Génesis 24 - Sharanahua: Diospan Tsain

Abraham ahuun facu Isaac ainfo fuchishopaiquin ahuun oinmati nichini

¹ Ascano nantia Abraham fasi anifoshta ini. Nocon Ifo Diosin Abraham nan apaoni cuscan nantifi shara huashoni.

² Ascashon Abraham ahuun oinmati ahuun oinmati futsafo aton niaifo cunani aqui onon. Ascashon Abraham yoiquin isca huani, —Uhuun chica ano mupihuu.

³ Nocon Ifo Diosi nantifi nai murannoafo non mai anoafoanri aton Diosi. Nan Diosin mia nicaino ua yoihuu nan Canaán anoacai uhuun facu Isaac ainfo fima. Un ato muran ifianocai nunoa min uhuun facu ainfo fimatiroma.

⁴ Ascatamarocon un cainni ano min catiro uhuun yorafo murannoa min uhuun facu ainfo ihuushotiroran, —ishon Abraham ahuun oinmati yoini.

⁵ Nannori yoiaiton nicatan ahuun oinmatinin Abraham yocani, —¿Ascan na ainfocai min yorafo muran u fu capaima un ahuusca huatiromun? ¿Un min facu min cainni ano iyotiromun? —huaiton.

⁶ —Ma. Uhuun facu uhuun yorafo muran iyoyamahuu.

⁷ Nocon Ifo Diosi nai muran icaton ua uhuun upa ahuun yorafo anoshon nan un cainni ano ua ihuuni. Nannoricoinfin ua ahuun tsain yoiniquin. Ua yoiyoni isca huaquin, “Nan mai min facu non min funafori un ato inainran,” ishon Diosin ua yoiyoni. Diosin ahuun oinmati nan a fu nai muran ica rucu nichishquin nannoa min uhuun facu ainfo fuchishonon.

⁸ Ascafia ainfo mi fu opaiyamaiton un mia yoia cuscan afanan min ashotiroma. Uncai Upa Diosin futan mihuunoa shinanchacashquima. Ascafia uhuun facu un cainni ano iyoyamahuu, —ishon Abraham ahuun oinmati yoini.

⁹ Nannori huaiton nicaquin ahuun oinmati Abraham ahuun chicaqui mupini Diosin nicaino Abraham yoini cuscan arifi yoini.

¹⁰ Ascatan ahuun oinmatinin Abraham ahuun ina camellofo non ahuara shara futsa futsatapafo foni. Pushu rasi ahuun anu Nacor nan Mesopotamia mai ano nan fari caiquiri noconi.

¹¹ Nanno pozomua pushu rasi pasoatoshon ifoan ahuun camellofo ratoconun mai chachimani unu ayanonfo. Na yorafo nanno icafoan ato ainfofoan man fari caino pozomua ano fonifo unu fiishcaquin.

¹² Ascano Abraham ahuun oinmatinin Upa Dios cufinquin isca huani, —Nocon Ifo Diosin min uhuun ifo Abraham ahuun Diosi. Na shafata ua ashopun uhuun ifo Abraham ua yonoa cuscan un ashonon. Uhuun ifo Abrahamhuun ramapaihuun shara huahuu.

¹³ Ua oinhuun Upa Diosin. Un nuno pozomua ano nia. Nantianri nan pushu rasi anoashu aton ainfofo fucani unu fii fucani.

¹⁴ Unfin shomaya futsa yoiqui isca huaicai, “Min cuti fotomatan ua unu fishohuun un ayanon,” un huaiton ua cumaquin isca huai, “Ayahuun. Min camellofori un ato ayamashquinran,” ishon yoiaiton nan Isaac ahuun ahuin min catonshona. Nan ascaiton oinquin un tapitiro min uhuun ifo Abraham shara huaran, —ishon Abraham oinmatinin Diosi cufinni.

¹⁵ Cufinquin anaitiataima shomaya Rebeca cuti tutsamuashu oni. Nanton Betuel ahuun facu. Nan Betuel Milca yafi Nacor facu. Nacor Abrahampan ushto.

¹⁶ Nan shomaya sharashtacoin nocofunu fu imisima. Nan chitun ano caa ahuun cuti fospihuashu afanan nasoa.

¹⁷ Ascan Abrahampan oinmati aqui ichoshon yoini, —Min cutipan ua unu ayamapun, —huaiton.

¹⁸ —Ayahuun, —huatan ahuun cuti fotomapacufoantan oinmati ayamani.

¹⁹ Ayashon yoini, —Un afanan unu fii min camellofori ayamai chain ichapacoin ayaquin, —ishon yoini.

²⁰ Yoiano ayati unu oca afanan chitun ano cari caripaoni nantifi camellofoan ayanonfo.

²¹ Oinmatinin oinfiaicai puusinima. Tapipai nan shomaya nocon Ifo Diosin nichiamainquin ahuun ifon facu ahuin inon.

