Nahúm 1 - Biblia Maya de Yucatán con DC 1992

Kue' cu sutic u jeel loob yéetel tuláacal u p'uja'anil

¹ U dzíibil u bóobato'ob Nahúm j Elcosi je'el bix chíicbesa'abic ti'e'. Lela' leti' le péectzil j túuxta'ab ti' u noj caajil Nínive.

² Yuumtzile', jun túul Ku u p'eec u ke'exel yéetel cu sutic xan u jeel loob: cu sutic u jeel loob ti' máaxo'ob cu katbeltico'ob, cu kuuxtal ti' u aj p'eeco'ob.

³ Yuumtzile' xaan u p'u'ujul, ba'ale' sen nojoch u páajtalil, ma' bíin u p'at x ma' jaadzil máax yaan u si'ipili'. Yuumtzile' cu xíimbal tu yóokol chac ikal, le múuyalo'obo' leti' u ma'ay lu'umil u yooc.

⁴ Cu keyic le ka'anabo', cu sap'ic xan. Cu beetic u sa'ap'al tuláacal le áalcab ja'obo'. U káaxilo'ob Basán yéetel u pu'uquilo'ob Carmeloe' cu tijilo'ob, cu tijil xan u nicte'ilo'ob Líbano.

⁵ Tu táane' cu quiquilanquilo'ob le witzo'obo', cu yíibil xan le jo'ol lu'umo'obo'. Tuláacal yóokolcaab cu quíilbal le quéen u yile'; bey xan tuláacal le máaxo'ob cajnáalo'obo'.

⁶ ¿Máax bíin páatac u p'áatal wa'atal tu táan u p'uja'anil? ¿Máax je'el páajtal u mukulmuuk yéetel u p'uja'anile'? U dzíiquile' cu yáalal bey káake', tu táane' cu búujul ca'a xóot'il le chaway tuuno'obo'.

⁷ Yuumtzile' utz; leti'e' jun p'éel ta'acbesaj tu kiinil yaj óolal: cu canantic máaxo'ob cu yocsaj óolto'ob.

⁸ Ba'ale' je'el bix le búulcabal tuláacal ba'al cu míistique', cu xu'ulsic le máaxo'ob cu katicuba'ob ti'e'; éekjoch'e'enil bíin náacpachtic u aj p'eeco'ob.

⁹ ¿Ba'axi' ca jok jo'oltique'ex u ti'al a beetique'ex kaas ti' Yuumtzil? ¡Leti'e' bíin u láaj xu'ulse'ex! ¡Mix máac cu páajtal u mukulmuuk ca'a téen tu yéetel!

¹⁰ Beyo'ob sa'awa'an ki'ixe', beyo'ob tiquin sojol bíin láaj tóocaco'obe'.

¹¹ Nínive, ti' teech jóok le máax jokjo'oltic ba'ax kaas tu yo'olal Yuumtzilo': jun túul j loolob tzol xiquin.

¹² Le t o'olal cu ya'alic Yuumtzil ti' u caajal. Quex tumen sen mu'uka'ano'ob yéetel sen ya'abo'ob le j asiriobo' bíin láaj xu'ulsa'aco'ob yéetel bíin tu'ubsa'aco'ob. Tene' tin beetaj a mukyaj, ba'ale' ma' bíin in ca'a beet a mukyaji'.

¹³ Bíin in xe'exet' le yucalche' yaan ta caalo', bíin in cotz a jokenjookilo'ob.

¹⁴ U ajawil Nínive, Yuumtzile' dzo'oc u ya'alic ba'ax bíin úuchuc ti' teech: Ma' bíin yanac a ch'i'ibal u ti'al ca a dzáa a kaaba' ti'i'; bíin in jen u kulnaj a beetbil kuilo'ob bey xan a beetbil kuob yéetel u yoochelo'ob, ti' bíin in muquechi', tumen teche' p'ecbe'enech.

U péectzilil u pa'abal u muuk Nínive

¹⁵ ¡Pacte'ex! ¡Táan u taal tu yóokol le pu'uco'ob le u aj taasaj u t'aanil u péectzililo'ob jéedzeli'! Judá beet u kinbesajilo'ob a qui'imac óolo'ob; dzo'ocbes a séeb chi'ob. Mix bikin bíin ca'a niclaco'ob le loolob máaco'ob ta lu'umil; dzo'oc u jach xu'ulsa'alo'ob.