Génesis 39 - Sharanahua: Diospan Tsain

José yafi Potifar ahuin ini cuscan

¹ Afanan non Joséhuunoa yoinon. José Ismaelitafoan Egipto ari iyoafono Egipcio ahuun anu Potifar fini ahuun oinmati inon. Ismaelitafo ato fianni. Potifar ahuun ranushumuafo nan niaifo Faraón cushua ini.

² Nocon Ifo Diosin ahuun Yoshin Shara José fu rafuni. Ascano José nan Egipcio Potifar yonomasharani. Ascashon ahuun pushu muranri imani.

³ Nocon Ifo Diosin José fu rafucun Potifar oinni. Ascaiton José acai cuscan oian nantifi sharacoin ini.

⁴ Ascacun fasi aqui unimacoinni. Nanscaiton niaifo huani. Nanton Potifar ahuun pushu anoa ahuun ahuarafo yonoa ini.

⁵ Potifar José niaifo huatian nocon Ifo Diosin Potifar ahuun pushu ano shara huani. Ahuun pushu muran yafi ahuun mauri nanfoya Joséhuunshon nantifi shara huani.

⁶ Ascashon Potifar José yoini, —Nantifi uhuunafo cushusharahuu. Uhuun oinmati futsafoan min aton niaiforan, —ishon yoini. Potifarcai ahua shinannima nantifimain José cushushocun. Ahuun pushu anoshon pii fustini. José pushcohuai mutsisipa fuso sharayacoin ini.

⁷ Nantian Potifar ahuinin oinni José pushco mutsispa fuso sharayacun. Ascacun Potifar ahuinin José cunani, —U fu iquiyohuu, —ishon.

⁸ Josécai a fu ipainima. Cumaquin isca huani, —Ua nicahuun. Nantifi ahuunafo min funun ua cushumani. Un nuno nantifi cushu anocai nanton ahua shinanma.

⁹ Na mato pushu anocai ua tsoan finoanma. Ufin nantifi yonoaquin. Min fununcai ua ahuashta fishcoama. Mia fustifin min funun fiaquin. ¿Ahuuscaquimun un chaca huatioquin Diosi chaca huafain min funuri un chaca huatiroquin? —ishon yoini.

¹⁰ Nannori yoifiaiton shafatifi fucash huani ahuuscashoma a fu ipaiquin. Fasi chaima fishtafuranfafainni. A fu ipaicoinquin. Ascafiaitocai José tanannima.

¹¹ Ascano shafa futsa tsoa yamaino José pushu muran yonoi iquini.

¹² Ascaino Potifar ahuinin aqui ichotan ahuun camisanun achitoshini chotamapaiquin, —Ua chotahuu, —huafiaitocai José apaitama ahuun camisa aqui shorifainicai ichoni.

^13-14 Ichoaino ainfoan ato oi ashcafinin cunacufainni fiisiyanan. Ahuun oinmatifo cunani atoqui chanishquin, —Oincapon ahuun camisa ua chotapaiquin uqui shorifaina. Nan Hebreo José nocoqui cashupai. Pushu muran iquishon ua chotapaiyaino un fasi fiisica.

¹⁵ Un fasi fiisicaino ichoqui ahuun camisa potafainaran, —ishon ato yoini.

¹⁶ Ascano José ahuun camisa nanno mucuni funun oinyonon.

^17-19 Ascano funu nocoaiton yoini, —Oinpon nan Hebreo José uqui parannaquin ua chotapaiyaino un fasi fiisica ua numanonfo. Ascaino ahuun camisa potafainni pushu murannoashu ichoa. Min oinmatinin ua chaca huaran, —ishon funu yoini. Nannori yoiaino nicain funu fasi sinacoinni.

^20-21 Ascashon José cunu muran iquimani. Atirifo niaifon Faraón iquimana muran nan muranri José iquimani. Nanno niaifo iquimafiano Diosin ahuun Yoshin Shara José fu rafucoinni. Diosin ahuun noicoinquin cunu murannoa niaifo Joséhuunoa shinansharamani.

²² Ascashon niaifoan yononi Josémain cunu murannoafo ato cushucun aton niaifo inon.

²³ Atohuunshocai shinanchacanima Josémain nantifi cushucun. José aca cuscan nantifi sharacoin ini Diosinmain amayamaiton.