Jonas 1 - Maayong Balita nga Biblia (2012)

Si Jonas Wala Magtuman sa Ginoo

¹ Isa ka adlaw, ang Ginoo nagsiling kay Jonas nga anak ni Amitai,

² “Magkadto ka sa Ninive, inang daku nga siudad, kag magwali batok sa sini kay nahibaluan ko kon daw ano kalaut sang iya pumoluyo.”

³ Pero sa baylo, si Jonas nagpadulong sa lain nga lugar sa pagpalagyo gikan sa Ginoo. Nagkadto sia sa Jope sa diin may nakita sia nga sakayan nga manugtulak sa España. Nagbayad sia sang iya plete kag nagsakay sia upod sa mga sakayanon padulong sa España, sa diin makapahilayo sia sa Ginoo.

⁴ Pero ang Ginoo nagpadala sing mabaskog nga hangin sa dagat. Tama gid kabaskog ang bagyo sa bagay nga may katalagman nga maguba ang sakayan.

⁵ Hinadlukan gid ang mga sakayanon kag ang tagsatagsa nagpangayo sing tabang sa iya kaugalingon nga dios. Dayon agod mahaganhagan ang katalagman, gintagbong nila ang kargamento sang sakayan sa dagat. Pero si Jonas nakapanaog na sa naidalom nga bahin sang sakayan kag naghigda, kag nagtulog sing mahamuok.

⁶ Nakit-an sia didto sang kapitan sang sakayan kag nagsiling sa iya, “Hoy, ngaa nagatulog ka pa? Magbangon ka kag magpangayo sing tabang sa imo dios. Ayhan makatalupangod sia sa aton kag luwason niya kita.”

⁷ Dayon nagsinilingay ang mga sakayanon, “Maggabutgabot kita agod nga mahibaluan naton kon sin-o ang kabangdanan nga naabtan kita sining katalagman.” Ginhimo nila ini, kag nagabutan ang ngalan ni Jonas.

⁸ Gani nagsiling sila sa iya, “Karon sugiri kami! Sin-o bala ang kabangdanan sini? Ano ang ginahimo mo diri? Taga-diin ka? Sa diin ka nga pungsod naghalin?”

⁹ Nagsabat si Jonas, “Isa ako ka Hebreo. Ako nagasimba sa Ginoo, ang Dios sang langit, nga nagtuga sang dagat kag sang duta.”

¹⁰ Si Jonas nagsugid sa ila nga nagapalagyo sia sa Ginoo. Hinadlukan ang mga sakayanon kag nagsiling sila sa iya, “Tama gid kalain ang imo ginhimo!”

¹¹ Nagbaskog nga nagbaskog ang bagyo gani ang mga sakayanon nagpamangkot sa iya, “Ano ang himuon namon sa imo agod mag-untat ang bagyo?”

¹² Nagsabat si Jonas, “Itagbong ninyo ako sa dagat, kag magauntat ang bagyo. Nahibaluan ko nga ako ang kabangdanan nga nag-abot ining mabaskog nga bagyo sa inyo.”

¹³ Sa baylo nga tumanon nila ang ginsiling ni Jonas gintudohan sang mga sakayanon ang paggaod agod nga magpahigad ang sakayan, pero ang bagyo nagbaskog pa gid kag indi sila makahalin.

¹⁴ Gani nagpanawag sila sa Ginoo, “Nagapangamuyo kami, O Ginoo, indi kami pagsiluti tungod sang amon pagpatay sini nga tawo! Ikaw, O Ginoo, ang may salabton sini tanan, kag ikaw ang nagahimo sini.”

¹⁵ Dayon ginhakwat nila si Jonas kag gintagbong sia sa dagat kag sa gilayon naglinaw.

¹⁶ Tungod sini ang mga sakayanon hinadlukan gid sa Ginoo gani nagdulot sila sing halad kag nagpanaad sa pag-alagad sa iya.

¹⁷ Ang Ginoo nagsugo sang isa ka daku nga isda sa paglamon kay Jonas, kag didto sia sa tiyan sang isda sa sulod sang tatlo ka adlaw kag tatlo ka gab-i.