Levitico 15 - Maayong Balita nga Biblia (2012)

Ang Di-matinlo nga Nagapanggwa sa Lawas

¹ Ang Ginoo naghatag kay Moises kag kay Aaron sang masunod nga mga pagsulondan:

² “Ihambal sa mga tawo sang Israel, kon ang isa ka lalaki ginapanggwaan sa iya kinatawo, ang nagapanggwa di-matinlo,

³ bisan magapadayon ini sa pag-ilig ukon nag-untat na.

⁴ Ang higdaan nga iya pagapungkuan ukon pagahigdaan mangindi-matinlo.

⁵ Ang bisan sin-o nga makatandog sang iya higdaan

⁶ ukon makapungko sa bisan ano nga ginpungkoan sang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

⁷ Ang bisan sin-o nga makatandog sang tawo nga ginapanggwaan kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

⁸ Kon ang tawo nga ginapanggwaan makadupla sa bisan sin-o nga tawo nga matinlo, ang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

⁹ Ang bisan ano nga montora ukon pulongkuan nga ginasakyan sang tawo nga ginapanggwaan di-matinlo.

¹⁰ Ang bisan sin-o nga makatandog sang bisan ano nga butang nga ginpungkoan sang amo nga tawo mangindi-matinlo tubtob sa gab-i. Ang bisan sin-o nga magdala sang bisan ano nga butang nga ginpungkoan sang amo nga tawo kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

¹¹ Kon ang isa ka tawo nga ginapanggwaan, sa wala pa sia makapanghinaw sang iya mga kamot, makatandog sa isa ka tawo, ang tawo nga natandog kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

¹² Ang bisan ano nga sulodlan nga nahimo sa lunang nga matandog sang amo nga tawo kinahanglan buongon kag ang bisan ano nga sulodlan nga nahimo sa kahoy nga iya matandog kinahanglan hugasan.

¹³ “Sa tapos mag-ayo ang tawo sa nagapanggwa sa iya, kinahanglan maghulat sia sing pito ka adlaw, kag dayon labhan niya ang iya mga bayu kag magpaligo sa tubig sa tuboran, kag manginmatinlo sia.

¹⁴ Sa ikawalo nga adlaw magadala sia sing duha ka bilog nga pating ukon duha ka mga tukmo sa pwertahan sang Tolda sang akon presensya kag ihatag niya ini sa pari.

¹⁵ Ang pari magadulot sang isa sini subong isa ka halad tungod sa sala kag ang isa subong isa ka halad nga sinunog. Sa sini nga paagi himuon niya ang tulomanon sa pagpaninlo para sa amo nga tawo.

¹⁶ “Kon ang isa ka tawo awasan sang iya binhi, dapat paliguan niya ang iya bug-os nga lawas, kag magapabilin sia nga di-matinlo tubtob sa gab-i.

¹⁷ Ang bisan ano nga nahimo sa panapton ukon panit nga naawasan sang binhi, kinahanglan pagalabhan, kag magapabilin nga di-matinlo ini tubtob sa gab-i.

¹⁸ Sa tapos sang paghirupay, ang lalaki kag ang babayi kinahanglan magpaligo, kag magapabilin sila nga di-matinlo tubtob sa gab-i.

¹⁹ “Kon ang isa ka babayi yara ang iya pamulanon, magapabilin sia nga di-matinlo sa sulod sang pito ka adlaw. Ang bisan sin-o nga makatandog sa iya mangindi-matinlo tubtob sa gab-i.

²⁰ Ang bisan ano nga iya ginapungkuan ukon ginahigdaan sa tion nga yara ang iya pamulanon mangindi-matinlo.

^21-23 Ang bisan sin-o nga makatandog sang iya higdaan ukon sang bisan ano nga butang nga iya ginpungkoan kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

²⁴ Kon ang isa ka lalaki magpakighirop sa iya sa tion nga yara ang iya pamulanon, nadagtaan ang amo nga lalaki sang iya pagkadi-matinlo kag magapabilin sia nga di-matinlo sa sulod sang pito ka adlaw, kag ang bisan ano nga higdaan nga iya ginahigdaan mangindi-matinlo.

²⁵ “Kon ang isa ka babayi ginapanggwaan sing dugo sa sulod sang pila ka adlaw wala labot sang iya pamulanon, ukon ang pagpanggwa sang dugo sa iya nagapadayon pa bisan tapos na ang iya pamulanon, magapabilin sia nga di-matinlo tubtob nga may nagapanggwa pa nga dugo sa iya subong sang tinion sang iya pamulanon.

²⁶ Ang bisan ano nga higdaan nga iya ginahigdaan kag ang bisan ano nga butang nga iya ginapungkuan mangindi-matinlo sa sina nga tinion.

²⁷ Ang bisan sin-o nga makatandog sini mangindi-matinlo kag kinahanglan maglaba sang iya mga bayu kag magpaligo, kag magapabilin sia nga di-matinlo tubtob sa gab-i.

²⁸ Sa tapos ang pagpanggwa sang dugo sa iya, magahulat sia sing pito ka adlaw, kag dayon manginmatinlo sia.

²⁹ Sa ikawalo nga adlaw magadala sia sing duha ka bilog nga pating ukon duha ka mga tukmo sa pari sa pwertahan sang Tolda sang akon presensya.

³⁰ Ang pari magadulot sang isa sini subong isa ka dulot tungod sa sala kag ang isa subong halad nga sinunog, kag sa sini nga paagi himuon niya ang tulomanon sa pagpaninlo para sa iya.

³¹ “Gani paandaman mo ang mga tawo sang Israel nahanungod sang ila pagkadi-matinlo, agod nga indi nila madagtaan ang Tolda sang akon presensya, nga yara sa tunga sang kampo. Kon himuon nila ini mapatay sila.”

³² Amo ini ang mga pagsulondan nahanungod sang tawo nga ginapanggwaan kag ginaawasan sang iya binhi,

³³ subong man sang babayi sa tion sang iya pamulanon, ukon sang tawo nga nakapakighirop sa isa ka babayi nga di-matinlo.