocoinnifo. Ascanocai tsoa iquiyamacai tsoaricai Jericó murannoashu chifi caintirofo inima.

² Ascano Ifo Diosin Josué yoini isca huaquin, —Un yonoa cuscan Jericó anoafocai miqui fotirofoma. Aton niaifo non aton ranushumuafo uhuunshon min ato cuyoshquin.

³ Min yora ranushumuafo futan osha mucu fustiti non mucu foshca fusti nan shafatifi Jericó tarati huaquin fusti huacahuun.

⁴ Focashon nan siete nocofunufo matohuunoa Ifo Diosi cufinmisifo yoihuu chashoan masho manuti nan tsomafo rucu foaifoanno acachori nan cashon Diospan tsain amuran nanua futsafoan fotirofo. Ascano ato cachori ranushumuafo fononfo. Ascano nan septimo dia shafa ato yoihuun aton yorafo futan Jericó siete tarati huayacucatan ato manutifo chaan chaan anifo.

⁵ Ascano ahuun unutaqui aton manutifo fasi chai manuaifoanno nantifi yorafo oi ashcafinin cunatiroforan ishon. Nannori ato yoihuun. Ascan man manutifo fasi achacoin manuaino nantifi yorafo oi ashcafinin cunaino nan cunu Jericó tarati huaafo pacuriscashquin. Ascano min yorafo nantifi Jericó muran cayacafi iquishcaniran, —ishon nocon Ifo Diosin Josué yoini.

⁶ Nan nicatan Josué ahuun yorafo ichanan huani nocon Ifo Diosin yonoa cuscan ato tapimani isca huaquin, —Nan casho muran Diospan tsain nanua iyainifoancahuun. Mato rucu nan siete nocofunufo nocohuunshon nocon Ifo Diosi cufinmisifo manuti tsomashu fotiroforan, —ishon Josué ato yoini.

⁷ Ascashon Josué nantifi Israelifo yoini isca huaquin, —Natian non fononfocahuun. Jericó tarati huayacufoancahuun. Nocofunufo ashifoya rucu caino acachori nan casho nocon Ifo Diosin tsain Israelifo yoiyoni cuscan a muran futsafoan iyacashon fotiroforan, —ishon Josué ato yoini.

⁸ Josué ato yoia cuscan nicacatan nan siete nocofunufo Israelifohuunshon nocon Ifo Diosi cufinmisifoan manuti tsomashu rucu fonifo aton manutifo manufoi fonifo. Futsafoan nan casho amuran Diospan tsain Israelifo yoiyoni cuscan a muran foaino acachori fonifo.

⁹ Ascano nan ranushumuafo ashi tsomafo taui rucu fonifo. Ascano acachori nocofunufo Israelifohuunoa nocon Ifo Dios cufimisifo fonifo aton manutifo tsomashu. Acachoriri futsafoan nan casho a muran nocon Ifo Diosin tsain nanua iyashon fonifo. Ascano acachori ranushumuafo ashi tsomashuri fonifo. Nantishotapiquin nan manutifo tsomashon manunifo fasi achacoin.

¹⁰ Ascano Josué ato yoini isca huaquin, —Non Jericó tarati huaitian puusiyamacahuun. Ahuashta yoiyamacahuun. Un chipo mato yoiaitian man oi ashcafinin cunatiroran, —ishon ato yoini

Israelifoan Jericó anoafo cuyoni

¹¹ Ascan Josué ato yonoa cuscan nan casho Ifo Diospan tsain amuran iyashon focaquin Jericó tarati huaquin fusti huatan afanan Israelifo aton pushu rasi ano nasonifo nanno oshanifo.

¹² Ascan iyoconaino Josué moitan funinacahuani. Nantianri nocofunufoan nan Israelifohuunshon nocon Ifo Diosi cufinmisifoan nan casho nocon Ifo Diosin tsain amuran nanua iyainifoantan fonifo.

¹³ Nan siete nocofunufo Israelifohuunshon nocon Ifo Diosi cufimisifo aton manuti tsomashu manuyanan fonifo. Ranushumuafo aton ashiya rucu foaifono. Acachori manumisifo fonifo. Nan casho nocon Ifo Diosin tsain amuran nanua acachoriri Israeli ranushumuafo aton ashiya foyacunifo. Jericó taratihuayacunaifono nantishotapiquin manutifo manuacunifo.

