Génesis 48 - Sharanahua: Diospan Tsain

Jacob ahuun shota rafu Efraín yafi Manasés Dioshuunshon atohuunoa tsain shara yoini

¹ Ascan shafa ranan finoanno futsan José tapimani isca huaquin, —Min upa isininqui, —ishon yoini. Ascano apa oincaquin ahuun facu rafu Efraín yafi Manasés iyoni.

² Nan José ahuun facu rafu nocoa nicain anifoshta racatsifiashu tsaoinacahuani.

³ Ascashon Jacob furun José yoini, —Diosin nan ahuamamishti huamisiton pushu rasi ahuun anu Luz Canaán anoshon ua shara huani.

⁴ Ua tsain shara yoiquin isca huani, “Ua nicahuun. Un mia facu ichapa inain. Min funafo ichaparasi mani futsafo muran ishcani. Min funafo un ato na mai inain nanno ipanonforan,” ishon ua Diosin yoini.

⁵ Un nuno Egipto mai ano miqui nocoataima min facu rafu cainnifo. Nan rafufin uhuun facu cuscaraquin. Uhuun facu Rubén non Simeón nan rafuri ato cuscaran uhuun facu rafu cuscarari.

⁶ Nan rafu uhuunacoin cuscaran. Nan chipo cainshquiaifin mina itiroquin. Chipo nocon funafoan mai fiaifono pashcananshcani. Ascashon nan facu rafu aton funafoan nan mai atonari iishquin.

⁷ Un Padán-aram anoashu nasoaitian min uhua Raquel man nani. Nan Padán-aram Canaán muran. Non na mai Efrata nocoti chaima non min uhua fai cusumunri mai huani. Nantian nan Efrata anu futsa fiananan huani Belénran huani, —ishon Jacob yoini.

⁸ Ascano José facu rafu Jacob fuchishon yocani, —¿Na facu rafumun tsoanaquin? —ishon apa yocaiton.

⁹ José cumani, —Upashtan. Na rafu uhuun facu. Diosin nuno Egipcio mai anoshon ua inan, —huaiton. —Nan facu rafu uqui chaimashta ihuuhuun Dioshuunshon atohuunoa un tsain shara yoinon, —ishon yoini.

¹⁰ Jacob ahuun anu futsa Israel anifoshta. Afanan oin sharatiroma. Fusho cuscara ini. Ascashon José ahuun facu rafu apaqui iyoni. Ascatan ato icoacufoantan ato tamoqui tsoani.

¹¹ —Un shinanpaoni un afanan mia oinnacama shafai. Ascafia mun miqui nocoa. Miqui fustima Diosin yonoa min facu rafuya un matoqui nocoaran, —ishon Jacob yoini.

¹² Ascatan José apaqui ratoconun ahuun facu rafu shucafurani. Ahuun facu rafu shucafuratan apa tsaoa naman José fuopacucahuani. Fuopacui ahuun fumanan tapaqui noconi.

¹³ Ascano funitan José ahuun facu rafutan ocu rafusho mutsofainifo. Efraín ahuun mumihuurishon mutsoaino Manasés ahuun mushquiorishon mutsoni. Nanscaino Efraín ahuun shota Israel ahuun mushquiori niaino Manasés ahuun mumihuuri nia ini.

¹⁴ Israel ahuun poyan rafu coyan iquinan huashon ahuun shota rafu ato manmanni. Ahuun mucu mumihuurishon ahuun shota chipocun Efraín manmanni. Ahuun mucu mushquiorishon ahuun shota iyoa Manasés manmanni.

¹⁵ Ato asca huatan Israel ahuun facu José Dioshuunshon yoi sharani isca huaquin, —Uhuun shota Abraham yafi uhuun upa Isaac Diosi nicacoinpaoni. Nan Diosiri ua cushumisi nantishon tapiquin natianri.

¹⁶ Ahuun oinmati a fu nai muran icaya ua nichini un ahuara chaca finononma. Nan furonanfacu rafu Diosicoinin shara huapacunaca. Nan rafu isharapainon uhuun anu non uhuun shota Abraham anu non uhuun upa Isaac anuhuunoari futsafoan yoisharanonfo. Aton funafo ichaparasi inonforan, —ishon Jacob yoini.

¹⁷ Ascaiton José oinni apa ahuun mucu mumiorishon ahuun facu chipocu mapoqui manmanni. Ascafia ascaracai José fuchipainima. Ascatan José apan mucu mumiori fiacufoantan ahuun facu iyoaton Manasés mapoqui huapaifiaquicai apan anima.

¹⁸ —Ma, upan. Aacai iyoama. Uhuun facu iyoa min mucu mumiori ahuun mapoqui manmanhuun, —huaiton.

¹⁹ Ascafiaitocai apan apainima. Yoiquin isca huani, —Uhuun facushta, mun tapia min facu iyoa arifi ahuun funafo fasi ichapa iishquin. Ascafia ahuun ushton iyoa finonshquin. Chipocuton ahuun funafo mani futsafo ichapa iishquiran, —ishon Jacob yoini.

²⁰ Nan shafatari Israel Dioshuunshon ato yoisharani isca huaquin, —Israelifoan maton anuhuunshon futsafo yoisharashcani. Isca huaquin yoishcani, “Diosin mato Efraín yafi Manasés cuscaran shara mato imapainon,” ishon yoishcaniran, —ishon Israel yoini. Ascatan Israel Efraín ahuun ochi finonmana.

²¹ Ascashon Israel ahuun facu José yoini isca huaquin, —Upa, ua nicahuun. Mun samamashta nai. Ascafia Diosin mi fu ipanaca. Mia non min funafori min shunifo ipaoni ano mato iyoshquin.

²² Unfin mia inanquin ochifo non ushto finonmafain. Un mia mai Siquem inain. Un na mai anoshon Amorreofo un ato potaniran, —ishon Jacob yoini.