Éxodo 3 - Sharanahua: Diospan Tsain

Diosin Moisés cunani cuscan

¹ Ascano nantian Moisés ahuun raisi Jetro ahuun caifohuunshon Diosi cufinmisiton ahuun chashoanfo cushushopaoni. Fasi chaicoincushon tsoa istaipama ano ahuun raisin chashoanfo iyoni. Nanno machi cuyacoin Diospan ahuun machiran ishon anumisifo. Ahuun anu futsari Horeb huanifo.

² Nannoashu Diospan oinmati nan a fu nai muran ica Moisésqui noconi. Tsoa futsa yamafiainno ahuun oi Moisés nicani. Nan nii cuyamamishti shocoa chi uruai murannoa Diosin oinmatinin Moisés oinmani. Nantian Moisés oinni nan nii cuyamamishti chi urufiainocai coonima. Nan uru shahuashahuaifiaquicai ahuun puifo coanima.

³ Nantian Moisés ahuun nomuran shinanriscatani. —¿Ahuuscai nii cuyamamishti shocoa cooimamun? Un chaimashta canon oinsharashquin ahuuscashumain nii puifo cooimacain. Tsoancai iscara oinyomisima. ¿Ahuuscaimun nii cuyamamishti shocoa chii urufiaino ahuun puifo cooimacain? Un oincanon, —ishon Moisés ahuun nomuran shinanni.

⁴ Ascashu Moisés nan nii cuyamamishti shocoa chaimashta cani oinshquin. Ascano samamashta Moisés nan chii uruai murannoa Diosin ahuun oi nicani yoiquin isca huaiton, —Moisés, Moisés, —huaiton. —Unquian. Un nuno, —ishon Moisés cumani.

⁵ —Nanno nitunhuun. Afanan nii cuyamamishti shocoa chaimashta oyamahuu. Unfin nunoquin. Mincai ua cuscara sharama. Ascacun min sapato pucahuu un mia yoinon.

⁶ Nan min shunifo Abraham non Isaac non Jacob un aton Diosifin Unquin, —ishon yoini. Nannori huaiton nicain Moisés fasi ratucoinquin shinanni isca huaquin, —Un Diospan fuso oin un nariscatiroran, —icashu fufopomuni Diospan fuso oinshquima.

⁷ Ascano Diosin afanan yoini isca huaquin, —Uhuun yora Israelifofin mun oianquin fasi omitsiscaifoan Egipciofoan ato curushcain yonomanai cusca fasi atsanai pashapaiyaifoan un oian. Un fasi atohuun ramapaicoian.

⁸ Unfin nai murannoashu fotoaquin ato numashquin. Unfin Egipcio mai anoshon ato nichicain nan mai uhuapa fasi sharacoin ano un ato iyoi cai. Nannofin nantifi yono foaisharacain tushu sharacoinfo futsa futsatapafo icain fona ichaparasiquin. Nan unu afatiro cusca nanscarifi ai nan fona ayati sharacoin afain. Nantianri nanno Cananeofo non Hititafo non Amorreofo non Ferezeofo non Heveofo non Jebuseofo non afo icafoquin.

⁹ Min caifo Israelifo uaicaifo cusca mun nica. Egipciofoan ato fasi chaca huai cusca mun oian.

¹⁰ Natian ato ari catahuun. Un mia Egipciofoan aton niaifo Faraonqui mia nichi uhuun yorafo nan Israelifo Egipcio mai anoshon min ato iyotanon, —ishon Diosin Moisés yoini.

¹¹ Nannori Diosin yoiaiton nicain Moisés Upa Diosi cumaquin isca huani, —Ma. Uncai ahuama. Un Faraón icano uhuun caifo Israelifo Egipcio mai anoshon un ato iyotapanan, —ishon Moisés Upa Dios cumaiton.

¹² —Unfin mi fu ishquicai. Min caifo Israelifo Egipcio mai anoshon iyoaitian nan machi Horeb anoshon man ua cufinshquinon. Ascashon min tapitiro un mia ya min yorafo nan Israelifo ano nichiaran, —ishon yoiaiton.