¹⁴ Ascano iyoconaino afanan pushu rasi Jericó tarati huayacuquin fusti huanifo. Ascatan Israelifo afanan aton pushu rasi nan icafoanno nasonifo. Osha mucu fustiti non mucu foshca fusti nansca huanifo.

¹⁵ Nan septimo día iyoconaino funinifoancatan nan amisifo cuscan afanan nansca huanifo. Tarati huayacuquin fusti huatamarocon Jericó siete tarati huayacuquin huanifo.

¹⁶ Ahuun unutaqui nan nocofunufo Israelifohuunshon nocon Ifo Diosi cufinmisifoan aton manutifo manuaino Josué nantifi Israel futsafo yoini isca huaquin, —Natian nocon Ifoan nan pushu rasi Jericó noco inain. Ascacun oi ashcafinin cunacahuun.

¹⁷ Non nantifi Jericó murannoafo cuyonon. Nocon Ifo Diosin noco yonoa cuscacai non ahuara a murannoa fitiroma. Nocon yora rafutan Jericó muran noco oinshonaino nan ainfo furoma Rahab ato numa ahuun caifofoan ato achinonfoma. Ascacun Rahab ahuun yorafoya a fu ahuun pushu muran icafocai non rutuima.

¹⁸ Ascafia nannoa ahuara futsafo nantifi cuyoi futsushquin. Ascacun ahuara fiiyamacahuun matona inon. Tsoan nansca huaifin arifi naiquin. Norifi ahuunoashu nantifi Israelifo non omitsiscatiro.

¹⁹ Ahuarafo cuno osho facafacaitsa mucufain orofo mucufain cuno ahuun anu bronce mucufain cuno futsafo ahuun anu hierro mucushon machicahuun nocon Ifo Diosinna inon, —ishon Josué ato yoini.

²⁰ Ascan nan manutifo manuaino nantifi Israelifo oi ashcafinin cunanifo. Oi ashcafinin cunaifoanno Jericó ahuun cunu cuyacoin nantifi pacui paoinqui futsunifo. Ascano nantifi Israelifo pushu rasi muran iquinifo nan murannoafo ato rutunifo.

²¹ Israelifoan nantifi Jericó murannoafo rutuquin cuyocoinnifo. Ascan nan tushuafori ato rutunifo. Nocofunufo non ainfofo non facufo non anifofo non moifo non chashoanfo non burrofori nantifi rutuqui futsanifo.

²² Ascatan nan nocofunu Jericó oinqui tauhuaiyonifo rafu Josué ato yoini isca huaquin, —Man nan ainfo furoma yoiyoni cuscan ahuun pushu muran iquicahuun. Nan non ahuun yorafoya chifi cainmacahuun, —ishon Josué ato yoini.

²³ Nan Josué yoia cuscan nan nocofunu rafu Rahab pushu muran iquini. Nan non ahuun apa non ahua non ahuun ochifo non ahuun ushtofo nan ahuun yorafoya ato chifi cainmani. Israelifo icafoanno pasoato ato nichinifo.

²⁴ Ascano nan pushu rasi Jericó yafi nan murannoafo nantifi coi futsuni. Ascafia nan cuno oshopa facafacaitsafo non orofo non ahuara cuno ahuun anu bronce non cuno hierrofo nantifi ichahuashon machinifo. Nocon Ifo Diosin pushu muran huanifo nanfohuunoa chipo ahuara huashcaquin.

²⁵ Nan ainfo furoma Rahab Israeli nocofunu rafu ahuun mai Jericó oinfoafoanno ato onuni tsoa ato rutunonma. Nanscacuricai Josué nan non ahuun yorafoya non ahuun ahuarafo ahuusca huanima Israelifo fu inonfo. Nantianri ato fu inifo.

²⁶ Ascatan nan Jericó mai cuyonitian Josué ato yoini isca huaquin, —Nan ratoran nocofunun afanan Jericó ano pushu rasi huapaiyaiton nocon Ifo Diosin nan onaintimapainon naanon. Nan afanan futsan nuno Jericó mai ano pushu rasi huapaiquin pushu quishi nichiaitian ahuun facu iyoa naashquin. Nan ahuun cunu caincaiti huaitian ahuun facu chipocu naashquinran, —ishon Josué yoini.

²⁷ Ascano nocon Ifo Diosin Josué fu rafumisi cuscan. Nantifi maifotishon Josuéhuunoa nicamisifo nan nocofunu shararan huanifo.