Santiago 1 - Manobo Western Bukidnon

¹ Iyan a si Santiago is teg̵isurat kayi. Sulug̵uen a te Megbevayà wey te Nengazen tew he si Jesu Kristu. Kemusta kew is langun he menge g̵aked te Megbevayà he nekedsusuwey zini te tungkup te kelibutan.

Is Penggezam

² Menge suled, mebmelipayen kew emun merasey is egkeulaula niw tenged te idtug̵ut te Megbevayà he zuen ebarangbarang he penggezam te kedtuu niw kandin.

³ Su nesavut niw en he emun egkeantus niw is penggezam, egkevig̵eran is ked-antus niw.

⁴ Ne utew zaan kinahanglan he kenà mehugkà is kebpurung niw ked-antus su emun ebpurung ki ed-antus te merasey egkehimu ki he metau wey wazà igkesewayi kenita wey wazà kurang te kedtuu ta te Megbevayà.

⁵ Ne ke zuen minsan hentei keniyu he egkereg̵enan su kenè din egketuenan ke hengkey is meupiya he paag̵i, mebuyù te ketau ziyà te Megbevayà, ne ebeg̵ayan sikandin su metulanged sikandin ne kenè ki zin edewayen ke ebuyù ki.

⁶ Ne emun ebuyù kew te ketau ziyà te kandin kinahanglan he edtuu kew he egkezawat niw te wazà duwazuwa. Su is etew he eduwazuwa, egkehalinhalin layun is isip din. Iring sikandin te vag̵el ziyà te zag̵at he minsan hendei zà duen hiyupa te keramag.

⁷ Is etew he iring kayi, kinahanglan he kenè din isipa he ibeg̵ey kandin te Megbevayà is ebuyuen din

⁸ su zuwazuwa is ed-isipen din; kenè din edserig̵an is Megbevayà, ne kenà daan egkeserig̵an is minsan hengkey he ulaula zin.

Is Kelipey te Egkaayuayu wey Sepian

⁹ Kinahanglan he mebmelipayen is egkeayuayu he tumutuu emun ibpelavew sikandin te Megbevayà.

¹⁰ Kinahanglan he mebmelipayen daan is sepian he tumutuu emun ibpekevavà sikandin te Megbevayà; su is sepian, egkeawà daan sikandin keuzemà iring te kevukad te sagbet.

¹¹ Edsilaan is sagbet te andew he utew meinit, ne egkelay-ub, ne egkeg̵angu is kevukad din, ne kenè en maan dutun meupiya he ed-ahaan. Ne iring din ded daan is sepian he etew su egketik-ew sikandin ebpatey ne egkeengkezan din is kebpen-ehè din te ketig̵eyunan.

Is Penuley

¹² Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

¹³ Emun egkepenulayan is minsan hentei kenitew, kenè tew ed-isipen he iyan nekepenuley kenitew is Megbevayà, su kenà egkepenulayan is Megbevayà, ne kenè din daan ebpenulayen is minsan hentei.

¹⁴ Egkepenulayan is etew emun ed-eg̵aken sikandin te mezaat he kebayè din.

¹⁵ Ne emun edtumanen din is suat din, ebpekesalà sikandin. Ne iyan dutun pangkus te etew ke ebpeniguduwan din is ked-ulaula te mezaat is kemetayen.

¹⁶ Menge minahal ku he suled, kenè niw tuuwi is kenà tutuu. Kenà ebpenuley is Megbevayà.

¹⁷ Is minsan hengkey he ibeg̵ey kenitew he meupiya he wazè din kurang, ne ziyà ebpuun te Megbevayà he iyan nenlimbag te langun he edsig̵a ziyà te langit. Egkengehalinhalin heini, iyan, is Megbevayà, kenà mulà sikandin edhalin, ne kenà egkehalin te minsan hengkey.

¹⁸ Tenged te iyan egkesuatan din midhimu kiw zin he menge anak din pinaag̵i te kebpesevuta zin kenitew te tutuu he tuluuwen. Egkesuatan din he iyan kiw edhimuwen din he lavew te langun he menge linimbag.

Is Tutuu he Kebpemineg

¹⁹ Kenè niw lipati, menge minahal ku he suled, he is minsan hentei kenitew, kinahanglan he layun andam he ebpemineg te Lalag te Megbevayà ne kenè ta ipetuwas is kenita zà he lalag ne kenè ki zaan melemu he egkepauk.

²⁰ Su emun egkepauk ki kenè ta zutun egketuman is egkesuatan te Megbevayà.

²¹ Engkezi niw en is minsan hengkey he meremerik he ulaula wey is kelelalung. Pesakup kew te Megbevayà; hemeni niw is lalag din he impesavut en keniyu su iyan ebpekelibri keniyu te silut.

²² Kinahanglan he edtumanen niw is Lalag te Megbevayà. Emun ebpemineg̵en niw zà is lalag din ne kenè niw edtumanen, henduen be te edterteruen niw is gehinawa niw.

²³ Su ke zuen minsan hentei he taman dà te kebpemineg te Lalag te Megbevayà, iyan, kenè din edtumanen, iring sikandin te etew he ed-alung diyà te peg̵elungan.

²⁴ Egkeehè din is dagwey zin, iyan, meg̵aan dà. Ne egkelipatan din dutun ke hengkey is neehè din.

²⁵ Iyan, ke zuen etew he ebpurungan din ed-istudyuwi is kesug̵uan he wazè din kurang he iyan ebpekelibri kenitew, ne kenè din edlipatan, kekenà, edtumanen din, edtuvazan te Megbevayà is minsan hengkey he ed-ul-ulahan din.

²⁶ Emun iyan isip te etew is hustu is ked-ezapa zin te Megbevayà, iyan, kenè din edtengkaan is kegkag̵ikag̵i zin, wazà pulus te ked-azap din su neterteruan din dà is gehinawa zin.

²⁷ Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.