ĠWANNI 1 - IL-BIBBJA IL-KOTBA MQADDSA

Kapitlu 1 Il-Verb sar bniedem

¹ Fil-bidu kien il-Verb, u l-Verb kien ma’ Alla, u l-Verb kien Alla.

² Hu kien fil-bidu ma’ Alla.

³ Kollox bih sar, u xejn ma sar mingħajru; kulma sar

⁴ kellu l-ħajja fih, u l-ħajja kienet id-dawl tal-bnedmin.

⁵ Id-dawl jiddi fid-dlam, imma d-dlam ma għelbux.

⁶ Kien hemm raġel mibgħut minn Alla, jismu Ġwanni.

⁷ Dan ġie bħala xhud, biex jixhed għad-dawl, biex bih kulħadd jemmen.

⁸ Ġwanni ma kienx id-dawl, imma ġie biex jixhed għad-dawl,

⁹ dak id-dawl veru, li jdawwal kull bniedem, huwa u ġej fid-dinja.

¹⁰ Kien fid-dinja, u d-dinja saret bih, imma d-dinja ma għarfitux.

¹¹ Ġie f’daru, u niesu ma laqgħuhx.

¹² Imma lil dawk li laqgħuh tahom is-setgħa li jsiru wlied Alla, dawk li jemmnu f’ismu,

¹³ li twieldu mhux mid-demm, anqas mill-ġibda tal-ġisem, u anqas mir-rieda tal-bniedem, iżda minn Alla.

¹⁴ U l-Verb sar bniedem u għammar fostna, u aħna rajna l-glorja tiegħu, il-glorja li għandu mill-Missier bħala Ibnu l-waħdieni, mimli bil-grazzja u l-verità.

¹⁵ Ġwanni ta xhieda fuqu meta għajjat u qal: “Dan hu li għalih għedtilkom, ‘Jiġi warajja, imma hu aqwa minni, għax kien minn qabli.’ ”

¹⁶ Għax mill-milja tiegħu aħna lkoll ħadna, grazzja fuq grazzja.

¹⁷ Alla ta l-Liġi permezz ta’ Mosè imma l-grazzja u l-verità seħħew permezz ta’ Ġesù Kristu.

¹⁸ Lil Alla għadu ħadd ma rah; imma għarrafhulna l-Iben il-waħdieni ta’ Alla, li hu fi ħdan il-Missier.

Ix-xhieda ta’ Ġwanni l-Battista

¹⁹ Ix-xhieda ta’ Ġwanni kienet din: meta l-Lhud ta’ Ġerusalemm bagħtu għandu xi qassisin u Leviti biex jistaqsuh, “Int min int?”,

²⁰ hu stqarr bla ma ċaħad: “Jien m’iniex il-Messija.”

²¹ Huma reġgħu staqsewh: “Mela min int? Elija?” “M’iniex,” qalilhom. “Int il-Profeta?” “Le,” weġibhom.

²² Imbagħad qalulu: “Mela min int? Biex nagħtu tweġiba lil dawk li bagħtuna. Min tgħid li int?”

²³ U hu wieġeb kif qal il-profeta Isaija: “Jiena l-leħen ta’ wieħed jgħajjat fid-deżert: ‘Wittu t-triq tal-Mulej.’ ”

²⁴ Issa dawk il-messaġġiera kienu min-naħa tal-Fariżej.

²⁵ Huma staqsewh: “Mela kif qiegħed tgħammed la m’intix il-Messija, u la Elija u lanqas il-Profeta?”

²⁶ “Jiena ngħammed bl-ilma,” weġibhom Ġwanni, “imma f’nofskom hemm wieħed li intom ma tafuhx,

²⁷ u li ġej warajja; jiena anqas ma jistħoqqli nħoll il-qafla tal-qorq tiegħu.”

²⁸ Dan ġara f’Betanja, in-naħa l-oħra tal-Ġordan, fejn Ġwanni kien jgħammed.

Il-Ħaruf ta’ Alla

²⁹ L-għada Ġwanni ra lil Ġesù riesaq lejh, u qal: “Araw il-Ħaruf ta’ Alla, li jneħħi d-dnub tad-dinja.

