VaHevelu 1 - Livulu lya Shukulu Kalunga

Lijwi lya Njambi ali Munendi

¹ Ku san̄ulu Njambi wendekele kuli vakukulwila vetu ali vaka-kwimanena visimbu vyavingi na mu vingila vyeka na vyeka,

² oloni a matangwa ano akukotokela nendeka kuli yetu ali Munendi, uje yanapwisa shwana ya vyuma vyoshe, co ali ikeye lalo watangele vyuma vyoshe.

³ Ikeye kutwa kwa ceke ca vumpau vwa Njambi, ikeye vene cifwa ca Njambi vavenya, akukolesa vyoshe mu kaye koshe na lijwi lyendi lya nzili. Omo nashokolola laja ngila ngeci vivi vya vanu voshe vavisambese, co watumbamene mwilu ku livoko lya cilyo lya Njambi, Muka-nzili yoshe.

Nzili ya Muna Njambi

⁴ Mwana vamupwisile wakama kuhyana tungelo, ngwe ku lizina lije lyamwanene Njambi lyakuhyana mazina avo.

⁵ Omwo Njambi kendekele kuli umo wa tungelo twendi ngwendi, “Yove unapu u Munange, litangwa lya lelo njinakukiti.” Naimo simbu yai Njambi nendeka kuli kangelo umo ngwendi, “Yange njikapwa nji Ishe, co ikeye akapwa Munange.”

⁶ Oloni omo Njambi wakele kuyehi nakutuma Munendi wa ntwatwa mu kaye, co wendekele ngwendi, “Tungelo voshe va Njambi vanapande kumulemesa.”

⁷ Oloni kuli tungelo Njambi wendekele ngwendi, “Njambi napwisa tungelo twendi lihunzi, co ikeye napwisa vangamba vendi milangi ya tuhya.”

⁸ Oloni nameme ngoco ali Mwana, Njambi wendekele ngwendi, “Litanda lyove, Yove Njambi, likakala ku myaka yoshe! Washwana vanu vove na vushunga.

⁹ Wazema vushunga, co wazinda vuvi. Ngecivene, Njambi, Njambi yove nakuvwavesa na mazi akujolela kuhyana vakweni.”

¹⁰ Co ikeye wendekele lalo ngwendi, “Yove, Shukulu Kalunga avushangumukilo watangele kaye, co melu anapu vipangi vya mavoko ove.

¹¹ Vikevyo vyoshe vikaita, oloni yove ukakala, vikevyo vyoshe vikakuluvala ngwe vuzalo vwalaja.

¹² Ukavyeteka ngwe cikoveyo, vikakuluvala ngwe vuzalo. Oloni yove kuwesi kukuluvala, co mwonyo wove kuwesi kuhwa.”

¹³ Njambi nalumo lwai wendekele kuli tungelo twendi ngwendi, “Tumbama kuno ku livoko lyange lya cilyo, noo njikafungulula vove.”

¹⁴ Tungelo vapwa vikajo? Vapwa minzinzime vaje vakapangela Njambi, co avatuma mukukwasa vaje valinakutambula kwovoka.