Josué 2 - Sharanahua: Diospan Tsain

Josué nocofunu rafu nichini ahuu cuscaramainquin na mai Jericó ano tapishcaquin

¹ Ascano Josué Israelifo Sitim mai ano nocofunu rafu nichini. Ato yoini isca huaquin, —Unu Jordán ocuma futsa pocufaintacahuun ahuu cuscaramain nan maiquin oinsharatacahuun noco tapimashcaquin. Man Israelifoquin tsoashta tapimayamacahuun. Nan pushu rasi Jericó anoafo oinsharacoincahuun, —ishon Josué ato yononi. Nicacatan nan rafu Sitim anoashu focani Jericó ano noconifo. Nanno ainfo furoma ahuun anu Rahab ahuun pushu muran oshanifo.

² Nan nocoaifoan futsan ato oinni. Ointan Jericó niaifoqui chanini. Yoiquin isca huani, —Mun oian Israeli nocofunu rafu na yamu nuno oa noco mai oin fuafo aton caifofo nocohuunoa tapimashcaquin fuaforan, —ishon niaifo yoini.

³ Yoiaiton nicatan niaifoan Rahab icano nocofunu nichini Rahab yoiquin isca huanon, —Nan nocofunu rafu min pushu muran iquia. Nan rafutan noco fuparapai fuafo. Nocon mai oin fuafo aton yorafo nocohuunoa tapimashquin noco rutunonfo nocon mai fiishcaquin. Ascacun nan nocofunu rafu chifi caimahuun, —ishon yoini.

⁴ Niaifoan nannori yoifiacai Rahab nan Israeli nocofunu rafu onuni. Ascashon cumaquin isca huani, —Icon nan nocofunu rafu uhuun pushu muran iquifiafo. Ascafia uncain tapiama raquiashumain fuafoquin.

⁵ Ascano nan fari iquiaitian nan pushu rasi ahuun cunu caincaiti fupoaitian uhuun pushu murannoashu foafo. Raniashu foafomainquin uncai tapiama. Ato mufainrisca huatacahuun man atoqui nocoriscatiromainquin, —ishon Rahab ato yoini.

⁶ Nannori ato fomantan ahuun pushu fomancaya ato onuni. Ihui fichifo shinainfo ananmanri ato onuni.

⁷ Nan nocofunu ranan niaifoan ato nichiaino Rahab pushu anoashu ichonifo unu Jordán noamashta ano nan Israeli nocofunu rafuqui nocoriscapai. Focatan pushu rasi ahuun cunu caincaiti fuponifo.

⁸ Ascano nan Israeli nocofunu rafu oshataifoma Rahab pushu fomancaya cani ato fu tsainquicai.

⁹ Ascashon ato yoini isca huaquin, —Mun tapia maton Ifo Diosin nocon mai min caifo inain. Uhuun caifo min caifoqui ratucoian. Nantifi uhuun mai anoafo fasi matoqui musucani.

¹⁰ Man non nica man Egipcio mai ariashu fuaitian ununhuan ahuun anu oshin man pocuataima maton Ifo Diosin unu pashcanan huashon mai mutomatanaino man ununhuan pocusharafainni. Amorreofoan niaifo rafu Sehón yafi Og unu Jordán fari oaiquiri icafo man rutuni cuscan man non nicamisi. Aton yorafoya man ato rutuquin cuyoni.

¹¹ Ascano nan nicain non fasi ratui taritarica. Nan nicatacai tsoa matoqui nocopaiyama maton caifofo rutushcaquin. Mun tapia maton Ifo Diosicai tsoan finontiroma. Nantifi nai murannoa iquifain mai anoafori iquina.

^12-13 Ascan maton Ifo Diosin ahuun anuhuunshon ua yoicahuun un mato shara hua cuscan marifi man ua shara huanon. Ua non uhuun yorafori man afanan nuno Jericó ano nocoaitian noco shara huashcaquin. ¿Man ua ahuara ismatiromun man uhuun caifo cuyoaitian ua non uhuun upa non uhuun uhua non uhuun ochifo non uhuun ushtofo non uhuun chipifo non uhuun chicofo non aton yorafori shara huaquin man noco rutunonma? ¿Man ua ahua ismatiromun man ua non uhuun yorafo nocon caifo man cuyoaitian un mia icoinra huanon man noco rutunonma? —ishon Rahab ato yoini.

¹⁴ Ascaiton cumanifo isca huaquin, —Non nuno anocai min caifo min ato tapimayamaino noco rutucuanafo. Nanscarifiaquin norifi mia non min yorafoya non mato numashquin man nanonma. Nocon Ifo Diosin maton mai noco inaintian non mia yoia cuscan non mato numashquin man nanonma, —ishon yoinifo.

¹⁵ Nannori yoiaifoan nicatan Rahab ato numani. Rahab ahuun pushu nan Jericó pushu rasi aton cunu cuyacoin ano potasinan ini. Ahuun pushu fomancaya ahuun cunu tsucashon nan nocofunu rafu cuyacushon rusfipan ato fotomani.

¹⁶ Ascashon ato yoini isca huaquin, —Machifo ano ichoriscatacahuun. Nanno osha rafu non fusti onucahuun. Ascano nan yorafoan mato funaifo pushu rasi nasoaitian man fosharatiro, —ishon Rahab ato yoini.

^17-18 Ascaiton cumaquin isca huanifo, —Min noco yoia cuscan non mia yoiyoni. Ascafia nocon caifo mato mai ano nocoaitian min cunu shoi anoshon min noco fotomana ano min rusfi oshin nannoshon min noco ismayamaiton non mia yoia cuscacai non huatiroma. Nocon caifoancai tapitiroma min icano mia non min yorafo numashcaquin. Nantianri nantifi min yorafo upa non uhua non min ochifo non ushtofo non nantifi min yorafo min pushu muran iquitirofo naashcaquima. Man ascayamacai nocohuun nuama uhuun caifoan mato rutushquicani.

¹⁹ Min yorafo yoihuun non matoqui nocoaitian min pushu murannoashu chifi cainyamacahuun. Nan yora chifi caianfin naashquiquin nocohuucai nuama. Atohuun nuushquin nan naifo cuscan. Ascano min yorafo mi fu pushu muran icafo nocon caifoan ato ahuuscara huano nocohuun nuutiro.

²⁰ Ascafia non nuno min pushu muran iquia min caifo min ato tapimacun noco rutuafo non mia yoia cuscan non atiroma. Min asca huaiton noncai mato numaimaran, —ishon nan Israeli nocofunu rafutan Rahab yoinifo.

²¹ —Man ua yoia cuscan un nannorisi shinain. Uncai uhuun caifofo yoishquima. Natian fosharatacahuun, —ishon Rahab ato yoini. Foafono Rahab ahuun cunu shoi fomancaya ano rusfi oshin nushani.

²² Ascano nan Israeli rafu machifo ano osha rafu non fusti onunifo. Nan Jericó anoa nocofunufoan ato funafoanfafainni. Fai cusumunri ato funafiaquicai ato fuchinifoma. Ascatan nan icafoanno nasonifo.

²³ Ascatan nan Israeli rafu machifo tunanmanri focaquin unu pocufainni fonifo. Ahuun caifofo icafoanno nococatan Josué pushu ano noconifo nantifi nan finoanfo cuscan atoqui chaninifo.

²⁴ Yoiquin isca huanifo, —Nan yora Jericó anoafo nocoqui fasi ratucoianfo. Ascan nocon Ifo Diosin nantifi nan mai noco inanshquin nocona inon, —ishon nan rafutan aton caifo yoinifo.