1 Samuel 18 - Sharanahua: Diospan Tsain

David yafi Jonatán iconcoin fusti yoiafo cuscan nanscasi ai noinanpacunacafo

¹ Ascan David yafi Saúl yoinonain unucatan Saúl furun Jonatán Davidqui oni. Ascatan a fu tsaintan samamashta noicoiacufoanni. Afiri noimua cuscari David fasi ahuun noicoinpaoni.

² Ascan nantian Saúl yononi cuscan David afanan apan pushu ano nasotama Saúl pushu ano ipaoni.

³ Ascan Jonatán fasi David noicoinquin yoini isca huaquin, —David, un mia fasi noi. Un mi fu rafupacushquin. Un mia potapacunacamaran, —ishon Jonatán David yoiyoni.

⁴ Nannori yoiaiton Jonatán ahuun sahuutifo inanfain ahuun nopu yafi piacati inanfain ahuun nanushumutiri David inanni nan ahuun noiyai cuscan ismashquin.

⁵ Ascan nantifi Saúl yonoa cuscan David nanscacoin huashoaiton oin Saúl aqui unimaquin yoini, —Natian min ranushumuafoan aton niaifo patasharinoa min iquiran, —ishon yoini. Saúl David niaifo hua oincani nantifi Israelifo unimanifo. Ascanori ranushumuafoan niaifofori unimani.

Nantifi Israelifoan David fuchipaicoiainfoan oin Saúl David shutipaipaoni noicasmaquin

⁶ Ascan David nan Filisteo Goliat rutuano Israeli ranushumuafo aton pushu ano nasonifo. Pushu rasi anoafo Israeli ainfofo fai cusumunrinoashu fanainyanan manutifo manunifo. Nan manutifo ahuun anu pandero non platillo manuyanan unimacani mononifo.

⁷ Ascan monocai fanainyanan iscanifo fanaincani, —Saúl mil nocofunufo rutufiano David paratama diez mil rutuaran, —icashu ainfofo fanaincaifoan.

⁸ Nan nicain Saúl ahuun nomuran Davidqui shinanchacai. Fasi sinacoinquin yoini isca huaquin, —David paratama diez mil rutuano ainfofo fanaincani. Asca uhuunoa fanaincaquin mil fusti rutuaran icashu fanaincani. Ascano samamashta David aton niaifo imapaitiroforan, —ishon Saúl ahuun nomuran shinanni.

⁹ Ascashon nan shinanquin Saúl Davidhuunoa shinanchacapaoni. —Ascacun un David oinfafainshquin niaifo inonma, —ishon Saúl shinanpaoni. Saúl fasi shutimitsapaimisicoin ipaoni.

^10-11 Iyoconaino nocon Ifo Diosin Saúl afanan shinansharayamaiton oinquin yoshin chaca Saulqui nocoaitocai Diosin afanan nitu huanima. Ascan nan yoshin chacanun Saúl omitsiscamani. Nan yoshin chacahuunoashu Saúl tsain isininpaton nan nisofoan yoiaifo cuscan yoini. Nantianri David fuyamisi cuscan ahuun manuti Saúl manushoni. Ascan Saúl ahuun ashi tsomashon David rutupaifiaqui David ichoacuncahuanaiton canuni. Pushu cunuacua ahuun ashin tsacani. Saúl ahuun nomuran shinanquin isca huani, —Un natian uhuun ashin David tsacaquin nasharafain cunuqui tsacamai naanon, —ishon shinanni. Ichoacuncahuanaiton canuni. Ascahuatan afanan nanscari huaquin Saúl ahuun ashin David rutupaiquin canuni.

¹² Ascan nocon Ifo Diosin afanan Saúl fu itama David fu ini. Ascashu Saúl Davidqui ratuni.

¹³ Ascashon Saúl yonoa cuscan David afanan a fu itiro inima. Nan a fu ahuun pushu ano itama mil ranushumuafo aton niaifo ini. David ranushumuafo aton niaifo sharacoincun ahuun ranushumuafo iyoni nan noicasmaifo ato potanon.

¹⁴ Nocon Ifo Diosin a fu rafuaitian nantifi David acai cuscan shara ipaoni.

¹⁵ Saúl oinni nocon Ifo Dioshuunshon David aca cuscan nantifi shara huaiton oin fasi aqui ratuni.

