Levitico 1 - Maayong Balita nga Biblia (2012)

Mga Halad nga Sinunog sing Bug-os

¹ Ang Ginoo nga yadto didto sa Tolda sang iya presensya nagtawag kay Moises kag ginhatagan sia sining masunod nga mga pagsulondan

² nga pagatumanon sang mga Israelinhon kon sila magdulot sing mga halad. Nagsiling ang Ginoo: “Ang bisan sin-o nga magdulot sing isa ka sapat subong nga halad, mahimo nga magdulot sia sang isa sang iya mga baka ukon isa sang iya mga karnero ukon kanding.

³ Kon magdulot sia sang isa sang iya mga baka subong isa ka halad nga sinunog, dapat magdala sia sang isa ka toro nga baka nga wala sing bisan ano nga depekto. Kinahanglan dalhon niya ini sa pwertahan sang Tolda sang akon presensya agod akon sia mabaton.

⁴ Itungtong niya ang iya kamot sa ulo sang iya ginahalad, kag akon ini pagabatunon subong isa ka halad sa pagkuha sang iya mga sala.

⁵ Ihawon niya ang toro nga baka didto, kag ang mga pari nga kaliwat ni Aaron magahalad sang dugo sa akon, kag dayon iula ini sa apat ka mga kilid sang altar nga yara sa pwertahan sang Tolda.

⁶ Iya dayon panitan ang sapat kag lasaon ini,

⁷ kag ang mga pari magabangdaybangday sang mga kahoy nga inuggatong sa altar kag dabukan ini.

⁸ Dayon ibutang nila sing pasunod sa kalayo ang mga hiniwa nga bahin sang sapat, lakip ang ulo kag ang sapay.

⁹ Dapat hugasan sang tawo ang mga kasudlan kag ang mga tiil nga pangulihi, kag ang pari nga nagaalagad magasunog sang bug-os nga halad sa altar. Ang kahamot sining halad nga kalan-on manginkahalamut-an sa akon, ang Ginoo.

¹⁰ “Kon ang isa ka tawo magdulot sang isa sang iya mga karnero ukon kanding, kinahanglan isa ini ka lalaki nga wala sing bisan ano nga depekto.

¹¹ Iya ini ihawon sa naaminhan nga kilid sang altar, kag ang mga pari magawisik sang dugo sini sa apat ka mga kilid sang altar.

¹² Sa tapos niya ini malasa, ang pari nga nagaalagad magabutang sing pasunod sang tanan nga bahin sini sa kalayo, lakip ang ulo kag ang mga sapay.

¹³ Kinahanglan hugasan sang tawo ang mga kasudlan kag ang mga tiil nga pangulihi, kag ang pari magadulot sang halad sa akon kag magasunog sang bug-os nga halad sa altar. Ang kahamot sining halad nga kalan-on manginkahalamut-an sa akon, ang Ginoo.

¹⁴ “Kon ang isa ka tawo maghalad sang isa ka pispis subong isa ka halad nga sinunog, kinahanglan isa ini ka pating ukon tukmo.

¹⁵ Dalhon ini sang pari sa altar, lubagon niya ang liog sini, kag sunogon ang ulo sini sa altar. Patuloon niya ang dugo sini sa kilid sang altar.

¹⁶ Kuhaon niya ang balunbalonan lakip ang sulod sini, kag ihaboy ini sa nasidlangan nga kilid sang altar sa diin ginabutang ang mga abo.

¹⁷ Uyatan niya ini sa mga pakpak kag pihakon ang iya lawas, nga indi mautas ang mga pakpak, kag dayon sunogon ini sing bug-os sa altar. Ang kahamot sining halad nga kalan-on manginkahalamut-an sa akon, ang Ginoo.