Daniel 4 - Sharanahua: Diospan Tsain

Niaifo Nabucodonosor niso iyopaoni

¹ Ascan niaifo Nabucodonosor mani futsafo non caifo futsafo tsain futsa futsatapayafo mai futsanoafo aton ahuun tsain fomani isca huaquin, —Unfin maton niaifoquin Nabucodonosor un mato cunu fomai man tapinon. ¡Man isharapainon!

² Diosin nantifi finoncoian. Ua ahuamamishti ashoshara cuscan tsoan oinyomisima cuscaran ua ashoa un mato tapimashquin.

³ Nantofin tsoan atiroma cuscaran shara huafain tsoan oinyomisima cuscaran ahuun curushhuunshon atiroquin. Nancai niaifo iquin unupacunacama. Manifoti faritifi ato iquinpacunaca.

⁴ Unquian Nabucodonosor un niaifoatian un pushu muran isharacoinpaoni. Uncai ahua yopapaonima. Natian un unimacoinni.

⁵ Ascafia yamu futsa uhuun namapan ua ratucoinni. Uhuun oshati anoshon un namaquin oian cuscan ua ratucoiaino un fasi ratui tari tari ini.

⁶ Ascacun nantifi nocofunufo mapo sharaya un cuna un nama cusca ua tapimanonfo.

⁷ Rato futsafoan atiroma cuscan huamisifo uqui fuafo shointiafo uqui fuaifono fishifo oincashon ahuara chipo iishquiai cuscan yoimisifori uqui fuafono inon pacoai cuscan yoimisifori uqui fuafo. Un nama cuscan un ato yoifiaitocai ua tapimapaifiaquicai tsoan ua tapimatiroma.

⁸ Daniel ipaitama uqui oshon un nama cuscan ua tapimani. (Daniel ahuun anu futsa Beltsasar. Nannori uhuun diosi ahuun anu. Diosfo shara aton yoshin Daniel ahuun nomuran nanua. Ascacun anu tuqui huani Beltsasar.)

⁹ Mun yoini isca huaquin, “Beltsasar, tsoan futsa atiroma cuscan huamisifofia min nantifi ato finoncoian. Mun tapia diosfo shara aton yoshin min nomuran ica. Tsoan ahuara futsahuunoa tapiafoma cuscan minfin tapitiroquin ua yoishquin. Ascan un nama cuscan ua tapimahuu.

¹⁰ Uhuun oshati camaqui racashon un isca huaquin nama: “Mun oian mai nushmancayan ihui uhuapacoin nia ini.

¹¹ Nan ihui cuyacoin foaicashu mutsisipacoin icain nai ari nocoqui rashquia ointsa un oian maifoti anoshon ointirofo.

¹² “Ahuun puifo shonan sharamishti icain ahuun fimi ichapacoin nantifi manifotiton pinifo. Yoinafoan ahuun poyan naman fuofafaincashon fari otanifo. Puiyafoanri ahuu poyanfohuun naa huaaqui futsanifo.

¹³ “Ascan un racanoshon uhuun namapan un oian nai muran Dios icanoshon ahuun oinmati sharahuunshon ua tsain fuma.

¹⁴ Nanton oi ashcafinin yoini isca huaquin, “ ‘Nan ihui rurahuu. Ahuun poyanfo poshtufain focu focu ahuun. Ahuun pui nantifi niricaino ahuun fimifori arasiqui futsaino yoinafori naman fuofafainafo ato ichofain puiyafo ihui poyanhuun noyamahuu.

¹⁵ Ascan ahuun foro rurayamafain ahuun tapori shatuyamahuu. Nan rafuqui cadena hierro yafi bronce osiaton nushua ahuun foro naman fasifoan tarati huayacuni. Ascacun afanan cushuyamahuu. Nai muranshon niifipan muchana huaiquin. Nan yoinafo ica cuscan chacafo foaicafo muran ishquiquin.

¹⁶ “ ‘Nanno ishon nan nocofunun ahuun nomuranshon shinan futsani afanan yorafoan shinain cuscan shinantama nan yoinafoan shinain cuscan siete fari nanscara shinanshquin.

