NDANIELI 1 - Mbivilia

Ũmanyi wa Ndanieli na anyanyae make

¹ Mwaka wa katatũ wa kũsumbĩka kwa Yeoiakimu mũsumbĩ wa Yuta, Nevukatilesa mũsumbĩ wa Mbaviloni nĩwokie Yelusaleme, na amĩthyũlũlũka amĩtw’ĩkanĩsya.

² Na Mwĩaĩi anengane Yeoiakimu mũsumbĩ wa Yuta kw’okonĩ kwake, vamwe na kĩlungu kya mĩio ya nyũmba ya Ngai; nake amĩtwaa nthĩ ya Sinali nyũmbanĩ ya ngai yake: na aete mĩio nyũmbanĩ ya kwia ũthwii ya ngai yake.

³ Na mũsumbĩ amwĩa Asivenasi vwana wa avakũe make, aete ana amwe ma Isilaeli, o ma nzyawa sya kĩũsumbĩ na ma ala anene me ndaĩa;

⁴ imwana ila ite kĩema, ĩndĩ syĩthĩwe na wũmbe mũseo, na ũtũĩka uĩnĩ w’onthe, syĩ na ũmanyi, na kũmanya ũĩ wa wĩmanyĩso, na ila itonya kũũngama nyũmbanĩ nene mbanakavye ya mũsumbĩ; na aimanyĩsye momanyĩsyo na kĩthyomo kya Akalitei.

⁵ Na mũsumbĩ aitw’ĩa lĩu wa kĩla mũthenya wa kya ũya kĩseo kya mũsumbĩ, na mbinyu ĩla wanyusaa we mwene, iĩthw’e myaka ĩtatũ; nĩ kana mũminũkĩlyo wayo iũngame mbee wa mũsumbĩ.

⁶ Na ĩndĩ katĩ wa ii nĩvo syaĩ, sya ana ma Yuta, Ndanieli, na Aanania, na Misaeli, na Asalia.

⁷ Nake mũnene wa avakũe aitw’ĩĩa masyĩtwa: Ndanieli amwĩta syĩtwa yake Mbelitesasa; na Aanania, Satalaki; na Misaeli, Mesaki; na Asalia, Aveti‐neko.

⁸ Ĩndĩ Ndanieli nĩwetw’ĩĩe ngoonĩ yake kana ndakevukya na kĩla kya ũya kĩseo kya mũsumbĩ, kana na ĩla mbinyu ũnyusaa: kwondũ wa ũu avoya ũla mũnene wa avakũe ndakevukye.

⁹ Na ĩndĩ Ngai anenga Ndanieli kwona ũseo na ĩnee kwa mũnene wa avakũe.

¹⁰ Na mũnene wa avakũe amwĩa Ndanieli, Nĩngũkĩa mwĩaĩi wakwa mũsumbĩ, ũla wamũtw’ĩe lĩu wenyu na kya ũnyw’a kyenyu: nũndũ nĩkĩ wĩona mothyũ menyu mate maseo ta mothyũ ma imwana sya nthuke ĩmwe nenyu? Nĩvo mwĩĩkĩa mũtwe wakwa mũisyonĩ vala ve mũsumbĩ.

¹¹ Na ĩndĩ Ndanieli amwĩa mũsyaĩĩsya ũla waiĩtwe nĩ mũnene wa avakũe ĩũlũ wa Ndanieli, na Aanania, na Misaeli, na Asalia:

¹² Nĩngũkwĩsũva, tũtate ithyĩ athũkũmi maku matukũ ĩkũmi; na nĩmatũnenge isyo sya kũya, na manzĩ ma ũnyw’a.

¹³ Nĩvo ĩndĩ mothyũ maitũ mesyaĩw’a mbee waku, na mothyũ ma imwana ila iĩsaa kyaũya kĩseo kya mũsumbĩ; naku o ũndũ wĩona, wĩĩka athũkũmi maku ũu.

¹⁴ Na ĩndĩ asyĩthukĩĩsya ũndũnĩ ũsu, na aitata matukũ ĩkũmi.

¹⁵ Na mũminũkĩlyo wa matukũ ĩkũmi mothyũ moo mooneka me maseo, na maĩ anou, kwĩ imwana syonthe ila syaĩsaa kya ũya kĩseo kya mũsumbĩ.

¹⁶ Kwondũ wa ũu mũsyaĩĩsya aveta kya ũya kyoo kĩseo, na mbinyu ya ũnyuwa, na ainenga isyo.

¹⁷ Na ĩndĩ imwana isu inya, Ngai ainenga ũmanyi na ũtũĩka ũmanyĩsyonĩ w’onthe na ũĩnĩ: na Ndanieli aĩ na ũmanyi wa mawoni onthe na ndoto.

¹⁸ Na mũminũkĩlyo wa matukũ ala mũsumbĩ watwie ma kwiete, mũnene wa avakũe aiete vala ve Nevukatilesa.

¹⁹ Na mũsumbĩ aneenan’ya nasyo; na katĩ wa isu syonthe vaiaaoneka ingĩ itilyĩ ta Ndanieli, na Aanania, na Misaeli, na Asalia: na kwondũ wa ũu syaũngama mbee wa mũsumbĩ.

²⁰ Na maũndũnĩ onthe ma ũĩ na ũmanyi, ala mũsumbĩ waikũlilye, asyona ivĩtũkĩte kũndũ ĩkũmi eki ma syama na awe onthe, ala maĩ ũsumbĩnĩ wake w’onthe.

²¹ Na Ndanieli ekala kũvika mwaka wa mbee wa kũsumbĩka kwa mũsumbĩ Kulusi.