Génesis 22 - Sharanahua: Diospan Tsain

Abraham nicasharamainquin Diosin tapipai

¹ Ascano chipo Diosin Abraham ahuara yoini man icoinra huacoinnamainquin oinshquin. Ascashon cunani, “¡Abraham!” huaiton. —Unfin nunoquin, Ifon, —ishon cumani.

² —Nan min furun fusti min noicoian, nan Isaac, Moriah mai ano iyotahuun. Nanno machi anoshon min facu ua rutushohuun. Ascashon min coatiro min ua nicacoinmisishaquin ua ismashquin. Min machi ano catiromainquin un mia tapimashquiran, —ishon Upa Diosin Abraham yoini.

³ Ascan iyoconaino funamarishta Abraham ahuun burro camaqui tsaoti fucani. Ahuun oinmati rafu yafi furun Isaac iyoni. Cataima caro huaiyoni machi ano nocoshon Diosin yoita cuscan ahuun facu rutushon Diosi coashoshquin. Ascano nan Diosin yoita cuscan nanri cani.

⁴ Osha rafu non fusti finontan nan machi chaicunoa fuchini.

⁵ Ascashon Abraham ahuun oinmati rafu yoini isca huaquin, —Nunoshon burro futan oinyocahuun. Uhuun facu fu un ari cai Upa Diosi cufinshquin Cufinquin unutan non matoqui nasoiran, —ishon Abraham ahuun oinmati rafu yoini.

⁶ Ascashon Abraham furun Isaac caro papimani afin cunoti yafi chii foni.

⁷ Nan rafu foaiton oinquin Isaac apa yocani, “Upan,” huaiton. “Jaan,” Abraham huani. —Man nonfin chii yafi caroyaquin. ¿Ascafia ranimun chashoanun facu non rutuai coashquin? —ishon furumun apa yocani.

⁸ Ascaiton Abraham cumani, —Uhuun facushta, Upa Diosin afin noco chashoanun facu inantiro non coanon non Diosi tanasharashon ismashquin, —ishon Abraham furun yoini. Ascatan nan rafu machi ano fonifo.

⁹ Ascano Diosin iqui huashoni ano nocoshon Abraham toquiri putsainini Diosin yononi cuscan huaquin. Nan toquiri putsamuinia camaqui caro machinini. Ascatan ahuun furun Isaac munushushon caro camaqui ratani.

¹⁰ Ascashon cunoti tsomani ahuun facu rutushquin.

¹¹ Ascafia samamashtacoin Diospan oinmati nan a fu nai muran icaton cunainifoanni, —¡Abraham! ¡Abraham! —huaiton. —Unfin nunoquin, —huaiton.

¹² —Min facu ahuusca huayamahuu. Natian mun mia tapia min Diosi nicacoin shara. Mia yoiai cuscan min aa. Nan min facu fusti min Diosi fishcoama. Min inanran, —ishon Diospan oinmatinin yoini.

¹³ Ascatan Abraham oinquin oian chashoan mashoya ihuiqui futamua oinni. Ascashon nan chashohuan fini rutushquin toquiri putsamuinia camaquishon coashquin Upa Diosi tanashara cuscan ismashquin. Ascan ahuun furun rututamarocon chashohuan rutuni.

¹⁴ Ascashon nanno anuni, —Non yopai cuscan Upa Diosin noco inanshquiran, —ishon anuni. Nantianri yoicani, —Nan machi Diosi ica arishon non yopai cuscan noco inantiroran, —ishon yoimisifo.

¹⁵ Ascaiton Diospan oinmati nan a fu nai muran icaton afanan Abraham cunani.

¹⁶ —Abraham, nocon Ifo Diosin mia yoi isca huaquin, “Min facu fusti mian rutusho cuana uqui onon. Ascan uhuun anuhuunshon un mia yoi.

¹⁷ Un mia shara huashoshquin. Nan fishifo tsoancai tanan huatiroma. Mai furoricai tsoan tanan huatiroma. Nanscarifiai min funaforicai tsoan tanan huatiroma iishquin. Ratora yorafoan min caifo rutupai min funafoan atori shuhuitiro ato pushu rasi fiishquin atona inon.

¹⁸ Min ua nicacoian. Ascan min funafohuunshon un nantifi manifotifo shara huashquiran,” —ishon Diosin Abraham yoini.

¹⁹ Ascano nannori nicatan Abraham ahuun facu fu ahuun oinmatifo nituafoanno naso furanifo. Atoqui nocoshon ato Beerseba mai ano iyoni.

Nacor facufohuunoa

²⁰ Asca oshu ranan finoano futsan Abraham yoini, —Min facahuan Milca natian facufoya. Min ushto Nacor ahuun facufo.

²¹ Ascashon ahuun facufo anuni isca huaquin, Iyoacaiton ahuun anu Uz. Chipocufo Buz non Kemuel. Nan Kemuel ahuun facu Aram.

²² Futsan ahuun anu Quesed icain futsa Hazo icain futsa Pildas icain Jidlaf icain Betuel, —ishon yoini.

²³ Ascan nan Betuel Rebeca apa. Nantifi nan ocho furufo Milca Abraham ushto inanni.

²⁴ Nacor ahuun ahuin futsa Reúma arifi furonanfacufosi cainni. Aton anu Teba non Gaham non Tahas non Maaca inifo.