Génesis 16 - Sharanahua: Diospan Tsain

Agar yafi furun Ismaelhuunoa

^1-3 Abram Canaán mai ano nocoi taunitian man mucu rafuti fari finoan ini. Nantian Sarai yafi Abram facuoma inifo. Ascacun Saraipan ahuun oinmati funu Abramqui iyoni ahuun ahuin futsa inon. Nan ahuun oinmatinin ahuun caifo Egipciofo ini. Ahuun anu Agar. Ascashon Saraipan funu Abram yoiqui isca huani, —Nocon Ifon Dios ua facu inanma. Ascacun uhuun oinmati fu min itiro. Ahuun facufo uhuunacoin cuscara inon, —ishon Saraipan funu yoini. Nannori yoiaiton nicaquin ahuin cumani, —Ai. Mian yoia cuscan shararan, —huani.

⁴ Ascano Agar fishon facu nanumani. Ascatan Agar man facu nanua tapiashu fasi curafiapaimisi ini. Ascashon yoiquin isca huani, —¡Aicho! Un Abram futan facu atiro cuscacai min facu nanutiromaran, —ishon Agarpan Sarai shinanchacamapaoni.

⁵ Asca huaiton nicaquin Saraipan Abram yoini, —Uhuun oinmatinin natia uhuunoa shinanchacai. Ufin yoiyamua, “Min uhuun funun ahuun ahuin futsa itiroran,” ishon. Ascafia uhuunoa shinanchacafafainni. Minhuun nua. Mian chaca hua cuscan nocon Ifo Diosi tapicoian. Ascacun mia Diospan asca huapainonran, —ishon Saraipan funu yoini.

⁶ Ascaiton Abram ahuin cumani, —Ascacun Agar min onaintimatiro. Min apaiyai cuscan min huatiroran, —ishon funun yoini. Ascacun Saraipan Agar coshani. Coshano Agar ichoni.

⁷ Ascashu Agar fain cani. Nan fain pushu rasi Shur ano noconi. Nan Abram icano Shur nushmancayan fai cusumunri tsoa istaipaima ano Agar noconi. Nanno pozo cuscara ini. Ascano nannoshon nantia Diosin oinmati a fu nai muran icaton Agar fuchini.

⁸ Fuchishon yoini isca huaquin, —Agar, min Saraipan oinmati. ¿Min raniashu oashu min raqui caimun? —ishon yocaiton. Agar cumani, —Uhuun Ifo Sarai icanoashu un ichoaran, —huaiton.

^9-12 Ascacun, —Min ifoqui afanan nasohuu mia yonoai cuscacoin aashquin. Un mia min funafo ichaparasi inain. Tsoan ato tanan huatiroma. Min natian facu nanua furonanfacu iishquin. Ifo Diosin mia nica min omitsiscai cuscan. Ascan min facu anuquin Ismaelran min huaashquin. Burro yoina cuscara tsoan istaipama ano cahuascai cuscan nanscarifin min facu aashquiquin. Ascatan nantorifi nantifi yorafo noicasmashquin. Ascaiton nanfoanri min facu noicasmashcaniran, —ishon Diosin oinmati a fu nai muran imisiton yoini.

¹³ Nicaquin Agar nocon Ifo Diosi yoini isca huaquin, —Min ua oinmisiran min anu itiro, —ishon Agar yoini. Ascatan Agar shinanni isca huaquin, —Diosin ua oinmisi. Natian urifi un Diosi oianran, —ishon Agar shinanni.

¹⁴ Ascacun nan pozo nanno anuni, —Nuno pozo anoshon nan Diosin nipanacaton ua oianran, —ishon nannoa pozo anuni. Natianrifi nan pozo nanno Cades yafi Bered nushmancaya.

¹⁵ Ascashu Agar ahuun facu cainni. Nan Abram ahuun facu ini. Ascacun Abram anuni Ismael.

¹⁶ Nan facu cainitian Abram ochenta y seis fariya ini.