Génesis 13 - Sharanahua: Diospan Tsain

Abram yafi Lot pashcananfainnifo

¹ Ascano Abram ahuin yafi ahuun ahuarafo non ahuun ushto facu Lot non nantifi ahuun ahuarafoya Egipto anoashu fonifo Néguev mai ano nocoshcaquin.

² Nantia Abram ina ichapaya ini oro yafi cuno faca facaitsa ichapacoinya ini.

^3-4 Asca Néguev anoashu funainquimashta cafoicai Betel yafi Hai nushmancayan noconi. Nanno nocoshon ahuun pano pushu pochini. Nannori Abram toquirifo putsainini. Ascashon nocon Ifo Diosi nannoshon cufinshquin. Ascan nanno afanan nocoshon ahuun Ifo Diosi cufinni.

⁵ Nantiari Lot arifi Abram fu cahuancacaini. Nan Lotrifi ahuun ina chashohuafo yafi ina futsafori ichapaya ini.

⁶ Nan icafo mai anocai fasi ichapacoin inima aton chashoanfoan pinonfo. Ascacucai Lot yafi Abram afanan ano rafu itiro inifoma.

⁷ Ascashu pashcanantaifoma Abram ahuun ina cushumisifo yafi Lotpan ahuun ina cushumisifo fochishmanantanancain asca huan tanannifo. Nan mai anori nantia Cananeofo yafi Ferezeofo icafo ini.

⁸ Ascacun Abram Lot yoini isca huaquin, —Upan, non fochishmanantanaincai sharama. Nocon ina cushumisifo non ato yoinon arifi fochishmanantananonfoma.

⁹ Ascacun natian non pashcananon. Min mai futsa ano icaino shara itiro. Ascan min rato mai fipaiqui mifi min catontiro. Fari oaiquiri min capaiyaino un fari caiquiri catiro. Ascan min fari caiquiri capaiyaino un fari oaiquiri catiro. Asca mifin min catontiroran, —ishon Abram Lot yoini.

¹⁰ Ascaiton nicaquin Lotpan nantifi oiancuni. Ascaquin oian Jordán unu cusumun mai mispa fasi sharacoin. Nannori unu afain. Ascan nan mai anori yonofo foaisharatiro ini. Nan mau sharacoin ini. Nan Egipto anoa mai ahuun anu Zoar sharashta cuscara ini. Nan Lot icatiancai nocon Ifo Diosin Sodoma yafi Gomorra cuyoatai inima.

¹¹ Ascashon Lot Jordán ahuun mai mispa fari oaiquiri catonni. Ascashu ahuun inafo yafi ahuun yonomatifo Abram icanoashu pashcafainnifo.

¹² Ascashu Abram Canaán mai ano nituni. Ascaino arifi Lot mai mispa pushu rasifo ano ini. Sodoma chaima Lot ica ini.

¹³ Nan Sodoma anoa nocofunufoan fasi chacacoin huapaonifo. Nanfoan nocon Ifo Diosi nicacasmafain chacasi huapaonifo.

^14-15 Ascashu Lot Abram anoashu pashcani. Ascashon nocon Ifo Diosin Abram yoini isca huaquin, —Abram, nantifi oinyacuhuu. Nantifi nan mai min oiain cuscan un mia inanfain min funafori inanshquin. Matona ipashanon.

¹⁶ Ascan unfi min funafo ichapacoin cai huaicai. Tsoan mai furo tananhuatiroma. Nanscarifi ai chipo min funafori tsoan tanan huatiroma iishquin.

¹⁷ Min nantifi oinyacuai cuscan yoifoanfafainhuun Nantifi nan mai un mia inain. Nan mai minaran, —ishon nocon Ifo Diosin Abram yoini.

¹⁸ Ascaiton nicashon Abram ahuun pano pushufo nii ichapa ano foni. Ascashon nanno anuni Hebrón. Nocofunu ahuun anu Mamre arifi nanno chaimashta ica ini. Abram nocon Ifo Diosi yoisharapaiyaiton afanan toquirifo putsainishon Ifo Diosi cufinni ahuunoa yoisharanon.