MALIKO 1 - Mbivilia

Yoana Mũvatisi na ũtũmane wake

¹ Wambĩlĩlyo wa ũvoo mũseo wa Yesũ Klĩsto, Mwana wa Ngaĩ.

² O tondũ kũandĩkĩte ĩvukunĩ ya mwathani Isaia, Sisya, nyie nĩngũtũma mũtũmwa wakwa mbee wa ũthyũ waku, Ũla ũkaseũvya nzĩa yaku;

³ Wasya wa mũndũ akĩneena mũno weũnĩ, Seũvyai nzĩa ya Mwĩaĩi, Lũngalyai moendelo make;

⁴ Yoana nĩwokie, akĩvatisa weũnĩ na akĩtavan’ya ũvatiso wa ũalyũlo wa ngoo ũetae ũekeo wa naĩ.

⁵ Na nthĩ yonthe ya Yutia, na onthe ma Yelusaleme, mooka vala ũĩ; na mavatisĩwa nĩwe ũsĩnĩ wa Yolotanĩ, makyumbũla nai syoo.

⁶ Na Yoana eekĩĩte ngũa ya w’ĩa wa ngamĩle, na aĩ na mũkwa kĩnyunyunĩ kyake, na aĩsaa ngie na ũkĩ wa nzũkĩ wa kĩthekanĩ.

⁷ Na atavan’ya, akyasya, Ĩtina wakwa kũkĩte ũla wĩ vinya kwĩ nyie, o na ndyĩanĩwe nĩ ũkunama nĩthasye tũmĩkwa twa iatũ syake.

⁸ Nyie nĩnĩnamũvatĩsaa na manzĩ; ĩndĩ ũsu akamũvatisaa na Veva Mũtheu.

Ũvatiso wa Yesũ

⁹ Na kweethĩwa matukũ asu, Yesũ ooka kuma Nasaleti ya Kalilii, na avatisĩwa nĩ Yoana ũsĩnĩ wa Yolotani.

¹⁰ Na oyu akyuma manzĩnĩ, oona matu mavingũka, na Veva ailyĩ ta ĩvũĩ aimũtheeea:

¹¹ na wasya wauma ĩtunĩ, We nue Mwana wakwa mwendwa, nendeew’e nue.

Kũtatwa kwa Yesũ weũnĩ

¹² Na oyu Veva amũtwaa na vinya weũnĩ.

¹³ Na aĩ ku weũnĩ matukũ mĩongo ĩna akĩtatwa nĩ Satani; na aĩ vamwe na nyamũ sya kĩthekanĩ; na alaĩka nĩmamũthũkũmaa.

Yesũ akyambĩlĩlya kũtavan’ya

¹⁴ Na ĩtina wa Yoana kwĩkĩwa kolokolonĩ, Yesũ aenda Kalilii akĩtavan’ya ũvoo mũseo wa Ngai,

¹⁵ akyasya, Ĩvinda nĩ ĩviku, na ũsumbĩ wa Ngai nũthengeee: alyũlai ngoo na mũkĩtĩkĩla ũvoo mũseo.

Yesũ aimeta amanyĩw’a Make ma mbee

¹⁶ Na akĩvĩtĩla ũtee wa ũkanga wa Kalilii, oona Simoni na Andalea mwana‐a‐inyia makĩkya kĩtei ũkanganĩ; nũndũ maĩ atei ma makũyũ.

¹⁷ Na Yesũ amea, Ngatĩĩai, nakwa ngamũtw’a atei ma andũ.

¹⁸ Na oyu matia itei, na mamũatĩĩa.

¹⁹ Na aendanga mbee vanini na oona Yakovo mwana wa Sevetii, na Yoana mwana‐a‐inyia, nao maĩ ngalawanĩ makĩseũvya itei syoo.

²⁰ Na oyu ameta: na matia ĩthe woo Sevetii ngalawanĩ vamwe na athũkũmi, na mamũatĩĩa.

Yesũ aivosya mũndũ waĩ na ndaimoni Kavelinaumi

²¹ Na mathi Kavelinaumi; na oyu mũthenya wa savato avota ĩsinakokenĩ na amanyĩsya.

²² Na maseng’w’a nĩ ũmanyĩsyo wake: nĩkwĩthĩwa amamanyĩsya ta ũla wĩ na ũkũmũ, o na ti ta aandĩki.

