Daniel 10 - Sharanahua: Diospan Tsain

Daniel ahuun namapan nocofunu ointsa oinni

¹ Ascan Persia mai anoafoan aton niaifo ahuun anu Ciro. Fari rafu non fusti finoan aton niaifo imisi. Nantianri Ifo Diosin ahuara tsoa oinyomisima Daniel (nan ahuun anu futsa Beltsasar) oinmani. Ifo Diosin Daniel oinmani chipo ishqui ai cuscan iconcoin. Caifo futsafo afo ranan rutunanshquiaihuunoa ua yoini. Ifo Diosin Daniel yoipaiyai cuscan namai cuscarahuunshon tapimani.

² Unquian Daniel rafu non fusti semanan un fasi shinanmitsacoin.

³ Tushu fatan sharacoinfiacucai un piyonima. Namiricai un piyonima. Fimi ahuun anu uva ahuun unuricai un ayayonima. Shuni ahuun inin sharacoinfiacucai nan semanan rafu non fusti un ahuun raishicama.

^4-5 Nan oshu taui osha veinticuatro un unu uhuapa ahuun anu Tigris cusumunri niishon mun oian ua chaimashta nocofunun nia. Ahuun sahuuti pano ahuun anu lino sahuufain ahuun nanushumutiri oro sharashtacoin sahuua un oinni.

⁶ Ahuun caya facafacaitsa nan toquiri ahuun anu topacio ointsa sharashtacoin icain nan ahuun fuso cana facaica ointsa icain ahuun furori nan faro ointsa icain ahuun fitash rafuri non ahuun poyan rafuri facafacaitsa nan cuno bronce ointsafo. Ahuun oi nan yoranhuarasi tsainquin nicatsa un nicani.

⁷ Urus fusti nan namapan cuscarahuunoa un oinni. Nan nocofunufoan u fu ifiashocai tsoan oinnifoma. Nanscai ratucoincani ichonifo onushcaquin.

⁸ Ascan urus fusti nan namatiro cuscan un oinni. Ascan un samamashta shaca fuai mutsa un muni. Uhuun fusori fasi pashicoin ini. Uncai ahuara huatiro un munima fasi pachicoin un muni.

⁹ Un nanscaran muaino nan nocofunun ointsaton ua yoiaiton un nicain un nayoni un maiqui fupupacucahuani.

¹⁰ Ascan ahuun mucupan ua muuquin ua ocuma rafu mupashucashu ua ratoconun tsaonmatan un taritariquin.

¹¹ Ua yoiquin isca huani, —Daniel, Ifo Diosin mihuunoa fasi shinansharamisi. Natian funihuu. Un mia yoiai cuscan nicasharahuu. Ifo Diosin ua miqui nichia un mia yoinon, —ishon ua yoini. Ascashon ua yoiaino un tari tariquin funinacahuani.

¹² Ascatan ua yoiquin isca huani, —Daniel, ratuyamahuu. Tau huaquin min Diosi cufini isca huaquin, “Upa Diosin, un tapiama cuscan ua tapimahuu. Un non uhuun yorafoan mia chaca huamisi cuscan nocon rau huapun,” ishon min anori cufiaiton nocon Ifo Diosin mia nica. Ascan nocon Ifo Diosifin ua miqui nichiaquin.

¹³ Ascan un oaiton yoshin chacafoan aton niaifo Persia mai ano yonomisiton ua veintiun osha ua nitu hua. Ascan Ifo Diosin ahuun oinmati futsan nai muran a fu icaton ahuun anu Miguel uqui nichia. Nanton Diosi oinmati futsafo nan nai muran icafo aton niaifo. Nanton u futan acaino afanan nan yoshin chacanun ua nitun huama.

¹⁴ Ascan natian un miqui nocoa ahuarafo ishquiai cuscan mia tapimashquin. Min namapan oiain cuscan chipo ishquiran, —ishon ua yoini.

¹⁵ Ua nannori yoiaino un maiqui fupuashu un puusicama.

¹⁶ Ascan na nocofunun ointsaton uhuun ashfa ua muaino un afanan tsainca. Nan nocofunun ointsa un yoia isca huaquin, —Uhuun niaifon, uhuun namapan un oian cuscan. Nanscara oin un fasi ratucoin. Un shaca fuai mutsai.

¹⁷ ¿Uhuun niaifon, ahuuscashumun un mi fu tsaintiroquin? Un fasi shaca fuai mutsai. Uncai shacainacahuansharatiromaran, —ishon un yoia.

¹⁸ Un nannori yoiaiton nan nocofunun ointsaton ua muuaino un afanan mutsisinacahuana.

¹⁹ Ua yoia isca huaquin, —Ratuyamahuu. Diosin mihuunoa fasi shinansharaiquin. Natian min nomuran shinansharahuu. Ahuarahuunoa shinain ratuyamahuu, —ishon ua yoia. Ua anori huaino un mua uncai afanan shaca fuai mutsa aima. Un muuquin shara huaquin un yoia isca huaquin, —Uhuun niaifon, mian mutsismana. Ascan mian yoipaiyai cuscan ua yoihuu, —ishon un cuma.

²⁰ Un asca huaiton ua yoiquin isca hua, —¿Man min tapiamun ahuuscai un miqui oaquin? Un samamashta afanan nasoshquin. Nan yoshin chaca Persia mai anoa yonomisi fu nanfin afanan u fu asca huatananshquiquin. Chipo yoshin chaca niaifo futsa Grecia mai anoa yonomisi nanrifi u fu asca huatananshquiquin.

²¹ Ascan un ato ano cataima nan Diosin cunuquin iconcoin cununi cuscan un mia tapimayoi. Nan yoshin chaca niaifofo ua asca huapaiyaifoan. Nan Miguel Diospan oinmati a fu nai muran imisiton nan fustiton u futan nan yoshin chaca niaifofo asca huashquin,