Kutuuka 1 - Livulu lya Shukulu Kalunga

VaIsalele vavayandesa na muuka mu Ingito

¹ Awa akewo mazina a vana va Yakomba va vanalume vaje vaaile navo ku Ingito, munu na munu na naanga yendi, mazina avo,

² Luvena, na Simyoni, na Levi, na Yunda,

³ na Isakale, na Zembuloni, na Mbenjemani,

⁴ na Ndani, na Nafetali, na Ngande, na Ashele.

⁵ Vatekulwila va Yakomba voshe vapwile makumi atanu na avali. Yosefa ikeye wakele laja mu Ingito.

⁶ Omo kwetile simbu, Yosefa amo na vandolome vendi voshe na cisemwa cavo coshe vatsile,

⁷ oloni vatekulwila vavo, vaIsalele, vakitile nakutuma manene, co vapwile vaka-nzili, ngecivene, vatumine mu lifuti lya Ingito mwoshe.

⁸ Asinoni mwene wamuhwa, uje kazivukile Yosefa, washwanene mu Ingito.

⁹ Ikeye wendekele kuli vanu vendi ngwendi, “Ava vaIsalele vanakiti nakutuma manene, valinakutuzivisa lyova.

¹⁰ Ngecivene, tuvakwateleni mana kutewa vakatuma manene, co cikapwa ngeci omo nzita ikaija amo vakalipandakana na vitozi vetu nakutulwisa, co vakavomboloka nakutunda mu lifuti.”

¹¹ Ngecivene, vaka-Ingito vaakele vantwama vaka-kupangesa ngeci vayandese vaje vanu nakupangesa mwamuvi vaIsalele. VaIsalele vatungilile mwene vinganda vivali, Pitome na Lamesese kupwa vishete vyakutulikila vyakulya.

¹² Nameme vaka-Ingito vayandesele manene vaIsalele, oloni vaIsalele vakitile manene nakushandokela mu lifuti mwoshe. Ngecivene, vaka-Ingito vakele na lyova ali vaIsalele.

¹³ Co vaka-Ingito vapangesele vaIsalele na muuka na cikela,

¹⁴ vavaanene vipangi vyakukaluwa vyakutika vuma nakulinga ndopi, nakupanga mu mahya avo. Voshe vavasindiiye kupanga vipangi vyakama kujeneka kuvazivila mema ku mbunge.

¹⁵ Asinoni mwene wa Ingito wendekele kuli vifungwizi va vaHevelu mazina avo, Shifela, na Puwa,

¹⁶ ngwendi, “Omo mulinga vufungwizi ali vanakazi va vaHevelu, nga vakita mwana wa munalume, co mutsiyeni, oloni nga wa munakazi mweceleni ayoye.”

¹⁷ Oloni vaje vifungwizi vakomokele Njambi, kuvalingile ngwe muje mwashikile mwene, vecelele na vimbututu va vanalume vayoye.

¹⁸ Co mwene wasanene vaje vifungwizi wavehwile ngwendi, “Omwo vikajo munalingi eci? Omwo vikajo mulinakwecelela vimbututu va vanalume vayoye?”

¹⁹ Vamukumbulwile ngwavo, “Vanakazi va vaHevelu kuvalifwile ngwe vanakazi va vaka-Ingito embwe, omwo vakevo vatakama. Co vakakiti vwasi-vwasi simbu kanda cifungwizi ete kuli vakevo.”

²⁰ Ngecivene, Njambi walingile mwamuvwa kuli vaje vifungwizi vavali, vaIsalele vakele nakukita nakutuma manene.

²¹ Co capwile ngeci omwo vifungwizi vakomokele Njambi, co Njambi wavezikisile vinaanga.

²² Asinoni akukotoka mwene washikile vanu vendi voshe ngwendi, “Vana va vaHevelu va vanalume voshe vombileni mu Ndonga ya Nailo, oloni eceleni lika vimbututu va vanakazi vayoye.”