¹³ Ascaiton Moisés cumani, —¡Ma! Uncai ascapaima. Uhuun caifoan, “Min chaniran,” ishon ua yoitirofo. Ascafian unfin uhuun caifo Israelifo ano nocoshon un ato yoitiroquin isca huaquin, “Nocon shunifoan aton Diosifin ua matoqui nichiaquin,” ishon un ato yoiaiton ua isca huatirofo, “¿Nan Diosimun ahuun anu ahuanuquin?” ishon. ¿Ua yocaifoan un raquiri ato cumatiromun? —ishon Moisés cumaiton.

¹⁴ —Ma. Unfin ipatianiquin. Ascacun ato yoitahuun isca huaquin, “Nan ahuun anufin Ipamisiquin,” ishon ua matoqui nichiaran ato huahuun. “Diosin ahuun anu futsafin Uncoinquin,” ishon nannori ato yoitahuun, —Upa Diosin Moisés yoini.

¹⁵ Afanan Diosin Moisés yoini isca huaquin, —Min caifofo Israelifo yoitanhuun isca huaquin, “Nocon shunifo Abraham non Isaac non Jacob nocon shunifoan aton Diosin nan nocon Ifoanfin ua matoqui nichiaquin,” ishon ato yoitanhuun. Nan un mia yoia cuscafin Un ipamisiquin. Nan uhuun anu. Min non min caifo non maton funafo tapitiro uhuun anucai fiananpacunacama. Unfin ipamisiquin. Nannori fusti uhuun anu.

¹⁶ Ascacun natian min catiro min caifo aton niaifofo ichanan huahuu. Nan un mia yoia cusca un ato tapimanon. Ato yoitahuun isca huaquin, “Nocon Ifo Diosifin Abraham non Isaac non Jacob nan nocon shunifoan aton Diosiquin. Arus fustifin ua oinmanaquin. Ascashon ua yoiquin isca hua, “ ‘Un min caifo Israelifo oian Egipciofoan ato fasi omitsisca huaiton.

¹⁷ Nan min shunifo inonpacoai cusca un yoiyoni nan omitsiscaifotian un mato Egipcio mai anoshon mai futsa yora futsafo nanno icafo ari un ato iyoi cairan huani. Nan maifin Cananeofo non Hititafo non Amorreofo non Ferezeofo non Heveofo non Jebuseofo nan mai ano icafo. Nanno mai fasi sharacoin. Nanno yonofo foaisharacain tushu sharacoin futsa futsatapafo icain fona ichapa fata sharaforan,’ ” ishon yoini.

¹⁸ Min caifo Israelifoan aton niaifofoan mia nicatirofo. Nan mia nicaifoanno ato fu nan Egipciofo aton niaifocoin ano man catiro uhuun tsain yoishquin. Yoiquin isca huahuu, “Nonfin Hebreofoquin. Nocon Ifo Diosin no fu ica. Ascacun noco nichipun non nunoashu osha rafu non fusti non tsoa istaipama ano catanon. Nannoshon nocon Ifo Diosin non inafo rutushon non ahuun tsain nicayanan non ismasharanon,” ishon nannori yoitacahuun.

¹⁹ Munfin tapian un Egipcio niaifo uhuun curushu ismayamainocai mato nichicaima.

²⁰ Nan un ahuamamishti huai cuscan un ato oinmashquicai. Ascaiton oin uhuunnoashu nan aa non ahuun yorafo omitsiscaifo cuscan. Un ahuun caifofo namashquiai cusca oinquin aton niaifoan mato nichishquin.

²¹ Unfin Egipciofo matohuunoa shinanmasharashquicain. Ascano aton niaifoan ahuun mai arishon mato nichiaitian ahuun yorafoan mato ahuara sharafo inanshquin man fotanon.

²² Ascano nantianri Israeli ainfofoan Egipcio ainfofo chaima icafo iyamarai nan aton pushu muran icafoan aton pui nan oro non cuno sapa facafacaitsa non sahuutifo Israeli ainfofoan ato yocaifotian. Nan sahuuti mato inainfotian maton furonanfacufo yafi mato shotocofacufo man ato sahuumashquin. Man nansca huaquifin man ahuarafo fitiroquin. Nan matohuunoashucai Egipciofo afanan ahuaraiyaimaran, —ishon Diosin yoini.