Hibriyuhanen 9 - Manobo Western Bukidnon

Is Ked-azap Duen te Simbahan he Valey he Terapal

¹ Ne zutun te nehuna he paag̵i te kebpekidsevaha te Megbevayà te menusiyà, impenurù te Megbevayà is paag̵i te ked-ezapa zan kandin wey ke ebmenmenuwen is kebeeli te simbahan dini te kelibutan.

² Impehitindeg dan is simbahan he valey he terapal ne zezuwa is rug̵u zutun. Is sevaha, ne iyan kes egngezanan te mahal he rug̵u. Ne zutun dan isavuk is sulù, wey is lemisahan he zutun isavuk is supas he ibpemuhat diyà te Megbevayà.

³ Duen kurtina zutun te idselang te valey he terapal ne zuen daan kurtina he intaltal zutun te mid-elangan te zezuwa he rug̵u. Ne heini is ikezuwa he rug̵u ne iyan kes egngezanan te utew mahal he rug̵u.

⁴ Ne is seled kayi, insavuk dan dutun kes pemuhatà he vulawan he zutun edtutunga is beyewà. Ne zutun daan isavuk kes kavan he mid-epizan te vulawan. Tuus heini is kavan te zaan he paag̵i he midtukud te Megbevayà. Diyà te seled dutun te kavan ne egkeahà is bulawan he umuy he zutun itag̵ù kes keuyag̵an he mana. Ne zutun daan te seled te kavan egkeahà kes tuked ni Arun he mibpeneringsing wey kes dezuwa he melumpipi he vatu he zutun isurat te Megbevayà kes kesug̵uan.

⁵ Ne insihung haazà is kavan dutun te zezuwa he ledawan te menge mekeg̵eg̵ehem he kedesenan he iyan tuus he zutun is Megbevayà. Mibekar zan is pakpak dan ne intezung dan dutun te vulawan he vangkù he zutun ebpelisa te Megbevayà is menge salà te menge etew. Ne kayi zà taman heini su kenè en egkehimu he id-amin ku te edseysey is langun kayi.

⁶ Ne hein naandam dan en is langun kayi ne kada andew edseled is menge memumuhat dutun te nehuna he rug̵u he egngezanan te mahal he rug̵u su edtumanen dan is ebpeveelan kandan.

⁷ Iyan, haazà is sevaha he rug̵u he egngezanan te utew mahal he rug̵u, iyan dà ebpekeseled dutun is lavew he memumuhat. Ne kesevaha zà sikandin edseled dutun te sengetuig. Ne emun ed-ahuk sikandin dutun, kinahanglan he ed-uwiten din is lengesa he ibpemuhat wey mepalis is menge salè din wey is menge salà he wazà tuyua te langun he menge zuma zin he kevuwazan ni Israyil.

⁸ Iyan heini ulaula te menge memumuhat dutun te simbahan, ne pinaag̵i kayi ibpesavut kenitew te Wag̵as he Mulin-ulin he te kemulu pa kinahanglan he egemiten haazà is egkehuna he rug̵u he egngezanan te mahal he rug̵u, kenè pa ebpekeseled is menge etew zà duen dutun te utew mahal he rug̵u.

⁹ Ne alung heini he ibpesavut kenita he is menge ibpemuhat dutun he menge langgam wey is menge halad, kenà heini ebpekeawà te menge salà te menge etew he ed-azap dutun su nesavut dan he pinaag̵i kayi wazè dan pa himuwa he metazeng.

¹⁰ Su heini he paag̵i te ked-ezapa te Megbevayà, ne pinaag̵i zà te menge sug̵ù mehitenged te vetasan te kegkaan, ked-inum, kebpenlùlù, wey kedhemesa te lawa he paag̵i he insug̵ù te Megbevayà. Menge sug̵ù heini he edtumanen te menge etew pinaag̵i zà te lawa wey tenged dà te insug̵ù ne kenà tenged te iyan diyà te g̵ehinawa zan. Ne is pulus kayi te paag̵i, ne taman dà heini kayi te timpu g̵untaan te ked-ilisi te Megbevayà kayi te veg̵u he paag̵i.

Is Pemuhat ni Jesu Kristu

¹¹ Ne g̵untaan nekeuma en si Kristu, ne nehimu sikandin he lavew he memumuhat mehitenged kayi te veg̵u he paag̵i he meupiya kenà kes daan. Ne midseled sikandin diyà te meupiya pa wey lavew pa he simbahan he wazà beeli te etew zà duen su kenà dini te kelibutan.

¹² Ne kesevaha zà is kedseled din dutun te utew mahal he rug̵u te simbahan he ziyà te langit ne kenè en ed-uman. Ne wazà sikandin mekeseled dutun tenged te kebpelengesa zin te lengesa te menge ayam dà duen, iring te menge kambing wey menge nati he vaka, kekenà, nekeseled dutun tenged te impelengesa zin is kandin he lengesa. Ne tenged kayi te kebpemuhata te lawa zin, midhimu zin he wazà pidtemanan te kedlibriya zin kenita te silut.

