Génesis 8 - Sharanahua: Diospan Tsain

Faitahuan nashacoinni cuscan

¹ Ascano Noé yafi nantifi yoinafo a fu ahuun shashohuan muran icafo Diosin atohuunoa shinanni. Ascashon Diosin unu fumancayan fuu fumani. Nan fuuhuanun unu nasha huaquin tau huani.

² Nantiancai unu afanan yosinima. Afananricai mai murannoashu unu chinonima. Nai murannoashuri oi funima.

³ Ascaino ciento cincuenta osha finontan funainquimashta unu nashapacuni.

⁴ Ascashu nan shashohuan machi ahuun anu Ararat ano racani.

⁵ Ascaino afi unu nashari ani mucu rafuti oshu nashapacui tauni. Nashapacuaino Noé yafi a fu shashohuan muran iquiafoan machi cuyacoinfo cain taui futsuaiton oinnifo.

⁶ Ascano chipo cuarenta osha finontan Noé shashohuanun ahuu shoi fupoti anoshon fupuni.

⁷ Ascashon Noé shoi anoshon oca nichini. Oca nichiano ocuma rafu noyacahuacacaini mai funai.

⁸ Ascatan Noé ruhuinri nichini man mai mutoamainquin tapipaiquin.

⁹ Ascafia ruhuin mai fuchiyamacai afanan shashohuan muran nasoni raqui tsaotiroma oin. Ascaiton Noé shashohuan shoi ano ahuun poyan caimashoano ruhuin aqui tsaotoshini.

¹⁰ Asca huashon Noé siete oshatan afanan manani. Ascashon afanan ruhuin nichini.

¹¹ Man fari caino ruhui afanan aqui nasoni. Nasoquin nii puishta shuoshtamushon funi. Ascaiton oinquin Noé tapini man mai mutohuai.

¹² Ascashon afanan siete osha finontan ruhuin nichini. Nichianocai ruhuin afanan aqui nasonima.

¹³ Asca Noé seiscientos uno fari aqui caano man mai mutocoian ini. Ascano shashohuan ahuun fupoti fupushon man mai mutoa oinni.

¹⁴ Ascashu oshu rafu yafi veintisiete oshatan mai mutocoinni.

¹⁵ Nantia Diosin Noé yoini isca huaquin,

¹⁶ —Natia shashohuan murannoashu min ahuin non min facufo yafi aton ahuinfofori caincahuun.

¹⁷ Nan mi fu shashohuan muran iquimisifo yoinafo yafi puiyafo nichifain inafori nichifain nan mai ano sharafori nichifain nantifi ato cainmahuun mai anoshon aton facu ichapa caihuanonfo, —ishon Diosin yoini.

¹⁸ Ascano Noé yafi ahuin non ahuun facufo non ahuun fafahuafo shashohuan murannoashu cainifo.

¹⁹ Nanscarifiai nantifi amuran iquimisifo nan inafo non yoinafo non mai ano sharafo non puiyafori. Nantifi shashohuan murannoashu cainifo.

²⁰ Ascano shashohuan murannoashu cainta Noé toquirifo putsainiqui acamaquishon ina rututi huani Diosi inanshquin. Diosin ato numa cuscan ismashquin. Aqui fasi unimacoinquin Noé nansca huani. Yoinafo yafi nan inafo non puiyafori nan piatio cuscan futsa futsatapafo fusti rasi rutuni toquirifo putsamuinia camaquishon coanifo Diosi ismashquin.

²¹ Ascano Diosin ahuun nohuu shutuni fasi sharayacoincun. Ascashu Noéqui fasi Diosin unimacoinni. Ascacun Diosin yoiyoni, —Uncai afanan yorafohuunshon mai chacanahuapanacama. Nan facuaitian yorafoti chacasi shinanmisifiacucai uncai afanan nantifi yora yafi yoinafo cuyoima un na rama aca cuscan.

²² Nan mai cuyoataima icai cuscan fana ushufo yafi nan yonofo chituaifotian shana yafi matsicoin inonpacoin. Ascano nan oipacutian yafi faritian shafan yafi yamuri iishquiran, —ishon Diosin ato yoini.