SALMI 1 - IL-BIBBJA IL-KOTBA MQADDSA

Salm 1 L-EWWEL KTIEB Salmi 1—41 L-hena veru tal-bniedem

¹ Hieni l-bniedem li ma jimxix fuq il-pariri tal-ħżiena, li ma jiqafx fi triq il-ħatjin, li ma joqgħodx fil-laqgħat taż-żeblieħa;

² imma fil-liġi tal-Mulej hi l-għaxqa tiegħu, lejl u nhar jaħseb fil-liġi tiegħu.

³ Hu bħal siġra mħawla ħdejn nixxigħat tal-ilma li tagħmel il-frott fi żmienha, u l-weraq tagħha ma jidbielx; hu jirnexxi f’kulma jagħmel.

⁴ Mhux hekk il-ħżiena, mhux hekk; iżda huma bħal tibna li jtajjarha r-riħ.

⁵ Għalhekk il-ħżiena ma jifilħux għall-ħaqq, ma joqogħdux il-ħatja fil-ġemgħat tat-tajbin.

⁶ Għax triq it-tajbin il-Mulej jafha; imma triq il-ħżiena tintemm fix-xejn.