²³ Na oyu ĩsinakokenĩ yoo kwaĩ mũndũ ũla wakwetwe nĩ veva mũvũku; na aneena na wasya mũnene,

²⁴ akyasya, Twĩ ũndũ naku wa kyaũ, we Yesũ Mũnasaleti? Nĩwooka kũtwananga? Nĩngwĩsĩ we, wĩ ũla Mũtheũ wa Ngai.

²⁵ Na Yesũ ookan’ya, akyasya, Tumya kanyw’a, noimuma.

²⁶ Na ũla veva mũvuku, ũkĩmũthingithangya na kũkaya na wasya mũnene, wamuma.

²⁷ Na onthe maseng’a, mũvaka makũlan’ya ene kwa ene, makyasya, Ũndũ ũũ nata? Ũmanyĩsyo mweũ! Nũkwĩaĩa na ũkũmũ o na maveva mavuku, na nĩmeũmwĩw’a.

²⁸ Na oyu nguma yake yanyaĩĩka nthĩ yonthe ya Kalĩlii na ndee syayo.

Yesũ aivosya inyia wa mũka wa Simoni na angĩ aingĩ

²⁹ Na oyu, mauma ĩsinakokenĩ, mavota nyũmbanĩ ya Simoni na Andalea, vamwe na Yakovo na Yoana.

³⁰ Na ĩndĩ inyia wa mũka wa Simoni akomete awaĩte ndetema; na oyu mamũtavya ũvoo wake:

³¹ nake ooka na amũkwata kw’oko, amũkĩlya; na ndetema yamũtia, nake amathũkũma.

³² Na wĩoo, syũa yĩkĩthũa, mamũetee onthe ala maĩ awau, na ala makwetwe nĩ ndaimoni.

³³ Na andũ ma ndũa yonthe moombana vamwe mũomonĩ.

³⁴ Na avosya aingĩ ala mawaĩte mowau ma mĩthemba mingĩ, na aumya ndaimoni nyingĩ; na ndaaĩtĩkĩla ndaimoni ineene, nĩkwĩthĩwa nĩsyamwĩsĩ.

Yesũ ayĩvatha athi kũvoya, na kuma Kavelinaumi

³⁵ Na kĩoko tene, w’oa ũtanatema, ookĩla, aumaala, na athi vandũ vate andũ, na avoyea vo.

³⁶ Na Simoni na ala maĩ nake mamũvikĩla;

³⁷ na mamwona mamwĩa, Andũ onthe nĩmeũkũmantha.

³⁸ Nake amea, Tũendei kũngĩ, kũvika tũtũla tũla twĩ mbee, nĩtavan’ye ku nakw’o; nũndũ nyie naetiwe nĩ ũu.

³⁹ Na atavan’ya masinakokenĩ moo Kalilii kw’onthe, na aumya ndaimoni.

Kũvow’a kwa mũndũ ũwaĩte mangũ

⁴⁰ Na mũndũ ũwaĩte mangũ athi vala ũĩ, akĩmwĩsũva na kũmũtulĩlya ndu, na kũmwĩa, Ethĩwa nũkwenda, nũtonya kũnthesya.

⁴¹ Na Yesũ ũndũ wa kũmwĩw’ia ĩnee, atambũũkya kw’oko kwake, amũkiita, na amwĩa, Nĩngwenda; ĩthĩwa mũtheu.

⁴² Na oyu mangũ mavoa, na athea

⁴³ Na amwĩaĩa na vinya, na amumaalya oyu, akĩmwĩa,

⁴⁴ Sisya ndũkatavye mũndũ o na wĩva; ĩndĩ thi ũkeyonan’ye kwa mũthembi, nokyũmya nthembo ila Mose weaie kwondũ wa kũthew’a kwaku, syĩthĩwe ũkũsĩ kwoo.

⁴⁵ Ĩndĩ aumaala, na ambĩlĩya kũtavan’ya mũno na kũnyaĩĩkya ũvoo ũsu, na kwondũ wa ũu Yesũ ndaatonya ĩngĩ kũvota ndũanĩ eyonanĩtye, ĩndĩ ekala ũtee kũndũ kũte andũ: na andũ mooka vala ũĩ kuma kĩla vandũ.