Hibriyuhanen 3 - Manobo Western Bukidnon

Si Jesus Lavew ki Moises

¹ Ne tenged kayi, menge suled ku te kedtuu, mid-umbita kew zaan te Megbevayà wey kew mekeubpà keuzemà diyà te langit. Purungi niw isipa si Jesus. Iyan sikandin kes midsug̵ù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.

² Su si Jesus, ne mibpurung medtuman te langun he ebpeveelan kandin te Megbevayà, iring te si Moises, nepurungan din daan te edtuman is langun he mibpeveelan kandin dutun te kebeyveyai zin te valey te Megbevayà, he ke và dà egkeg̵iya, menge etew he sakup te Megbevayà.

³ Iyan, si Jesus, ed-isipen sikandin te Megbevayà he utew pa lavew kenà si Moises, iring te lavew is ebevaley kenà te valey.

⁴ Netuenan ta he ke zuen baley ne zuen daan mibaal zutun te valey, ne is mibaal te minsan hengkey ne iyan is Megbevayà.

⁵ Ne si Moises, sulug̵uen sikandin he metinumanen is kebayàbayè din te valey te Megbevayà ne nehimu is menge vaal zin he alung te ibpaahà te Megbevayà te egkeug̵et pa zutun he timpu egketuman.

⁶ Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Is Kedhimeley he Integ̵ana te Megbevayà

⁷ Su zuen insurat he lalag te Wag̵as he Mulin-ulin he edhenduen te, “Guntaan emun egkezineg niw is lalag keniyu te Megbevayà,

⁸ kinahanglan he kenà mezesen is gehinawa niw iring te g̵ehinawa niw zengan hein midsukulan niw is Megbevayà dutun te timpu he migezaman niw is ked-antus din keniyu zutun te tanà he wazà meubpai te etew.”

⁹ Su migkag̵i is Megbevayà te, “Minsan pa te seled te kepatan he tuig nengeehè dan is menge egkein-inuwan he mibeelan ku, ne migezaman dan pa ke hendei taman is kebpelevaya ku te menge mezaat he ulaula zan.

¹⁰ Umba, utew a zutun nepauk kandan, ne ke siak te, ‘Layun egkesayep is ed-isipen dan ne kenè dan egkesuat he edtuman te menge sug̵ù ku.’

¹¹ Ne utew a nepauk ne migkag̵i ku he utew tutuu he kenè dan en ebpekeseled dutun te integ̵ana ku he inged wey zan mekehimeley zuma kediey.”

¹² Umba, menge suled, susiya niw is gehinawa niw. Kinahanglan he wazà minsan sevaha keniyu he mezaat is ed-isipen din nè wazè din kedtuu, su pinaag̵i kayi egkeengkezan din is wazè din kemetayen he Megbevayà.

¹³ Ne g̵untaan te kemulu pa egkehimu he egkekuwa is keluwasan he imbeg̵ey kenitew te Megbevayà, kinahanglan he ebpesemsembag̵è kiw su wey kiw kenà melimbungi pinaag̵i te salà he iyan is kenà kedtuu ne wey kenà mebmezesen is gehinawa tew.

¹⁴ Su sikitew, emun edhemenan tew is daan he kedsarig tew ki Kristu, duen tew pudu upakat kandin.

¹⁵ Su iring te Lalag te Megbevayà he insurat ku en he edhenduen te, “Guntaan, emun egkezineg niw is lalag keniyu te Megbevayà, kinahanglan he kenà mezesen is gehinawa niw iring te g̵ehinawa niw zengan hein midsukulan niw is Megbevayà.”

¹⁶ Ne hentei heini is menge etew he minsan nezineg dan is Lalag te Megbevayà midsukulan dan gihapun sikandin? Iyan sikandan sikan is menge etew he kevuwazan ni Israyil he mid-uwit ni Moises puun diyà te tanà he Ihiptu.

¹⁷ Ne hentei is menge etew he nepeukan dengan te Megbevayà seled te kepatan he tuig? Iyan ded heini is menge zuma te kevuwazan ni Israyil he mibaal te salà diyà te Megbevayà ne tenged kayi midsilutan din sikandan ne minatey sikandan dutun te tanà he wazà meubpai te etew.

¹⁸ Iyan ded sikandan kes menge etew he mehitenged kandan migkag̵i is Megbevayà te, “Kenè dan ebpekeseled dutun te midteg̵ana ku he inged wey zan mekehimeley zuma kediey.” Umba migkag̵i zin heini su wazè dan mebpemineg te lalag din.

¹⁹ Ne netuenan tew he wazè dan mekeseled dutun su wazè dan tuuwi is Lalag te Megbevayà.