Osea 1 - Mbivilia

Kĩveti ĩlwaya kya Osea na syana syakyo

¹ Ndeto ya Yeova ĩla yamũkĩe Osea mwana wa Veeli, mĩthenya ya Usia, na Yothamu, na Aasu, na Esekia, asumbĩ ma Yuta, na mĩthenya ya Yelovoamu mwana wa Yoasi, mũsumbĩ wa Isilaeli.

² Yĩla Yeova waneenie ĩ ya mbee na kanyw’a wa Osea, Yeova amwĩa Osea, Enda, wĩtwaĩe kĩveti ĩlwaya na syana sya ũmalwaya; nũndũ ĩ nthĩ nĩyĩkaa ũmalwaya mũno, ĩkĩmũtia Yeova.

³ Na ĩndĩ aenda na atwaa Ngomeli mwĩĩtu wa Ndivilaimu; nake aitava, na amũsyaĩa mwana.

⁴ Na Yeova amwĩa, Mwĩte syĩtwa yake Yesileeli; nũndũ no vandũ vanini, na ngaĩvanĩsya nthakame ya Yesileeli nyũmbanĩ ya Yeu, na ngatuma ũsumbĩ wa nyũmba ya Isilaeli ũthela.

⁵ Na kũkeethĩwa mũthenya ũsu, ngatũlĩla ũta wa Isilaeli mwandanĩ wa Yesileeli.

⁶ Na aitava ĩngĩ, na asyaa mwĩĩtu. Na Yeova amwĩa, Mwĩte syĩtwa yake Lo‐luama; nũndũ ndikambĩla kwĩw’ĩa nyũmba ya Isilaeli tei ĩngĩ, nĩmaekee kwondũ wa ũndũ o na wĩva.

⁷ Ĩndĩ ngeew’ĩa nyũmba ya Yuta tei, na ngamatangĩĩa na vinya wa Yeova Ngai woo, na ndikamatangĩĩa na ũta, kana ũvyũ, kana kaũ, kana mbalasi, kana ala matũlĩte mbalasi.

⁸ Na ĩndĩ yĩla wamũaĩisye Lo‐luama, aitava na asyaa mwana.

⁹ Na Yeova asya, Mwĩte syĩtwa yake Lo‐amimi; nũndũ inyw’ĩ mũti andũ makwa, na ndikethĩwa Ngai wenyu.

¹⁰ Ĩndĩ ũtalo wa ana ma Isilaeli ũkeethĩwa ta kĩthangathĩ kya ũkanga, kĩla kĩtathimĩka kana kũtalĩka; na kũkeethĩwa vala meeiwe, Mũti andũ makwa, makeewa, Mwĩ ana ma Ngai ũla wĩ thayũ.

¹¹ Na ana ma Yuta na ana ma Isilaeli makoombanw’a vamwe, na makeeyiĩa mũtongoi ũmwe, na makambata kuma nthĩ ĩsu; nũndũ mũthenya wa Yesileeli ũkeethĩwa mũnene.