¹⁷ “ ‘Nannori Diosin tsain fomisi sharafoan yoiaifo cuscan nanscaracoin iishquin. Ascaiton nicacaquin manifotiton tapitirofo Ifo Diosin nantifi finonshon manifoti ato iquinin. Nan fustitofin tsoa niaifo imapaiquin imatiroquin. Diosin nocofunu ahuamari niaifo imapaiquin imatiroran,’ ishon ua yoia.

¹⁸ “Unfin, Nabucodonosorquin, nan Babilonia ano icafoan aton niaifofin unquin. Uhuun namapafin un nanscara oianquin. Uhuun caifo fusti rasiton tapisharafo cuscan un nama cuscacai tsoan ua tapimatiroma. Nan tapi sharaton ua yoitiroyamafia Beltsasar minfin ua tapimatiroquin. Diosin sharapan ahuun Yoshin min nomuran icano min ua tapimatiroran,” —ishon niaifo Nabucodonosor Daniel yoini.

¹⁹ Nan Daniel ahuun anu futsa Beltsasar niaifoan nama cusca shinainno fasi mustairitan ratucoinquin niaifoan yoini isca huaquin, —Beltsasar, uhuun namapan ua yoia cuscahuunoa ratuquima ua tapimahuu, —ishon yoiaiton cumaquin isca huani. —¡Ohuashta, niaifo! Min nama cusca mihuunoa yoitamarocon mia noicasmaifohuunoa min yoia shara icuana.

²⁰ Nan min ihui uhuapacoin oian mutsisipacoin cuyacoinmasoa nai ari nococuana.

²¹ Ahuun puifo sharashtacoin icaino ahuun fimi ichapacoin nantifiton ahuun fimi pitirofo. Ahuun pui oti muranshon yoinafoan tunuaifoanno puiyafoan ahuun ponyafohuun naa huatiro.

²² Niaifon, minfin na ihui cuscaraquin. Min nantifi finoncoian. Rato niaifo futsacai mia cuscarama. Min nantifi manifoti min ato iquina. Min nantifi finoan cuscan nai muran icafoanri ointirofo. Min icano yafi chaicunoafo mani futsafoanrifi min aton niaifoquin.

²³ Niaifon, min oian Diosin tsain fomisi fustiton ahua chaca huamisima nai murannoashu fotoshon yoiquin isca hua, “Na ihui rurahuu chapopacuashu cuyonon. Ascan ahuun foro muyamafain ahuun tapori muyamacahuun. Fasi fununun foaicano ahuun tapoqui cuno hierro yafi broncehuunoa foro nushacahuun. Ahuun tapo nanno mai muran iquiquin. Ascaino nai muranshon nifipan fasi niaifo muchana huaiquin. Yoinafo chifi ica cuscari anon. Siete fari nanscasi ai.”

²⁴ Niaifon, min namapan un mia tapimana cuscan nannoricoin. Ifo Diosi nantifi finoncoinshon nan yonoa cuscan ashquin,

²⁵ Mia yorafomaquishon cainmanano min yoinafo fu iyoshquin. Moifoan fasi piaifo cuscan mirifi min ato futan siete fari fasi piishquin. Nai muranshon nifipan mia muchana huashquin. Ascan sieite fari finoanno min yoishquin isca huaquin, “Nan Ifo Diosin nai muran icaton nantifi finoncoian. Nantifi manifoti ato iquina. Manifoti anoafo ratora futsa Ifo Diosin ato murannoa niaifo imapaiquin nan imashquin.”

²⁶ Nan min namapan min oian cuscan ihui ahuun foro yafi ahuun tapofo nituan cuscan. Nanhuunshon Diosin mia tapimapai min yoiquin isca huanon, “Ifo Diosin nai muran icaton nantifi manifoti ato iquinaran,” ishon min yoiafin afanan min niaifocoin iishquicain. Manifoti min ato iquishquin.

²⁷ Niaifon, un mia yoiai cuscan ua nicasharapun. Min chaca huamisi cusca shatuhuu. Nantifi yorafo shara huatan omitsiscaifo atohuun ramapaihuu. Min asca huaquifin min namapan yoia cuscan huayamaraquin Diosicai mia shatumashquima min niaifo inon, —ishon Daniel niaifo yoini.