²² Ascan nantifi camellofoan ayapacuni oinmatinin anio oro fini shomaya rusho huashoshquin. Ahuun ihuu mucu fustiti gramos nushmancaya. Munushumuti rafuri inanni. Nan rafuri oro ini. Ahuun ihuu rafu ciento diez gramos.

²³ Ascashon yocani, —¿Min tsoan facumainquin? ¿Ua yoipu min upa pushu muran non oshatiromainquin? ¿Min pushu fospicoianmanmun? —ishon yocaiton.

²⁴ —Unfin Betuel facuquin. Uhuun shano Milca non uhuun shota Nacor.

²⁵ Min nocon pushu muran oshatiro. Min camellofori non pimatiro. Nanno inafo aton tushu ichaparan, —ishon yoini.

²⁶ Nannori nicatan nan oinmatinin ratoconun mai chachini nocon Ifo Diosi cufinshquin.

²⁷ Cufinquin isca huani, —Aicho, uhuun Ifo Diosin, min fasi shara. Min uhuun ifo Abraham yoimisi cuscan aa. Min ahuun ramapai. Mianri cushushara. Min nuno ua ihuua uhuun ifo Abraham ahuun yorafo un oinon, —ishon cufinni.

²⁸ Ascano Rebeca ichoni nantifi ahuan pushu murannoafo chani huaicai.

²⁹ Nannori Rebeca ahuun ochi Labán. Nan Labán chico yoini cuscan nica pozon ano ichoni Abraham oinmati oin cai.

³⁰ Labán ahuun chicon yoia cuscan nicain ahuun rusho yafi ahuun munushumuti oinfainnicai Abraham ahuun oinmatiqui noconi. Unu chitun chaimashta nia oinni. Nannori ahuun camellofo.

³¹ Aqui nocoshon yoini, —Nocon Ifo Diosi mia shara huamisi. ¿Ahuuscai min nuno niamun? Munfin pushu shara huaquin min nanno oshashquin. Min camellofori umainti ano itiro. Nanfohuunshon mun ati shara huaran, —ishon Labán Abraham oinmati yoini.

³² Nannori nicatan Labán pushu ano nan oinmati cani. Ahuun camellofo aton catucamaquinoa ahuarafo fotomani racasharanonfo. Fasi yafi ato tushu futsa pimani. Asca huatan unu fitan nan oinmati yafi ahuun yorafo ochocomupacunifo.

³³ Ascano tushu pimataimacai, —Un mato yoipaiyai cuscan yoishoma un piyotiromaran, —ishon oinmatinin yoiaiton. —Ascaiton noco yoihuu, —Labán huani.

³⁴ —Unfin Abraham ahuun oinmatiquin.

³⁵ Uhuun ifo Abraham nocon Ifo Diosin fasi shara hua. Ascan natian ahua yopaima. Diosin chashoanfo inanfain moifo inanfain cuno facafacaitsa inanfain oro inanfain nocofunu oinmatifo inanfain camellofo inanfain burrofo inan.

³⁶ Uhuun ifo Abraham ahuin Sara yoshafoshtafiacun facu nanumani Abraham facu inon. Ascan nantifi aya cuscan Abraham furun inanshquin.

³⁷ Ascan uhuun ifo Abraham ua yoita isca huaquin, “Diosin mia oiainno ua yoihuun mincai nuno Canaán murannoa uhuun facu Isaac ahuin ihuushonima.

³⁸ Un nuno ifiano nunoa ainfon uhuun facu ihuushoyamahuu. Uhuun upa mai ari catahuun. Aria uhuun yorafo murannoa uhuun facu ahuin ihuushoshquin,” ishon ua yoia.

³⁹ Ascashon uhuun ifo Abraham un yocan, “¿U fu ainfo ocasmainomun un ahuuscatiroquin?” huaiton.

⁴⁰ Ua cumaitan, “Uhuun Ifo Diosi fu un nia. Ascacun ahuun oinmati a fu nai muran icaton miaya nichin min ahuuscatama casharatanon. Uhuun upan ahuun yorafo murannoa uhuun facu ahuin min ihuushonon.

⁴¹ Mia inancasmaifoan min ua yoia cuscan min atiroma. Ascafiacai Upa Diosi futan un mihuunoa shinanchacaimaran,” ishon ua yoita.

⁴² Ascan na shafata un pozon ano nocotan un Upa Diosi cufian, “Uhuun Ifo Diosin, min uhuun Ifo. Minfin Abraham ahuun Diosiriquin. Abraham ua nichian ahuun facu ahuin un iyoshonon. Ua tapimashara un nanscahuanon.

^43-44 Natian un nuno pozon ano nia. Shomayaton unu fiyoaiton ahuun cuti murannoa un unu yocain. Ascan, ‘Ayahuun. Min inafori un ayamairan,’ ua huaiton. Naan ascaiton un tapicain nan min catoan uhuun ifoan facun ahuin inon,” ishon un cufian.