¹³ Dengan, sumalà is impenurù te kesug̵uan, ke zuen etew he mibmeremerik tenged te mid-uvayan din is minatey, kinahanglan he ebpetig̵isan sikandin te lengesa te ibpemuhat he vaka wey kambing, wey igmuk te edtutungen he nati he vaka. Ne pinaag̵i kayi egkepelisan sikandin dutun te kegkeremeriki te lawa zin.

¹⁴ Ne emun egkehimu he egkelumpiyuwan haazà pinaag̵i zà te lengesa te menge vaka wey kambing, iyan pe be kenà utew pa lavew is egkelumpiyuwan pinaag̵i te lengesa ni Kristu. Su pinaag̵i te tavang te Wag̵as he Mulin-ulin he wazè din pidtemanan, impemuhat ni Kristu ziyà te Megbevayà is kandin he lawa; ne wazà igkesewayi kandin. Ne pinaag̵i te kebpelisi kenita te lengesa zin, in-awè din is menge salè ta wey is kebpekesarig ta te menge ulaula he wazè dan pulus. Ne tenged kayi ebpekeazap ki en te wazè din kemetayen he Megbevayà.

¹⁵ Ne tenged kayi zaan nehimu en si Kristu he zatù tew su wey zin metukud is beg̵u en he paag̵i te kebpekidsevaha tew te Megbevayà. Ne pinaag̵i kayi, is langun he midhimu te Megbevayà he meketuu, egkezawat dan is langun he meupiya he wazè din pidtemanan he impenaad te Megbevayà. Umba egkehimu heini su pinaag̵i te kebpatey ni Kristu nengepalis is langun he menge mezaat he ulaula he nehimu te menge etew zutun te timpu he nengesakup sikandan te nehuna he paag̵i.

¹⁶ Ne penenglitan, duen etew he mibaal te dukumintu ne migkag̵i zin dutun te dukumintu he emun ebpatey sikandin duen menge azen din he ibpepengevilin din te menge zuma zin. Ne zutun te kebpatey zin kinahanglan he zuen ebpeketistig̵us he tutuu iyan he minatey en haazà is etew, ne human ebpekezawat dutun te menge azen din haazà is migkag̵i zutun te dukumintu.

¹⁷ Emun kemulu pa uuyag haazà is teg̵iazen, ne kenè pa edtumanen haazà is migkag̵i zutun te dukumintu. Iyan, emun ebpatey en, human edtumana haazà.

¹⁸ Ne iring din ded daan haazà is nehuna he paag̵i he midtukud te Megbevayà su kinahanglan dutun he zuen lengesa he tuus te edhimetayan he langgam ne human egketuman haazà is paag̵i.

¹⁹ Ne tenged kayi, hein aney ipenurù ni Moises diyà te langun he menge etew is langun he ibpetuman kandan te Megbevayà dutun te kesug̵uan, migkuwa zin is lengesa te menge nati he vaka he impemuhat, ne mid-emutan din te wahig. Midhames din dutun is bulvul te kerehidu he midtinà te merig̵à wey is subpang te kayu he egngezanan te hisup. Ne mibpirikan din dutun is libru he zutun isurat is kesug̵uan wey mibpirikan din daan is langun he menge etew.

²⁰ Ne migkeg̵iyan din dutun is menge etew te, “Tuus heini is lengesa te paag̵i he midtukud te Megbevayà wey kiw zin mezawat, ne kinahanglan he ebpurungan tew te edtuman heini su insug̵ù te Megbevayà,” ke sikandin.

²¹ Ne iring din ded daan mibpirikan ni Moises is simbahan he valey he terapal wey is langun he tag̵ù dutun he egemiten dan te ked-ezapa zan te Megbevayà.

²² Impenurù te kesug̵uan he kinahanglan he ebpelisan te lengesa is hapit minsan hengkey he egemiten dan te ked-azap. Ne iring din ded daan wey zà egkepesaylu is menge salà te menge etew ke zuen ibpelengesa.

²³ Ne haazà is simbahan te menge Hudiyu zini te kelibutan wey is menge g̵elemiten dan te ked-azap, ne menge alung dà te tutuu he simbahan diyà te langit. Ne egkepelengesahan is kelibutanen he simbahan pinaag̵i te kelibutanen he pemuhat, iyan, haazà is diyà te langit, ne kinahanglan he lavew pa he meupiya is ibpemuhat dutun.

²⁴ Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

²⁵ Ne is lavew he memumuhat te menge Hudiyu, ne kada tuig edseled sikandin dutun te utew mahal he rug̵u zutun te simbahan dini te kelibutan su ibpemuhat din is lengesa te langgam. Iyan, si Kristu mulà, wazà melelayun is kebpemuhata zin te lawa zin

²⁶ su emun iyan haazà egkinehenglanen, puun pa te kedlimbag̵a te kelibutan, ne utew mezakel is kebpekeantus din te kebpehimatey. Iyan, wazà iyan haazà kinehenglana su iyan mid-ulaula zin kayi te timpu he meg̵aan en egketapus is kelibutan is: midlepew sikandin wey zin maawà is salè tew pinaag̵i te kebpemuhata zin te keugelingen din he lawa. Ne kesevaha zà is kedhimuwa zin kayi.

²⁷ Imbanglis te Megbevayà diyà te menusiyà is kebpatey te kesevaha, ne egkeipus dutun te kebpatey zin ne edsusiyen te Megbevayà is menge ulaula zin.

²⁸ Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.