³⁰ Dan hu li għalih għedtilkom, ‘Warajja ġej bniedem li hu aqwa minni, għax kien qabli.’

³¹ Anqas jien stess ma kont nafu; imma jien għalhekk ġejt ngħammed bl-ilma, biex hu jkun mgħarraf lil Iżrael.”

³² U Ġwanni xehed għalih u qal: “Jiena rajt l-Ispirtu nieżel mis-sema bħal ħamiema u joqgħod fuqu.

³³ Tabilħaqq, anqas jien ma kont nafu; imma dak li bagħatni ngħammed bl-ilma, hu stess qalli, ‘Fuq min tara l-Ispirtu jinżel u joqgħod, dak hu li jgħammed bl-Ispirtu s-Santu.’

³⁴ Dan rajtu b’għajnejja, u għalhekk xhedt, ‘Dan hu l-Iben ta’ Alla’.”

L-ewwel dixxipli

³⁵ L-għada Ġwanni raġa’ kien hemm ma’ tnejn mid-dixxipli tiegħu.

³⁶ Ħares lejn Ġesù li kien għaddej minn hemm, u qal: “Araw il-Ħaruf ta’ Alla.”

³⁷ Iż-żewġ dixxipli semgħuh jgħid dan, u marru wara Ġesù.

³⁸ Ġesù dar u rahom mexjin warajh, u qalilhom: “Xi tridu?” Iżda huma staqsewh: “Fejn toqgħod, Rabbi?” - li tfisser Mgħallem.

³⁹ Hu weġibhom: “Ejjew u taraw.” U marru miegħu u raw fejn kien joqgħod, u dak in-nhar baqgħu miegħu. Kien ħabta tal-għaxar siegħa.

⁴⁰ Wieħed mit-tnejn li semgħu x’kien qal Ġwanni u marru wara Ġesù kien Indrì, ħu Xmun Pietru.

⁴¹ L-ewwel ma għamel mar isib lil ħuh Xmun, u qallu: “Sibna l-Messija” - li tfisser Kristu.

⁴² U ħadu għand Ġesù. Ġesù ħares lejh u qallu: “Inti Xmun, bin Ġwanni. Inti tissejjaħ Kefa” - jew Pietru.

Ġesù jsejjaħ lil Filippu u ’l Natanjel

⁴³ L-għada Ġesù ddeċieda li jitlaq lejn il-Galilija. Sab lil Filippu u qallu: “Ejja warajja.”

⁴⁴ Filippu kien minn Betsajda, il-belt ta’ Indrì u Pietru.

⁴⁵ Filippu sab lil Natanjel u qallu: “Sibna lil dak li fuqu kitbu Mosè fil-Liġi, u l-profeti fil-kotba tagħhom: Ġesù minn Nazaret, bin Ġużeppi.”

⁴⁶ Qallu Natanjel: “Tista’ toħroġ xi ħaġa tajba minn Nazaret?” “Ejja u ara,” wieġbu Filippu.

⁴⁷ Meta Ġesù ra lil Natanjel riesaq lejh qal għalih: “Ara, dan tassew wieħed minn Iżrael li jixraqlu dan l-isem; ma hemm ebda qerq fih.”

⁴⁸ Natanjel staqsieh: “Kif sirt tafni?” U Ġesù wieġbu: “Rajtek taħt is-siġra tat-tin qabel ma sejjaħlek Filippu.”

⁴⁹ “Rabbi,” qallu Natanjel, “int l-Iben ta’ Alla, inti s-sultan ta’ Iżrael!”

⁵⁰ Ġesù wieġbu: “Qiegħed temmen għax għedtlek li rajtek taħt is-siġra tat-tin? Għad tara ħwejjeġ akbar minn dawn!”

⁵¹ U żied jgħidlu: “Tassew tassew ngħidilkom, għad taraw is-sema miftuħ u l-anġli ta’ Alla telgħin u niżlin fuq Bin il-bniedem.”