⁴⁵ Un cufinquin anaitiataima un oian Rebeca ahuun cuti tutsaomushon fuaiton pozo ano fotomapacufoana. Ascaiton un yoia, “Ua unu inanpun,” huaiton.

⁴⁶ Samamashta fotomapacufoan, “Ayahuun, Ascashon min inafori un ayamashquiran,” ua hua. Ascashon ua ayamatan uhuun inafori ayamana.

⁴⁷ Ascano, “Min tsoan facumun,” ishon un yocaiton. “Unfin Betuel ahuun facuquin. Uhuun shota Nacor. Uhuun shano Milca,” ua hua. Nannori ua yoiaiton nicatan un rusho sahuumana. Ascatan munushumuti rafuri un nutamana.

⁴⁸ Ascatan ratoconun mai chachishon un nocon Ifo Diosi cufian, Un aicho huaa. Aafin uhuun ifo Abraham ahuun Ifo Diosiquin. Uarifi fai sharatan nocon Ifo Diosin ua iyoa Abraham ahuun shota un fuchinon Isaac ahuun ahuin inon. Nannori nocon Ifo Diosin ua yonoa.

⁴⁹ Natian man uhuun ifo Abraham shara huapai Rebeca inanpaicoinquin ua tapimahuun. Ascayamacun ua tapimahuun un mai futsano funanon, —ishon yoiaiton.

⁵⁰ Betuel futan Labán cumanifo, —Nocon Ifo Diosin mia nichicun noncai mia Rebeca fishcotiroma.

⁵¹ Iyotahuun min ifo Abraham ahuun facu ahuin inon. Nannori nocon Ifo Diosin yonoaquin, —ishon yoinifo.

⁵² Nannori nicatan Abraham ahuun oinmatinin ratoconun mai chachishon Upa Dios cufinquin, —Aicho, —huani.

⁵³ Ascatan chipo ahuarafo Rebeca inan. Oro futsa futsatapa cuscarafo inanfain cuno facafacaitsafo inanfain sahuutifo inanni. Ahuara chicoinfo ahuun ochi inanfain ahuari inanni.

⁵⁴ Ascatan piyanan aqui ayafain ahuun yorafoya nan yamu oshashinifo. Moitan, —Ua nichihuun uhuun ifo Abraham ano un catanon, —ishon Abraham ahuun oinmatinin Labán yafi ahuun yorafo yoini.

⁵⁵ Ascaifiaiton Labán futan ahuan cumanifo, —Funayamahuu. Noco yoipun Rebeca no fu mucu rafuti oshatan no fu iyonon. Ascano chipo mi fu catanon, —ishon cumaiton.

⁵⁶ —Ua nituhuayamacahuun. Diosin ua shara hua. Ascacun ua nichicapun uhuun ifo ano un noco sharanon, —huaiton.

⁵⁷ —Non Rebeca yocayonon raquiri noco yoimainquin, —ishon yoinifo.

⁵⁸ Ascashon Rebeca cunanifo yocashquin, —¿Na nocofunu fu min capaimun? —huaifoan. —Unfin a fu caicain, —ishon cumani.

⁵⁹ Ascaiton yoinifo, —Catahuun. Min oinmatiri mifu caiquin, —huani. Ascano Abraham oinmati fu a fu rafuafo foaifono Rebeca ahuun oinmati ainfofori a fu fonifo.

⁶⁰ Foafotaima iyoa futan ahuan isca huani, —Chicoshta, min facu ichapa caihuapainon. A mia noicasmaifo min ato finonpainonran, —ishon yoinifo.

⁶¹ Ascaino camello camaqui Rebeca yafi ahuun oinmati shomayafo tsaoinacahuan fonifo. Ascan Abraham oinmatinin Rebeca apa pushu anoashu iyoni.

⁶² Nantian Abraham Hebrón ano iyoni. Nan Hebrón Néguev muran. Ahuun facu Isaac Hebrón anoashu nan pozon ano cani. Nan pozon anuni isca huaquin, —Nan Diosin niaton pozoanoa unu ayaquin ua oinran, —ishon yoimisifo.

⁶³ Ascan man fari caino pozon anoashu nii yamai ano cani nanno shinanni. Caaquin oian camellofo fuaiton oinni.

^64-65 Nantiacoin Rebeca Isaac oinni. Camellocamaquinoashu fotoaiton Rebeca oinmati yocani, —¿Na nocofunu nocoqui oai tsoamun? —huaiton. —Naafin Isaac uhuun niaifoquin, —ishon cumani. Nannori yoiaiton nicai ahuun caifo fuya huamisi cuscan Rebeca fufopomuni.

⁶⁶ Ascatan Abraham ahuun oinmati Isaac ano yoicai cani. Nantifi aca cuscan yoipacuni.

⁶⁷ Yoiaiton Isaac ahuan Sarapan pano pushu muran Rebeca iyoni ahuun ahuin inon. Ascatan taui Isaac ahua fasi shinancoinni. Rebeca nocoanocai ahuun noicoinquin afanan ahua shinancoinnima.