Génesis 7 - Sharanahua: Diospan Tsain

Faitahuani cuscan

¹ Ascashon nocon Ifo Diosin Noé yoiqui isca huani, —Tsoa futsacai niyoashu mia cuscara icafoma. Ascatamarocon nantifiton ua nicacasmacoinmisifo. Ascashon mun mia oian mirus fusti nan un yonoa cuscacoin min huamisi. Ascacun natian min non min ahuin non min facufo non fafahuafori min shashohuan muran ato iquimahuu.

² Nantifi yoina non inahuafo man pitiro cuscan yafi ua man inantiro cuscari siete ahuin non funufori shashohuan muran iquimahuu. Asca nan yoinafo yafi inafo non pitiroma cuscarafofin ua man inantiroma nanfo ahuin fusti yafi funu fustiri iquimahuu.

³ Ascashon nanscarifi huaquin puiya futsa futsatapafo siete ahuinfo non siete funufori iquimahuu. Asca huashon faitahua nashaitian afanan yoinafo yafi inafo non puiyafori ichapa caishcani.

⁴ Unfin siete osha finontan un oihuanrasi fumai. Cuarenta osha oinhuan rasi fuicai funa nusuima. Ascano nan un oni hua cuscan nantifi un namaqui cuyoiran, —ishon Diosin Noé yoini.

⁵ Ascashon Diosin yonoa cuscacoin Noé nantifi huani.

⁶ Diosin oi fumaquin tau huaitian Noé seiscientos faria ini.

⁷ Ascashu Noé non ahuin non furu rafu non fusti ahuinfori shashohuan muran iquinifo asashcaquima.

^8-9 Nantiari ato fu iquinifo yoina futsa futsatapafo nan pitirofo yafi non pitiroma cuscarafori iquinifo. Ascan nan puiyafo yafi maiqui sharaifori nantifi nanscarafo rafurasi funu yafi ahuinfo Noé fu iquinifo. Diosin Noé yonoa cuscacoin anifo.

¹⁰ Siete osha finontan oihuanrasi fui tauni nan maitio.

¹¹ Ascan Noé seis cientos fariya oshu rafu non diecisiete osha anaitiashu ahuun shashohuan muran iquini. Nan shafatari nai murannoashu oihuanrasi funi. Mai murannoashuri unu ichaparasi chinohuinifani

¹² Ascashu cuarenta oshatan oihuanrasi fuicai. Nusunima.

¹³ Nan shafatari Noé ahuun facu Sem non Cam non Jafet non ahuun fafahuafo non ahuun ahuinri shashohuan muran iquinifo.

¹⁴ Nan yoina futsa futsatapafo yafi ina futsa futsatapafo non nantifi mai ano sharaifori yafi puiya futsa futsatapafori ato fu iquinifo.

¹⁵ Nanfo nantifi rafurasi Noéqui fuaifoan shashohuan muran ato iquimapacuni.

¹⁶ Diosin Noé yonoa cuscacoin funu yafi ahuinfo nantifi futsa cuscarafo shashohuan muran iquinifo. Ascano nocon Ifo Diosin shashohuanun caicainti Noé fuposhoni.

¹⁷ Ascano cuarenta oshatan fasi oihuanrasi fuaino faitahuan fasi yosiriani. Ascaino shashohuan mai anoashu fasi cuya nononi.

¹⁸ Ascano unu faitahuan afi yosiriaino shashohuanri nonoinani.

¹⁹ Fasi yosiriaquin machi cuya fuponi. Nan machifi nantifi machi futsafo finoncoian iniquin. Rato machicai na mai ano atioma cuyacoin.

²⁰ Nan machi cuyacoin maitio finoan nanrifi unu faitahuanun siete metro finoinnifoan yosini.

²¹ Ascano nantifi yorafoti mai anoafo asain futsunifo. Nanscarifi puiyafo asaino inafo asaino yoinafori asaino mai ano sharaifori nantifi asanifo.

²² Ascashu nan mai ano niafo shacaitirofo nantifi asain cuyonifo.

²³ Ascafiaino Noé yafi a fu shashohuan muran iquiafo fusticai tsoa nanima. Futsafo asain cuyonifo. Nantifi yorafo non inafo non puiyafo non mai ano sharaifori nantifi nai cuyonifo.

²⁴ Ascano nan maitio faitahuan ciento cincuenta oshatan funacai nashanima.