Éxodo 1 - Sharanahua: Diospan Tsain

Israelifo Egipto anoashu omitsiscani cuscan

¹ Ascan nan nocofunu Jacob ahuun anu futsa Israel ahuun facufo non aton yorafoya Egipto ano fonifo. Ahuun facufoan ato anufo un mato yoipacunon.

² Futsan Rubén non Simeón non Leví non Judá non

³ Isacar non Zabulón non Benjamín non

⁴ Dan non Neftalí non Gad non Aser.

⁵ Nantifi Jacob ahuun funafo setenta a fu Egipto mai ano fonifo. Egipto ano nocoataima ahuun facu futsan ahuun anu José, nannoshon ato manani.

⁶ Ascano José, yafi ahuun ochifo non ahuun ushtori nantifi ahuun caifo a fu iyopaonifo nantifi nai futsunifo.

⁷ Ascafiani aton funafo ichaparasi cainnifo. Egipto mai anoafo Israelifo ichapacoin ipaonifo.

⁸ Ascan chipo Egipcio niaifo futsan. José Egipciofo shara huapaoni cuscacai nan niaifo futsan anori shinannima.

⁹ Ascashon ahuun caifo yoini isca huaquin, —Ua nica sharacahuun. Nan Israelifo fasi ichapacoin caianfo. Ascaracai sharama. Noco finontiro. Fasi musucoin.

¹⁰ Non natian shinanon ahuuscashomain non ato finontiroquin. Non ato finonyamaino noco chaca huatirofo. Nan noicasmaifoan aton ranushumuafoan noco rutuaifoanno nan Israelifoan ato futan noco rutufaini nocon mai anoashu fotiroforan, —ishon niaifoan ato yoini.

¹¹ Nannori niaifo ato yoiaiton nicacatan Egipciofoan Israelifo yononi aton yonomatifo inon. Ascashon ato curushcain yonomanifo. Pitón mai anoa yafi Ramsés mai ano pushu rasi ato huashononfo. Nan pushu rasifo ano Egipciofoan ato tushufo mucushonifo.

^12-13 Egipciofoan ato curushcain yonomaitian nan shafatifi Israelifoan aton facufo ichapa rasi cainifoanno. Ascano Egipciofo atoqui musunifo. Ascashon curushcaincoin ato yononifo.

¹⁴ Nan ladrillofo mai yafi foi osia ato oni huashofain aton mau ano ato curushcain yonomanifo. Ascano fasi omitsiscanifo.

¹⁵ Nan Israelifo aton anu futsa Hebreofo. Nan Hebreo ainfo rafu aton anu Sifra yafi Fúa. Nan rafutan aton caifo ainfofo aton facu cainyaintian ato cushushonifo. Ascashon nantia Egipcio niaifoan nan ainfo rafu yononi isca huaquin,

¹⁶ —Maton caifo Hebreo ainfofo aton facufo cainyaintian man ato cushutiro shotocofacu caianshu nitiro. Ascan furonanfacu caincun ato rutucahuun, —ishon niaifoan ato yononi.

¹⁷ Nannori ato yoifia nan rafutan Upa Diosi icoinra huacashon ahuun tsain fusti tanasharacoincashon. Ato niaifoan yonoa cuscacai anori shinanpainifoma. Tsoancai furonanfacu caincun rutupainifoma ninonfo ishon.

¹⁸ Nan niaifoan nicaitian ato cunani yocashquin. —Un mato yonoa cuscan man huama. ¿Ahuuscai man furonanfacufo man rutuamamun nanonfo? —ishon niaifoan ato yocani.

¹⁹ Ascashon nan ainfo rafutan niaifo cumani, —Niaifon, Faraón, nan Hebreo ainfofocai min caifo ainfofo cuscarafoma. Nocon caifo ainfofoan fasi curushcain yonomisifo. Ascan non atoqui nocoataima aton facufo cainriscaniran, —ishon Sifra futan Fúa nannori niaifo yoinifo.

²⁰ Nannori yoiaifotian Diosin ato shara huani. Ascano aton caifofo Israelifo paratama cainnifo.

²¹ Aton caifofo facu cainyaintian aton cushumisifo Sifra yafi Fúa Diosi icoinra huafoan Diosin shara huaquin atorifi facu inan arifi facuyanonfo.

²² Ascashon Egipciofoan aton niaifoan Faraón nantifi ahuun caifofo ato yononi isca huaquin, —Hebreofo aton facu furonanfacufo rama cainyaifo ato unu Nilo muran potacahuun asanonfo. Ascan shotocofacufo unu muran potayamacahuun ninonfo, —ishon ato niaifo Faraón yononi.