Génesis 18 - Sharanahua: Diospan Tsain

—Un mia furonanfacu inanon, —ishon Diosin Abraham yoini

¹ Ascano nan ihui uhuapafo Mamre naman Abraham tsaoa ini. Ahuun pano pushu caincaiti ano tsaoni. Fari masafinin racano fasi niscacoin nanno tsaoa ini. Ascan nantia nocon Ifo Diosin Abraham oinmariscatani.

² Ascano Abraham funinacahuan nan nocofunu rafu non fusti chaimashta nicun fuchini. Ascaiton oin pano pushu caincaiti anoashu atoqui nocoriscatan ato tutishopacucahuani.

^3-4 Ascashon ato yoini, —Uhuun yorafoan. Un icanoshon tunuyoifocahuun. Un mato unu fishonon man ocho comucain ihui mata toca namanshon tunuyoshcaquin.

⁵ Ascano man uqui ocun un mato pimaiyoi. Man tunuyotiro atsanashquima. Ascashu chipo afanan fosharatashcaquin, —ishon Abraham nan rafu non fusti ato yoini. Ascaiton cumanifo, —Nan min noco yoiai cuscan min noco ashotiroran, —ishon yoinifo.

⁶ Ascatan Abraham ahuun pano pushu ano ichoni Sara tapimaicai. Ascashon ahuin Sara yoini, —Ariscahuu. Veinte dos litros de harina firiscahuu ato misi huashoshquin, —ishon ahuin yononi.

⁷ Asca huatan moifo anori ichotan ahuun oinmati yononi moipan facu nami pachi shara rutunon ato pimashquin.

⁸ Ascano queso yafi moipan shoma non moipan facu nami ato pimani. Nan piaifoanno chaima Abraham ihui mata toca nia ini.

⁹ Ascashon nan rafu non fustiton Abraham yocani, —¿Ranimun min ahuin Sara? —ishon yocaifoan. —Pano pushu muranran, —ato huaiton.

¹⁰ Ascaiton nocon Ifoan yoini, —Un fari fusti finontan miqui afanan nasoshquin. Nantiari min ahuin Sara facu cainshquinran, —huaiton. Sarapan ato cachori nishon nicani.

¹¹ Ascafia Abraham anifo icaino ahuun ahuin Sara yoshafoshta afanan facu atiroma ini.

¹² Ascaino nocon Ifon yoai cuscan Sara nicain ahuun nomurannoashu shuchini, —¿Ahuuscatsi ai un yoshafoshtafiano uhuun funuri anifofiashon ua facu nanumatiro? —ishon Sarapan shinanni.

¹³ Ascashon nocon Ifon Diosin Abraham yoini, —¿Ahuuscaimun Sara shuchiquin? ¿Ahuuscai yoimun isca huaquin? “¿Un yoshafofiashomun un facu atiro?” —ishon Sarapan yoia.

¹⁴ —Ascan ahuara tsoan atiroma cuscan Diosin huatiro. Fari fusti finontan un afanan mia oinyoi oshquin. Nantiari Sara furun cainshquiran, —ishon nocon Ifoan yoiaiton.

¹⁵ Nicain Sara ratuni. Ascashon fomanpaiquin yoini isca huaquin, —Uncai shuchiamaran, —huaiton. Nocon Ifo Diosin afanan cumani, —Ma. Mun mia tapia min shuchiaran, —huani.

Abraham Sodoma icanoafo Diosi cufinshoni

¹⁶ Asca huatan nan rafu non fusti funinifoancatan Sodoma fain fonifo. Ascaino Abraham ato fu chaimashta cani ato nichicai.

¹⁷ Ascano nocon Ifo Dios shinanquin isca huani, —Un ashquiai cuscan un Abraham tapimatiro.

¹⁸ Chipo Abrahamhuunoashu ahuun funafo caifo ichapa icain mutsisipacoinfo iishquicani. Ascano ahuunshori un nantifi manifoti shara huashquin.

