Éxodo 15 - Sharanahua: Diospan Tsain

Moisés nocon Ifo Diosi fanainshoni cuscan

¹ Natian Moisés fu Israelifo nocon Ifo Diosihuunoa shinansharai cusca fanainquin iscanifo, —Unfin nocon Ifo Diosi fanainsharashonicai. Tsoa futsacai a cuscara sharama. Nantofin nantifi finoncoianquin. Nantifi Egipciofoan aton caballofo non aton taramuti acamaqui tsaoafo unuhuan muran man min asamana.

² Unfin nocon Ifo Dioshuunoa fanainquicain. Nantofin ahuun curushu ua inanfain ua numaquin. Nanfin uhuun upa ahuun Diosiquin. Nanrifin uhuun Diosiriquin. Un ahuunoa yoisharafain un nantifi yoi tsoa futsacai uhuun Diosi cuscarama.

³ Nocon Ifo Diosifin noco cushumisiquin. Futsafoan noco chaca huapaiyaiton nanton ahuun curushhuunshon nocomaquinoa yora chacafo potatiro noco ahuusca huanonfoma. Nanton ahuun anufin Ifo Diosiquin.

⁴ Nan Faraón ahuun taramutiyafo non ahuun ranushumuafo nocon Ifo Diosin ato ununhuan naquishon ato asamanaino Faraón ahuun ranushumuafo nan niaifo patasharinoafori nan fasi tapisharafo nocon Ifo Diosin ato asamanaino man asain futsuafo.

⁵ Ununhuanun man ato fupoa. Ahuun noamuran nan toquiri unu muran pacutiro cusca man nantifi unu noa muran iqui futsuafo ica.

⁶ Ifo Diosin minfin min curushhuunshon min ahuamamishti huatiro cusca man oianfo. Min curushu fasi sharacoin man oianfo. Nan noco noicasmaifo min ato onaintimacoian afanan ninonfoma.

⁷ Min ato yonoa cusca Egipciofoan mia nicacasmamisifo. Ascacun min curushu sharacoinhuunshon min ato nantifi shatumana afanan noco ahuusca huanonfoma. Min atoqui fasi sinaitian nan shachi mutocoin ano yora coatiro cusca min ato namaqui futsa.

⁸ Min ununhuanqui ashaintaquin pashcanan huatanaino nushmancayan mai muto iriscatanaino ocuma rafu ununhuan cuhuiacua nan cunu cuya cuscaran rafu. Nan rafu nantio rafu pashcanantana.

⁹ Nan nocon noicasmaifo Egipciofoan yoiafo isca huaquin, “Non Israelifo mufaintan non atoqui nocoshon non ato mafo fiatan non pashcananon. Nan ayafo cusca ato fiiafain non ato ashifoan rutunon,” ishon yoiafo.

¹⁰ Minfin nocon Ifo Diosiquin min atoqui ashaintanaino unuhuanun ato fupoqui cuyoa. Unuhuan noa muran man iqui futsuafo nan min ato asaquin futsaino.

¹¹ Nan diosiran ishon rami huafocai dioscoinfoma. Afocai mia cuscarafoma. Tsoa futsacai mia cuscarama. Min fusti sharacoin. Mia cuscaracai tsoan oinyomisima. Min ahuamamishti huatiro. Min curushhuunshon ahuara huamisi cusca oinquin, “¡Aira! ¡Oincapon! Diosin acai cusca fasi sharacoinran,” ishon non yoitiro.

¹² Min mucu min atoqui mushaino nan Egipciofo unu muran iquiafo. Ascano min ato nama nai futsuafo.

¹³ Nonfin min yorafoquin. Min noco numa non afanan Egipciofoan aton yonomatifo inonma. Minfin noco nantishotapiquin noipacunacaquin. Minfin noco tapimatiroquin nan non cai cusca. Min curushhuunshon mai sharacoin ano min noco iyoshquin. Nanno min no fu iishquin. Min no fu icaitian shara fustisi non ointiro.

¹⁴ Nan min noco iyoai cusca mani futsafoan nicacani fasi ratucoinshquicani. Filisteofori ratucoinshquicani. Ascashu aton nomuran fasi omitsiscashcani.

