Ester 5 - Maayong Balita nga Biblia (2012)

Gin-agda ni Ester ang Hari kag si Haman sa Isa ka Bangkite

¹ Sa ikatlo nga adlaw sang iya pagpuasa, si Ester nagsuksok sang iya bayu bilang rayna kag nagsulod kag nagtindog sa nasulod nga korte sang palasyo nga nagaatubang sa kwarto sa diin yara ang trono. Didto sa sulod sang palasyo, ang hari nagapungko sa iya harianon nga trono nga nagaatubang sa pwerta.

² Sang makita sang hari ang rayna nga nagatindog sa korte, nabihag gid sia sang rayna kag gin-untay niya kay Ester ang setro nga bulawan nga iya ginauyatan. Dayon nagpalapit si Ester kag gintandog ang punta sang setro.

³ Ang hari nagpamangkot sa iya, “Ano bala ang luyag sang Rayna? Ano bala ang imo ginapangayo? Bisan ang katunga sang akon ginharian pagaihatag ko sa imo.”

⁴ Si Ester nagsabat, “Kon luyag mo, Mahal nga Hari, ginaagda ko ikaw kag si Haman sa bangkite nga akon gin-aman sa imo karon nga gab-i?”

⁵ Dayon ang hari nagmando nga ipasugat si Haman sa gilayon agod matuman ang pangabay ni Ester. Gani ang hari kag si Haman nagkadto sa bangkite nga gin-aman ni Ester.

⁶ Sang nagainom sila sing bino, ang hari nagsiling kay Ester, “Ang bisan ano nga pangayuon mo sa akon pagaihatag ko sa imo. Ang bisan ano nga ipangabay mo sa akon, bisan ang katunga pa sang akon ginharian, matuman ini.”

⁷ Si Ester nagsabat,

⁸ “Kon magpasugot ang Mahal nga Hari sa akon pangabay luyag ko agdahon liwat ikaw kag si Haman sa isa ka bangkite buas nga akon ihanda para sa imo. Didto ko isugid sa imo ang akon ginapangayo.”

Si Haman Nagplano sa Pagpatay kay Mardoqueo

⁹ Sang paggwa ni Haman halin sa bangkite manayanaya ang iya guya kag malipayon. Pero sang makita niya si Mardoqueo sa pwerta sang palasyo nga wala magtindog ukon magsapak sa iya sang sia nag-agi, naakig gid sia.

¹⁰ Pero ginpunggan niya ang iya kaugalingon kag nagpauli. Dayon gin-agda niya ang iya mga abyan sa iya balay kag ginsingganan niya ang iya asawa nga si Seres sa pagbuylog sa ila.

¹¹ Ginpabugal niya sa ila kon daw ano ka manggaranon sa iya, ang kadamuon sang iya mga anak nga lalaki kag kon paano sia ginpasaka sang hari sa palangakuan labaw pa sang sa iban nga mga opisyales kag mga alagad.

¹² Si Haman nagsiling pa gid, “Wala labot sini, si Rayna Ester wala gid sing iban nga gin-agda kundi ako gid lang sa pag-upod sa hari sa bangkite nga iya ginhanda, kag gin-agda pa gid ako liwat sa bangkite upod sa hari buas.

¹³ Pero ini tanan wala sing pulos sa akon kon makita ko nga yara pa sa gihapon sa pwerta sang palasyo inang Judio nga si Mardoqueo.”

¹⁴ Gani dayon ang iya asawa kag ang tanan niya nga mga abyan nagsiling sa iya, “Abi kon magpahimo ka sing bitayan nga setentay singko ka tapak ang kataason kag buas sa aga pangayua sa hari nga bitayon si Mardoqueo sa sini. Dayon manginmalipayon ka sa pag-upod sa hari sa bangkite.” Si Haman naghunahuna nga maayo ini nga plano, gani nagpahimo sia sang bilitayan.