Hibriyuhanen 5 - Manobo Western Bukidnon

¹ Su ke zuen etew he ebpilien he lavew he memumuhat, idsarig kandin is ked-etuvang te Megbevayà ne iyan sikandin datù te menge etew. Ne idsarig daan kandin is menge ibeg̵ey ziyà te Megbevayà wey is kebpemuhat wey mepelisi is menge etew te menge mezaat he ulaula.

² Ne tenged te etew zà duen sikandin he layun egkesayep, egkehimu he mepelevayen sikandin te menge zuma zin he etew he egkengesayep daan tenged te kenè dan ebpekesavut.

³ Ne tenged te zuen daan kandin he menge sayep, kinahanglan he zuen ibpemuhat din tenged te kandin he menge mezaat he ulaula iring te zuen daan ibpemuhat din tenged te menge mezaat he ulaula te menge zuma zin he etew.

⁴ Utew telehuzen is lavew he memumuhat, iyan, wazà minsan hentei he ebpekehimu he ebpilì te keugelingen din wey mehimu sikandin he lavew he memumuhat su iyan ebpilì kandin is Megbevayà iring te mibpilì din dengan si Arun.

⁵ Ne iring din ded daan wazà iyan si Kristu mebpilì te keugelingen din wey mehimu sikandin he mekeg̵eg̵ehem he lavew he memumuhat tew, kekenà, iyan is Megbevayà su migkag̵i kandin is Megbevayà te, “Iyan ka Anak ku. Ne egkeg̵iyen ku he g̵untaan ibpeehè ku he Amey a kenikew.”

⁶ Ne zuen pa insurat he lalag din he edhenduen te, “Iring ka ki Milkisidik he memumuhat dengan, su wazà pidtemanan te kegkememumuhat nu.”

⁷ Ne hein kemulu pa si Jesus dini te kelibutan, ne mibpenig̵is is luhè din ne nekelelendag sikandin tenged te utew meheg̵et is kebuyù din wey ked-ampù din diyà te Megbevayà he iyan ebpekelibri kandin te kemetayen. Ne tenged te zekelà is kedtahud din wey kedtumana zin te menge sug̵ù te Megbevayà, midineg is ked-ampù din te Megbevayà.

⁸ Su minsan pa te Anak sikandin te Megbevayà, ingkepenurù gihapun kandin is kebpeketuman te sug̵ù te Megbevayà pinaag̵i te menge kemereg̵enan he nengeeg̵iyan din.

⁹ Ne hein nepasad din en is langun he impetuman kandin te Megbevayà, nehimu sikandin he Menluluwas te langun he ebpemineg kandin su wey meveg̵ayi sikandan te untung he wazè din pidtemanan.

¹⁰ Ne zutun, is Megbevayà, midlilaan din sikandin he lavew he memumuhat iring te memumuhat dengan he si Milkisidik.

Is Ked-engked te Kedtuu

¹¹ Dekelè pa is ibpesavut ku pezem keniyu mehitenged te kegkememumuhat ni Milkisidik wey ni Jesus, iyan, mereg̵en he edseysayen su kenè niw en egkesavut. Henduen be te kenè en ed-uteng diyà te isip niw.

¹² Neug̵et en is kebpeketuu niw ki Jesus, ne engayan kew en pezem he menge menunudlù, iyan, kenà egkehimu su kinahanglan he ebpekepepenurù kew pa ebpekepeuman wey niw mesavut is menge melemu zà he tuluuwen he ebpuun te Lalag te Megbevayà. Henduen te kemulu kew pa edsusu su kenè niw pa egkelutang te egkaan is mezesen he egkeenen, he ke và dà egkeg̵iya, is menge mezalem he ebpuun te insurat he Lalag te Megbevayà.

¹³ Emun deisek ki pa he vatà ne iyan dà egkezawat ta is gatas, he ke và dà egkeg̵iya, kenè te pa egketuenan is penurù mehitenged te metazeng he ulaula.

¹⁴ Ne emun meg̵urang ki en ne egkesepè te en is mehunit he egkeenen, he ke và dà egkeg̵iya, mezalem en is igkepenurù kenita ne metau ki en he ed-isip-isip, ne egketuusan te en ke hengkey is meupiya wey ke hengkey is mezaat he ibayà.