Kuma 1 - Mbivilia

Kũthinw’a kwa Aisilaeli me Misili

¹ Na masyĩtwa ma ana ma Isilaeli ala malikile Misili nĩmo aa (o kĩla mũndũ na andũ ma nyũmba yake mookie na Yakovo):

² Leuveni, na Sĩmeoni, na Livai, na Yuta,

³ na Isakali, na Nzevuluni, na Mbenyamini,

⁴ na Ndani, na Navitali, na Ngati, na Aseli.

⁵ Na andũ onthe ala maumie kĩnyunyunĩ kya Yakovo maĩ andũ mĩongo mũonza: nake Yosevu aĩ o ku Misili.

⁶ Na Yosevu akw’a, na ana‐a‐ĩthe make onthe, na nzyawa ĩsu yonthe.

⁷ Na ana ma Isilaeli masyaanie, na maingĩva mũno, na kwongelela, na maendeea na kũya vinya mũno; na nthĩ yausũwa nĩo.

⁸ Na ĩndĩ kwookĩla mũsumbĩ ũngĩ Misili, ũla ũtamwĩsĩ Yosevu.

⁹ Na amea andũ make, Sisyai, andũ ma ana ma Isilaeli nĩ aingĩ na me na vinya kwĩ ithyĩ:

¹⁰ yuyu ĩndĩ tũmekei na ũĩ, matikese kwingĩva, na kũkeethĩwa, yĩla kaũ o na wĩva ũkokĩla, nao makeevulan’ya na amaitha maitũ, na kũkita naitũ, na makyuma nthĩ ĩno.

¹¹ Kwondũ wa ũu mamaiĩa aũngamĩi nĩ kana mamathĩn’ye na mĩio yoo. Nao mamwakĩa Valao ndũa sya kwia mĩio, Vithomu na Lamesesi.

¹² Ĩndĩ makĩendeea na kũmathĩn’ya, namo maendeea kwingĩva na kusũa nthĩ. Na maĩ na woo kwondũ wa ana ma Isilaeli.

¹³ Na Amĩsili mamathũkũmĩthya ana ma Isilaeli na vinya mũno:

¹⁴ na meekĩa ũũ mathayũnĩ moo kwondũ wa ũthũkũmi wi vinya, wa ndaka, na wa mavali, na wĩa w’onthe wa mĩũndanĩ, ũthũkũmi woo w’onthe ũla mamathũkũmĩthisye na vinya mũno.

¹⁵ Na mũsumbĩ wa Misili aneena na esikya Aevelania, syĩtwa ya ũmwe eetawa Sivila, na syĩtwa ya ũngĩ eetawa Vua:

¹⁶ na amea, Yĩla mũkwĩsikya aka ma Aevelania, na kũmona makĩsyaa; ethĩwa nĩ kavĩsĩ, koaei ĩndĩ; ethĩwa nĩ kelĩtu, nĩkaekwe kekale thayũ.

¹⁷ Ĩndĩ esikya mamũkĩa Ngai, na maiaaĩka tondũ mũsumbĩ wa Misili wameaĩe, ĩndĩ maeka twana twa tũvĩsĩ twĩ thayũ.

¹⁸ Na mũsumbĩ wa Misili eeta esikya, na amakũlya, Mwĩkĩte ũndũ ũũ nĩki, mũkĩeka twana twa tũvĩsĩ twĩ thayũ?

¹⁹ Na esikya mamwĩa Valao, Nĩkwĩthĩwa aka ma Aevelania matiilyĩ aka ma Amisili; nũndũ nĩ athangaau, na nĩmasyaaa mwĩsikya atanavika.

²⁰ Na Ngai ameka esikya nesa: na andũ maingĩva, na maya vinya mũnene.

²¹ Na kweethĩwa, nũndũ esikya mamũkĩaa Ngaĩ, amanenga ũsyao.

²² Na Valao ameaĩa andũ make onthe, akĩmea, Kĩla kana ka kavĩsĩ kasyawa kekasyei ũsĩnĩ, na kĩla kana ka kelĩtu kaekaei kekale thayũ.