¹⁹ Un Abraham catonni ahuun facufo yafi ahuun funafori ua tanasharashu cayacafi shara shinanonfo. Ascaifoanno un Abraham yoiyotiani cuscan un ashotiroran, —ishon nocon Ifo Diosin yoini.

²⁰ Nannori shinanquin nocon Ifoan Abraham yoini, —Munfin oianquin nan yorafo Sodoma anoafo yafi Gomorra ano icafoan fasi chacacoin huafafaincani.

²¹ Ascacun natian un oincai atohuunoa un nica cuscan iconmainquin. Ascayamacun un tapitiroran, —ishon Diosin yoini.

²² Asca huatan nan rafu Abrahammaquinoashu Sodoma fain fonifo. Ascaino Ifo Diosin Abraham fu nituyoni.

²³ Ascashon Abraham yocani, —¿Nan mia nicacasmamisifo cuyoaino nantiari min yonoa cuscan huamisifori min cuyoimun?

²⁴ ¿Ascan cincuenta yora min yonoa cuscan huamisifo nanno icaino min Sodoma yafi Gomorra cuyoshquimun nantifi cuyonon?

²⁵ Ma. Ifon, min fasi shara. Mincai asca huapacunacama. Min nicacasmamisifo onaintimai cuscacai nan mia nicamisifori min asca huatiroma. Min nicacasmamisifo rutuaino nantiari min yonoa cuscan huamisifocai min rutushquima. Min nantifi yorafo onancoian. Minfin niaifocoinquin yorafoan ahuara chaca hua cuscan min yoipacutiro. Min acai cuscan cayacafi sharapacunacaran, —ishon Abraham Diosi yoini.

²⁶ Nannori huaiton nicaquin nocon Ifoan cumani, —Ascan Sodoma ano un cincuenta yora un yonoa cuscan huamisifo fuchishocai nanfohuunshon un nantifi nannoa yorafo numashquin nanonfoma, —ishon Diosin yoini.

²⁷ Ascaiton Abraham afanan cumani, —Uhuun Ifon, minfin Dioscoinquin. Unfin nocofunu ahuamafiashon un afanan mia yocapai.

²⁸ Min cincuenta yora min yonoa cuscan huamisifo Sodoma anoa min fuchiyamashon min cuarenta y cinco fuchishomun nan pushu rasi nantifi cuyoshquiquin, —ishon Abraham yoiaiton. Afanan Diosin cumani, —Un cuarenta y cinco yora un yonoa cuscan huamisifo fuchishoncai un Sodoma cuyoimaran, —huaiton.

²⁹ —Ascan cuarenta fusti fuchishonmun min atiro, —Abraham huaiton. —Un cuarenta yora un yonoa cuscan huamisifo fuchishoncai un Sodoma cuyoimaran, —huaiton.

³⁰ —Ifon, uqui sinayamahuu un afanan mia yocanon. Min fuchitiroraca treinta yora shara min yonoa cuscan huamisifo nanno, —huaiton. —Un treinta yora un yonoa cuscan huamisifo fuchishoncai un Sodoma cuyoimaran, —huaiton.

³¹ —Ascacun ranotama un mia yocai, Ifon. Ascan afanan un mia yocai veinte yora min yonoa cuscan huamisifo fuchishonmun min nantifi Sodoma yafi Gomorra anoafo cuyoiquin, —huaiton. —Ma. Un veinte yorafo un yonoa cuscan huamisifo fuchishoncai nanfohuunshon nan pushu rasi rafu un ato ahuusca huaimaran, —huaiton.

³² —Ifon, uqui sinayamahuu un fustishta afanan mia yocanon. ¿Min mucu rafuti yorafo min yonoa cuscan huamisifo fuchishonmun min nantifi cuyoiqui? —huaiton. —Ma. Un mucu rafuti yorafo un yonoa cuscan huamisifo fuchishoncai nanfohuunshon un Sodoma yafi Gomorra anoafo un ato ahuusca huaimaran, —ishon nocon Ifoan Abraham yoini.

³³ Ascashu ahuun tsain unutan nocon Ifo Diosin Abrahammaquinoashu cani. Ascano Abraham ahuun pushu ano nasoni