²⁸ Ascan nan niaifo Nabucodonosor namani cuscan nanscacoin aani.

²⁹ Fari fusti finoanno Babilonia ano niaifo Nabucodonosor ahuun pushu fomancaya sapa camaquishon cahuaquin.

³⁰ Fomancayashon pushu rasi oinquin yoini isca huaquin, —¡Aicho! Unfin nan pushu rasi Babilonia anoa acaquin nanno niaifo inon. Unfin uhuun curushhuunshon acaquin nuno ishquin. Nantifiton oincaquifin tapitirofoquin unmain ahuamamishti huatirocun, —ishon yoini.

³¹ Nannori yoitapaiyaino samamashta nai murannoa tsain nicaquin isca huani, —Niaifon Nabucodonosor, ua nicasharahuu. Min afanan nunoa niaifoma. Mincai afanan nunoa tsoa yonotiroma.

³² Yorafoan min pushu muranshon mia nichicani afanan yorafo fu itamarocon min fasi fununun cai yoinafo icano. Nan moifoan fasi pitiro cuscan min nansca huai. Siete fari finontan min yoishquin isca huaquin, “Ifo Diosin nantifi finoncoian. Nantofin nantifi manifoti ato iquinanquin. Nantofin ratoran yora niaifo imapaiquin imatiroquin,” ishon min yoicairan, —ishon nai murannoa Nabucodonosor oi nicani.

³³ Ascaino nan Nabucodonosorhuunoa yoini cuscan ariscatani. Ahuun yorafo muranshon potani. Nan moipan fasi pimisi cuscan arifi fasi pini. Chifi icano nifin aqui icaino fasi muchacoin ini. Ascatari ahuun foo chainipacoin ini. Ahuun mutsisiri nan tutupan mutsisi cuscaran chaicoin ini.

Niaifo Nabucodonosor caini cuscan afanan nisononma

³⁴ Ascan siete fari finontanaino Nabucodonosor yoini isca huaquin, —Unfin Nabucodonosor un Diosi icari nai muran foisicai un afanan niso itamarocon cayacafi un afanan shinanni. Un Diosi cufini isca huaquin, “Diosin min fasi nantifi finoncoian. Min fasi sharacoin nipanaca. Tsoa futsacai mia cuscarama,” ishon un cufini. Nan Diosifin nantifi yorafo iquipacunacaquin. Nan manifotiton aton niaifo faritifi ipanaca.

³⁵ Nantofin nantifi yorafo finoncoianquin. Nan manifoticai ahuuna ahuama. Nantifi nai murannoafo a fu icafo non mai ano icafori Ifo Diosin ato amapaiyai cuscan atiroquin. Nanto apaiyai cuscancai tsoan ahua shatumatiroma. Tsoancai yoitiroma isca huaquin, “¿Ahuuscai min asca huaimun?” ishoncai tsoan yoitiroma.

³⁶ Ascan un afanan niso inonma Diosin ua afanan cayacafi shinanmariscatana. Nantianri ua afanan niaifo imani. Uhuunoa yoisharafain nantifi sharacapacoin inanfain un manifoti afanan ato iquina. Uhuun oinmatifo nan niaifo patasharinoafo ua tsain cayacafi shinanmacani uqui afanan fuaifono un ato niaifo ica. Un niaifoshon nantifi finoncoinpaoni cuscan natian mimacai huaquin un nantifi ato finoncoinshon ato iquina.

³⁷ Ascan uquian Nabucodonosor un Ifo Diosihuunoa yoisharai. Nanfin nai muran icaquin niaifoquin. Nantifi nanton aca cuscan cayacafi shara huafain yorafori ashomisi cuscan cayacafi shara huamisi. Ascacun nantifi ahuunoa ifo huacahuun. Tsoa futsacai a cuscara sharama. Nantofin nantifi finoncoianquin. Ratomain cacapaimisishon yoiquin isca huaicain, “Unfin sharaquin. Un apaiyai cuscan fusti huatiroquin,” ishon yoiaiton Ifo Diosin na cuscara unumatiro afanan min ahuamaran ishon tapimatiroran, —niaifo Nabucodonosor yoini.