Hibriyuhanen 4 - Manobo Western Bukidnon

¹ Ne minsan pa zutun, wazà iawà te Megbevayà is daan he penaad din he zuen menge etew he ebpekeseled dutun te inged din wey zan mekehimeley zuma kandin. Ne tenged kayi kinahanglan he ebpekeandam kiw su wey wazà minsan sevaha kenitew he kenà edtug̵utan te Megbevayà he mekeseled dutun.

² Su sikitew, nezineg tew zaan is kebpenudtula te Meupiya he Tudtulanen iring te menge g̵in-epuan tew zengan. Iyan, minsan te nezineg dan is impesavut kandan te Megbevayà, wazà pulus kayi ziyà te kandan su zutun te kegkezineg̵a zan kayi, wazè dan tuuwi.

³ Ne sikitew mulà is nemeketuu, idtug̵ut kenitew is kedseled dutun wey kiw mekehimeley zuma te Megbevayà. Iyan, wazà itug̵ut te kenà edtuu su zuen insurat he Lalag te Megbevayà he edhenduen te, “Ne utew a nepauk ne migkag̵i ku he utew tutuu he kenè dan en ebpekeseled dutun te integ̵ana ku he inged wey zan mekehimeley zuma kediey!” Wazà iyan ikeg̵iya zin kayi is wazè pa meteg̵ana haazà is kedhimeley su zaan en he nepasad din en heini puun pa te kedlimbag̵a zin te minsan hengkey.

⁴ Su zuen insurat he lalag mehitenged te ikepitu he andew he edhenduen te, “Midhimeley is Megbevayà dutun te ikepitu he andew su netapus din en is langun he ebeelan din.”

⁵ Ne migkag̵i en maan is Megbevayà mehitenged kayi te kedhimeley te, “Kenè dan en ebpekeseled wey zan mekehimeley zuma kediey.”

⁶ Tenged kayi, netuenan ta he haazà is menge etew zengan he nehuna he nemekezineg te Meupiya he Tudtulanen mehitenged kayi te kedhimeley, wazà sikandan mehimuwa te Megbevayà he mekeseled dan wey zan mekehimeley tenged te wazè dan kebpemineg. Iyan, netuenan tew zaan he zuen menge zuma pa he ebmehimuwen mulà te Megbevayà he mekeseled sikandan wey zan mekehimeley zuma kandin.

⁷ Umba egketuenan ta heini su zuen pa andew he midtelaan te Megbevayà he zutun ebpekeseled is menge etew zutun te kedhimeley he midteg̵ana zin. Su neug̵et pa zutun te timpu te menge tipehuna he etew he wazà medtuu, impinted te Megbevayà is lalag din diyà te ki Hadì David. Ne ke si David te, “Guntaan, emun egkezineg niw is lalag keniyu te Megbevayà, kinahanglan he kenà mezesen is gehinawa niw.”

⁸ Haazà is menge tipehuna he etew, angin ke mid-uwit sikandan ni Josue ne impeseled din sikandan dengan dutun te hustu en he kedhimeley he midteg̵ana te Megbevayà su kenè en kinahanglan he ibpesavut pa maan te Megbevayà is duma pa he andew he zutun ibpeseled pa maan is menge etew.

⁹ Ne tenged kayi, sikitew is menge sakup te Megbevayà guntaan, nesavut tew en he egkehimu kiw he ebpekeseled wey kiw mekehimeley zuma te Megbevayà iring te midhimeley is Megbevayà dutun te ikepitu he andew.

¹⁰ Ne is minsan hentei he ibpehimeley te Megbevayà, ed-engkezan din en is kandin he vaal iring te midhimeley is Megbevayà dutun te kegkepesaza zin te vaal zin te kedlimbag.

¹¹ Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.

¹² Uuyag is Lalag te Megbevayà ne zekelà is gehem din. Iring te sundang he zezuwa is gerangan din he utew meg̵arang, iyan, meg̵arang pa is Lalag te Megbevayà kenà haazà is sundang su edlembasan din minsan is isip ta, gehinawa ta, wey tuyù ta ne igkepetuenan din kenita ke hengkey is ked-isipa kenita te Megbevayà.

¹³ Is Megbevayà, kenà sikandin egkeelesan te minsan hengkey. Egkeehè din layun is minsan hengkey he ed-ul-ulahan ta. Ne ke minsan hengkey is ed-ul-ulahan ta, iyan sikandin edsusi.

Si Jesus is Utew Lavew he Memumuhat

¹⁴ Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

¹⁵ Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

¹⁶ Ne tenged kandin, wazà igkelenew te isip tew te ked-uvey zutun te etuvangan te mekeg̵eg̵ehem he Megbevayà pinaag̵i te ked-ampù su utew velig̵eg̵awen is Megbevayà. Ingkehizu kiw zin ne edtevangan kiw zin dutun te timpu te menge kemereg̵enan.