¹⁶ David ranushumuafoan aton niaifo shara ini. Ascashon ato tapimani nan noicasmaifoan ahuusca huanonfoma. Ascainori nantifi Israelifo non Judáfoanri fasi David fuchipainifo.

¹⁷ Ascan shafa futsa Saúl David yoini isca huaquin, —Caifo futsafoan nocon Ifo Diosi nicacasmafo. Nanscacun nocon Ifo Diosin ato cuyoshquiai cuscan min ahuunoashu ratushquima nocon ranushumuafo min iyotiro nocon noicasmaifo rutunon. Min asca huaiton oinquin uhuun ainfacu iyoa mia inantiro min ahuin inon. Ahuun anu Merab, —ishon Saúl David yoini. Saúl ahuun nomuran shinanquin isca huani, —Uncai David rutuima. Filisteofo fu rutunancaquin nanfoan David rutucaniran, —ishon shinanni.

¹⁸ Ascaiton David cumani isca huaquin, —Niaifon, ucai ahuama. Uhuun upa non uhuun yoraforicai min ahuama. ¿Ascan ahuuscashuco un min raisi itiromun? —ishon David Saúl yoini.

¹⁹ Ascafiacai Saúl David yoini cuscan huanima. Ahuun facu ainfo Merab David inantama nan nocofunu futsan ahuun anu Adriel inanni ahuun ahuin inon. Nan Adriel ahuun mai ahuun anu Mehola ini.

²⁰ Ascafia Saúl ainfacu futsa ahuun anu Mical fasi David noicoiaiton futsan Saúl tapimanaino fasi unimani.

²¹ Ahuun nomuran shinanni isca huaquin, —¡Aicho! Un David yoishquin uhuun facu fu fiananon. Ascan fiananfotaima un afanan David rutunainfo ano un nichishquin Filisteofoan nan rutunonfo, —ishon shinanni. Nannori shinanfiashon Saúl David yoini isca huaquin, —Afanan un shinan futsa min uhuun raisi iishquiran, —ishon Saúl David yoini.

²² Ascatan Saúl ahuun oinmatifo yoini isca huaquin, —David yoihuu, “Nocon niaifo Saúl mia fasi fuchipaiquin. Ahuun oinmatifoanri mia fasi fuchipaiquin. Ascan mia fuchipaiquin ahuun facu fihuun ahuun raisi iishquin,” ishon yoitacahuun, —Saúl ato yoini.

²³ Ascan Saúl ato yoini cuscan nannori David yoinifo. Ascaiton David cumani, —Un ahuuomacain uricai ahuama. ¿Ascan ahuuscashumun un niaifo Saúl ahuun raisi itiroquin? —ishon David cumani.

²⁴ Ascan David cumai cuscan nan ahuun oinmatifo Saulqui chaninifo.

²⁵ Nicashon Saúl ato yoini isca huaquin, —David yoihuun isca huaquin, “Nan cien Filisteofo min rutuafin min uhuun facu fitiroquin. Nan ua noicasmaifofin un copiquin ato rutupaicain,” —ishon Saúl ato yoini. Ascafiashon ahuun nomuran shinan futsani. —David cien Filisteofo rutupaiyaino nanfoancaifin David rutushquicaniquin, —ishon ahuun nomuran shinanni.

^26-27 Ascan niaifo Saúl ato yononi cuscan nicai David fasi unimaquin shinanni isca huaquin, —¡Aicho! Natian un niaifo Saúl ahuun raisi itiroran, —ishon shinanni. Ascan Saúl ainfacu inantaima ahuun ranushumuafo futan David dos cientos Filisteofo rutunifo. Ascan Saúl yoca cuscan David dos cientos Filisteofo rutushon ismani. Ascashon Saúl ahuun facu Mical David inanni afu fiananon.

^28-29 Ascano nocon Ifo Diosin David fu rafucoiaino ahuun facu Mical David noicoiyain cuscan Saúl tapiquin finacoianshu aqui musuni. Ascan nan a fu iqui tauaitian nantian yafi nan naitian Saúl David noicasmapaoni.

³⁰ Ascatari David nantifi Israelifoan ato ranushumua niaifofo finoncoian. Nanfoan noicasmacaquin rutunifo cuscan David paratama rutuni. Ascashon nantifi ahuun caifo Israelifoan Davidhuunoa nicasharafain ahuunoa shinansharanifo.