2 Timoteo 3 - Manobo Western Bukidnon

Is Huziyan he Timpu

¹ Kinahanglan he sevuta nu he timpu te kemereg̵enan haazà is ketepusan he timpu keuzemà te kenè pa edlimasen is menusiyà.

² Su zutun he timpu leg̵ezen is menge etew wey iyan mahal ziyà te g̵ehinawa zan is selapì. Ebmepelevawen wey ebmepedeligen dan. Edsulaan dan is menge zuma zan; kenè dan ebpemineg̵en is menge lukes dan; ne kenè dan ebpeselamat. Utew lalung sikandan.

³ Kenè dan ebmahalen is menge zuma zan; kenà egkeawà is pauk dan. Bereituk sikandan; kenè dan egkeeg̵en is menge mezaat he kebayà te lawa zan. Utew zan mevurut ne wazà minsan hengkey he meupiya he ulaula he kenè dan egkeepesan.

⁴ Menge men-aakal sikandan; kenè dan ed-isipen ke hengkey is egkeulaula tenged te kelelalung dan. Menge gelbuwen sikandan. Iyan dan ibpelavi is kelibutanen he kelipey kenà is kebmahala zan te Megbevayà.

⁵ Uvag sikandan ed-azap te Megbevayà, iyan, kenè dan edtuu he zuen gehem din. Likayi nu is menge etew he iring dutun.

⁶ Iyan duma zutun is menge maama he edseled te menge valey wey zan mepenurù wey meveyveyai is menge vahi he wazà menge pulus. Is menge vahi he iring kayi, egkehandek dan tenged te mezakel he neveelan dan he salà, iyan, mezakel zaan is menge mezaat he egkesuatan dan.

⁷ Layun sikandan ebpepenurù, iyan, kenè dan edsevuten is tutuu he tuluuwen.

⁸ Haazà is menge maama zaan, edsumpalit dan te tutuu he tuluuwen. Netazin en utew is isip dan ne uvag dà is kedtuu zan te Nengazen. Iring sikandan ki Hanis wey ki Hembiris he midsumpalit dengan ki Moises.

⁹ Kenà ebpekeuswag is ed-ul-ulahan te menge etew he iring kayi su egkeahà te langun he engey sikandan iring ki Hanis wey ki Hembiris.

Menge Telaan

¹⁰ Ne sikew mulà, Timoteo, nepurung nu en metueni is langun he impenurù ku, is menge vetasan ku wey is egkesuatan ku he meulaula ku. Netuenan nu zaan is kedtuu ku te Megbevayà, is kebmepelevayen ku, is kebmahala ku te minsan hentei, wey is ked-antus ku te kemereg̵enan.

¹¹ Netuenan nu zaan is menge kemeresayan wey menge keseengan he nengeantus ku. Netuenan nu zaan is langun he neeg̵iyan ku ziyà te menge inged he Entiyukya, wey Ikunya, wey Listera wey is langun he utew merasey he naantus ku. Is Megbevayà, ne midlibri e zin kayi te langun.

¹² Ne is langun he tumutuu ki Jesu Kristu he egkesuatan dan he pinaag̵i kandin metuman dan is egkesuatan te Megbevayà, edresayen sikandan te menge kuntada te Megbevayà.

¹³ Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

¹⁴ Ne sikew mulà, hemeni nu is tuluuwen he impenurù kenikew he netuenan nu he tutuu. Netuenan nu ke hentei is nemekepenurù kenikew

¹⁵ ne egketenuzan nu he zengan te vatè ke pa nesavut nu en is insurat he Lalag te Megbevayà. Dutun te lalag din ebpuun is kedsavut he iyan paag̵i te kedlibriya kenita te silut emun edtuu ki ki Jesu Kristu.

¹⁶ Impinted te Megbevayà is kedsurata te langun he insurat he menge lalag din, ne zekelà is tavang kenita kayi te lalag emun ebpenurù ki, emun edawey ki, wey ke edsambag ki te menge tumutuu wey emun ibpenurù ta is metazeng he ulaula.

¹⁷ Pinaag̵i te ked-istudyuwi kayi te lalag ebmetau ki is sulug̵uen te Megbevayà ne egkehimu ta is minsan hengkey he meupiya he ed-ul-ulahan.