2 Timoteo 1 - Manobo Western Bukidnon

^1-2 Sikew, Timoteo he iring te anak ku su utew ku minahal, ebpesuratan ku sikew. Iyan a si Pablo he epustul ni Jesu Kristu, he ke và dà egkeg̵iya, sulug̵uen e zin. Midsug̵ù a te Megbevayà wey ku ipenudtul is untung he wazà pidtemanan. Iyan heini sikan is impenaad din he untung he nekuwa te en pinaag̵i te kebpekidsevaha ta ki Jesu Kristu. Berakat he ikeg̵ag̵ew ka wey kehizuwi ka te Amey tew he Megbevayà wey te Nengazen tew he si Jesu Kristu wey veg̵ayi ke zan te melinawen he kebpekesavuk.

Is Kedesig̵a ki Timoteo

³ Iring te nengeulaula te menge kepuun ku hustu is tuyù ku te ked-ezapa ku te Megbevayà, ne utew zekelà is kebpeselemati ku kandin dutun te layun ku kenikew ked-empua ziyà te kandin te maandew wey mezukilem.

⁴ Ne emun egketenuzan ku is kedtig̵is te luhè nu zutun te ked-ewai ku kenikew, utew a kenikew ebulunga ne utew a egkesuat he meked-uman ki meked-uma wey a utew melipey.

⁵ Kenè ku egkelipatan he utew meheg̵et is kedtuu nu he iring te meheg̵et daan is kedtuu te apù nu he si Luwida wey is iney nu he si Eunisi. Ne netuenan ku he utew hustu zaan is kenikew he kedtuu.

⁶ Ne tenged dutun kenè nu lipati he kinahanglan he g̵emita nu is ketau nu he imbeg̵ey zengan kenikew te Megbevayà dutun te kedlilai ku kenikew pinaag̵i te kedempaa ku te purù nu.

⁷ Su is Mulin-ulin he impeulin kenita te Megbevayà, kenè ta igketalew, kekenà, edlig-enan ki zin wey ebeg̵ayan ki zin te zesen su wey mehimu he ebmahalen ta is menge zuma ta wey edtengkaan ta is langun he ed-ul-ulahan ta.

⁸ Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

⁹ Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

¹⁰ Ne g̵untaan impeehè en kenita haazà is gag̵ew zin su mibpeetew si Jesu Kristu he iyan Menluluwas tew. Ne si Jesus, in-awè din is gehem te kemetayen ne pinaag̵i te Meupiya he Tudtulanen impesavut din kenita he egkeveg̵ayan ki te untung he wazà pidtemanan.

¹¹ Ne siak, midtezù a te Megbevayà wey a mehimu he epustul ne wey ku ikesangyew wey ipenurù haazà is Meupiya he Tudtulanen,

¹² ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

¹³ Is tutuu he tuluuwen he impenurù ku kenikew, kinahanglan he iyan layun edsunuzen nu. Hemeni nu is kedtuu nu te Megbevayà wey is kebmahala nu te menge zuma nu su iyan heini tuus te kebpekidsevaha ta ki Jesu Kristu.

¹⁴ Pinaag̵i te kedtavang te Wag̵as he Mulin-ulin he zini ed-ubpà te kenita, bentayi nu he kenà mahalin haazà is tutuu he tuluuwen he insarig kenikew te Megbevayà.

¹⁵ Netuenan nu en he is langun he menge tumutuu zini he ebpuun te prubinsya he Asya, wazè e zan tevangi. Elin dutun si Pihilu wey si Hirmuhinis.

¹⁶ Iyan, berakat he mehizuwi te Nengazen si Unisipuru wey pemilya zin. Su layun e zin edtevangi kayi te menge keseengan ku. Wazè din ikeeled is kebpenumbaley zin kedì te pinirisu,

¹⁷ kekenà, dutun dà te kebpekeuma zin dini te Ruma, mibpeniguduwan e zin pen-ahaa taman te neturedu e zin.

¹⁸ Id-ampù ku layun he mehizuwi sikandin te Nengazen keuzemà te andew te kedsusi te Nengazen te langun. Ne netuenan nu en daan he zekelà is kedtevangi zin kedì diyan te Ipisu.