Génesis 21 - Sharanahua: Diospan Tsain

Isaac cainni cuscan

¹ Nan nocon Ifo Diosin yoiyoni cuscan Sara shara huani.

² Abraham anifoshtafiashon Sara facu nanumani. Upa Diosin yoiyoni Sarapan chipo facu nanushquin. Ascano postoashu furonanfacu cainni.

³ Ascan caincun Abraham anuni Isaac.

⁴ Ahuun facu cainyaitian ocho osha finontan Diosin yononi cuscan Abraham Isaac foshqui rupa shatuni.

⁵ Ahuun facu Isaac cainnitian Abraham cien fariya ini.

^6-7 Ascashon Sarapan shinanni isca huaquin, —Tsoancai shinanmisima un facu nanuai Abraham furun iishquiai. Abraham anifoshtafiashon u futan furun aca. Ascan Diosin ua shuchimana cuscan arifi nicain shuchitiroforan, —ishon Sarapan shinanni.

Abraham Agar yafi furun Ismael nan icanoshon potani

⁸ Ascashu Isaac yosishocai afanan shoma anima. Nan shafatari Abraham yorafo fusiquini.

⁹ Ascashon Sarapan oinni nan Egipcio ainfo Agar ahuun facu Ismael ahuun facu Isaac cashu mutsama huaiton.

¹⁰ Ascashon funu Abraham Sarapan yoini, —Nan ainfo nocon oinmati yafi ahuun facu nichihuun. Agarpan facu uhuun facu Isaac min chipo inain cuscacai min Ismael yafi pashcanan huatiromaran, —ishon Sarapan ahuun funu yoini.

¹¹ Nannori yoiaiton nicain Abraham furu Ismael fasi shinancoinni. Ascan furu shinanquin ointi noconi.

¹² Ascafia Diosin Abraham yoini isca huaquin, —Min furun yafi ahua nan min oinmatihuunoa ichapa shinanyamahuun. Min ahuin Sarapan mia yoiai cuscan nicahuun. Min furun Isaachuunshon un min funafo shara huashquin.

¹³ Ascafia min oinmati Agar furun Ismael min furunri. Ascan un ahuunshon mani futsa imairan, —ishon Diosin Abraham yoini.

¹⁴ Ascan iyoconaino funamarishta Abraham Agar tushu yafi unu fichi tutso murannoa inanni. Abraham Agar ahuun tushu yafi unu papimani aya catanon. Ahuun facu Ismael ahua Agar fu cani. Ascano nan tsoan istaipama anuni Beerseba ano cahuascaini.

¹⁵ Agar ahuun unu nutsoantian ahuun facu nii cuyamamishti naman ratani.

¹⁶ Asca huatan chaimashta cani. Ahuun nomuran shinanni isca huaquin, —¡Ohuashta! Uhuun facu nai omitsiscaitocai un oinpaimaran, —ishon shinanni. Nanno chaimashta tsaoashu fasi uaini.

¹⁷ Ascan nan facurifi uaicaiton Upa Diosin nicani. Ascano Diospan oinmati a fu nai muran icaton nai muranshon Agar cunashon yoini isca huaquin, —¿Agar, min ahuuscaimun? Ratuyamahuu. Min facu nanno racashu uaicaiton Upa Diosin nica.

¹⁸ Min facu nanno racashu uaicaiton funishon iyotahuun. Upa Diosin yoiquin isca hua, “Un min facuhuunshon un yora ichapa caihuairan,” ishon Upa Diosin yoia, —Diospan oinmatinin a fu nai muran imisiton Agar yoini.

¹⁹ Asca huashu Upa Diosin Agar pozomua oinmani chaimashta. Ascan ahuun fichi tutso murannoa unu manuni ahuun facu ayamashquin.

²⁰ Ascan nan facu Ismael tsoa istaipama Parán anoashu pushconi. Diosin a fu ica. Pushcoaino piacati fasi tapicoinni. Muquicoinni.

²¹ Nanno icano ahuan Egipcio shomaya aqui ihuua ahuun ahuin inon.

Abraham yafi Abimelec yoinonan shara nan rafu non aton funafori isharacoinyafo

²² Ascan nantiari niaifo Abimelec futan ahuun ranushumuafo aton niaifo Ficol Abrahamqui noconi. Abimelec Abraham yoiquin isca huani, —Min ahuara huaiti Diosin mia ashomisi.

²³ Ascacun ua yoihuu mincai ua non uhuun facufo non uhuun funafori min noco parapacunacama. Nuno min maiyamafiacun un mia sharahuamisi cuscan uhuun caifoya noco shara huahuu, —ishon Abimelec Abraham yoini.

²⁴ Nannori huaiton nicain, —Ai. Min ua yoia cuscan un nannoricoin min non min facufo non min funafori un mato paranpacunacama. Un non uhuun yorafoanri mato shara huapacunacaran, —ishon Abraham yoini.

²⁵ Ascano Abraham ahuara futsa Abimelec yoiquin isca huani, —¿Ahuuscai min oinmatifoan uhuun pozomua fiamun? —ishon yocaiton.

²⁶ —Mian yoiai cuscacai un nicayomisima. Na shafatan ramashta un nicain. Ascan tsoanran min pozomua fia uncai tapiamaran, —ishon Abimelec Abraham cumani.

²⁷ Ascan Abraham chashoanfo non moifori Abimelec funi inanshquin. Asca huaino Abimelec tapitiro man rama yoinonan shara cuscan Abraham ointiaquimapacunacama.

²⁸ Asca huatan chashoanfo siete ahuin pushcomishti pashcanan huani.

²⁹ Ascaiton Abimelec yocani, —¿Ahuuscai min siete chashohuan ahuin pushcomishti min tiri futsa huaamun? —ishon Abimelec Abraham yocaiton.

³⁰ —Nan na siete fihuun. Fishon nantifi yorafo min ismatiro ufin na pozomua mai poquishon unu huaniran, —ishon Abraham Abimelec yoini.

³¹ Ascatan nannoashu Abraham yafi Abimelec yoinansharanifo nanscacoin aashcaquin. Ascashon a mai anuni Beersebaran, ishon anumisifo.

³² Ascan yoinainsharatan Abimelec yafi ahuun ranushumuafo aton niaifo Ficol Filisteofo icano naso furanifo.

³³ Ascano nantia Beerseba ano Abraham nituyoni nii cuyamamishti ahuun anu tamarisco fanani. Nannoshon nocon Ifo Diosi nan nipanaca Abraham cufinni.

³⁴ Filisteofo mai ano fari ichapa Abraham nan mai ano iyopaoni.