¹⁵ Nan Edom ano icafo aton niaifofo fasi ratucoinshquicani. Moabfo aton niaifofori ratucoincani taritari ishquicani. Nan Cananeofori fasi musucani nantian fasi ato fuso pashicoin iishcani.

¹⁶ Ascano fasi ratucoincani. Min curushhuunoa nicacani nantifi manifoti miqui musucoincani. Aicho, Ifo Diosin, min noco ihuia non min yorafo inon. Ascano miqui musuaifoanno non aton mai ano finoaintocai noco ahuusca huashquicanima.

¹⁷ Aicho Ifon, min noco mai sharacoin catonshona non nanno iishquinon. Nanno machifo ano minrifi min noco fu nanno iishquin. Nan mai sharacoin min noco oni huashoni min noco inanno nocona iishquin.

¹⁸ Ifon Diosin minfin nantifi iquipacunacaquin, —ishon Moisés futan Israelifo nocon Ifo Diosi fanainshonifo.

María nocon Ifo Diosi fanainshoni cuscan

¹⁹ Ascano Israelifoan ununhuan pocufainnifo nocon Ifo Diosin yonoa cuscan mai mutotanaino nantifiton pocufainnifo. Ascano Faraón ahuun caballofo non ahuun taramutifo non ahuun ranushumua nan taramutifo muran fomisifo Israeli cachori pocufaipaiyaifoan nocon Ifo Diosin yonoa cuscan ato unuhuanun fupoqui futsaino asain futsunifo.

²⁰ Ascano nantian Aarón ahuun chipi ahuun anu María nantorifi Diospan tsain ahuun yorafo yoimisi. Arifi Diosiqui fasi unimacoinquin ahuun manuti ahuun anu pandereta manuaino nantifi Israelifo ainfofoan a futan aton manutifo manuaino nantifi mononifo.

²¹ Ascano María fanainquin iscani, —Nocon Ifo Diosin min nantifi finoncoian. Tsoa futsacai mia cuscarama. Egipciofo yafi aton caballofo unuhuan muran min ato potaino nantifi asain futsuafo. Nocon Ifo Diosin minfin noco numaquin, —icashu María fanainni.

Unu mocacoin ano noconifo

²² Ascano Moisés ahuun caifo nan Israelifo ununhuan ahuun anu oshin anoashu tsoa istaipama ano ahuun anu Shur ano ato iyoni. Nanno osha rafu non fusti foanfafainfiacaquicai tsoan anoa unu fuchinima.

²³ Nan mai ahuun anu Mara ano nocoshon unu fuchifiafo fasi mocacoin ini. Tsoancai ayatiro inima. Ascashon nan mai anunifo Mara. Onicoinnin tsainman mocacoinran ishon anunifo.

²⁴ Ascano nantifi Israelifo Moisésqui fasi sinacoincaquin aqui tsain chipunifo. Ascashon yoinifo, —¿Natianmun non raquia unu ayaicain? —huanifo.

²⁵ Nantian Moisés nocon Ifo Diosi cufinquin isca huani, —¿Ifon, unmain ahuusca huatiroquin? Ua tapimahuun uhuun caifoan unu ayanonfo, —ishon nannori cufiainno. Nantian Diosin Moisés ihui poyan ismani. —Nan fishon unu muran potaino unucai afanan moca itamarocon fata sharacoin ishquiran, —ishon nocon Ifo Diosin yoini. Diosin yoia cuscan Moisés ihui poyan unu muran potaino unu fianananriscatani afanancai moca inima. Ascano nannoshon nocon Ifo Diosin Israelifo yoiquin isca huani ahuun tsainmain nicacanicain oinshquin nannori ato tapimani,

²⁶ —Nan un mato yonoai cuscan ua man nicasharaitocai un mato nan Egipciofo pau futsa futsatapafo fuchimamisi cuscacai nan pau man fuchishquima. Unfin maton Ifoquin. Un mato caya huamashquiran, —ishon nocon Ifo Diosin Israelifo yoini.

²⁷ Ascano focani nan mai ahuun anu Elim ano noconifo. Nanno pozomua mucu rafuti nushman cayanoati ini. Ascano setenta shufofo nannori nia ini. Nantian nanno unu cusumunri Israelifo iyonifo.