Miqueas 1 - Biblia Maya de Yucatán con DC 1992

U p'is óolal Ku tu yóokol Samaria

¹ Lela' leti' le túuchi' t'aan tu ya'alaj Yuumtzil ti' Miqueas j moresetil, bey xan le j e'esa'ab ti' tu yo'olal Samaria yéetel Jerusalén, tu kiinilo'ob u ajawilo'ob Jotán, Acaz yéetel Ezequías tu lu'umil Judá.

² Caaje'ex, u'uye'ex tuláacale'ex lela'; u cajnáalile'ex tuláacal le lu'umo'oba', ch'en xiquinene'ex ma'alob. Yuumtzile', bíin u tac a poole'ex likbal tu kulnaj.

³ Yuumtzile' bíin jóokoc tu cúuchil tu'ux cajacbal bíin taalac xíimbalil tu yóokol u ca'analil le pu'uco'obo'.

⁴ Tu yáanal u yooco'ob bíin yíibic le pu'uco'obo' je'el bix u yíibil quib dza'an te j káako', le táax kóom lu'umo'ob xano' bíin je'epajac ca'a búujil je'el bix u bu'ujul tumen u yáalcab sen ya'ab ja'e'.

⁵ Tuláacal lela' bíin úuchuc tu yo'olal u dzu'uyil u pucsi'ikal u caajil Jacob, tu yo'olal u keebano'ob u ajawil Israel. ¿Tu'ux yaan u dzu'uy pucsi'ikalil Jacob? ¡Ti' yaan tu caajil Samariae'! ¿Tu'ux yano'ob u kulnajilo'ob u beetbil kuob Jacob? ¡Ti' yano'ob jach Jerusalene'!

⁶ Le t o'olal cu ya'alic Yuumtzil: U caajil Samariae' bíin in sut jun p'éel x lab pakil, jun p'éel jáanil lu'um u ti'al u pa'akal uvaob. U tuunichilo'ob le caajo' bíin in ki'itbes te j táax kóom lu'umo' bíin in beet u chíicpajal u chuun pakilo'ob.

⁷ Bíin láaj xe'exet'pajac u beetbil kuob, bíin xan láaj tóoca'ac u quili'ich chuun che'ob. Bey tumen j beeta'abo'ob yéetel u tojol le x cáacbacho'obo', bíin suunaco'ob xan u tojol x cáacbacho'ob.

Miquease' cu yáacam okol

⁸ Le t o'olal bíin okolnaquen tu yéetel nojoch óotzil óolal; Let o'olal bíin máanaquen x ma' xanabil yéetel x ma' nookil, táan in awat okol bey jun túul j káaxil peeke', táan xan in awat je'el bix u chichanil jun túul avestruse'.

⁹ Tumen u quimpaja'anil Samariae', mina'an dzaac u ti'al: dzooc u náacpachtic Judá, dzo'oc u kuchul tac Jerusalén, u caajil tu'ux caja'an in caajal.

¹⁰ Lela', ma' a wa'alique'ex ti' u cajnáalilo'ob Gat; ma' u jo'op'ol a wokole'ex. Bablaba'ex ichil u lu'umil Bet-le-afra, tu yo'olal ki'inamil.

¹¹ ¡U cajnáalile'ex safir, xeene'ex táanxel lu'umil, xene'ex chacnule'ex, chuupe'ex yéetel subtzilil! ¡U cajnáalilo'ob Zaanane' ma' bíin jóokoco'obi'! ¡Táan u sen úuchul okol Bet-esel, te'exe' bíin p'áataque'ex x ma' áantajil!

¹² Le máaxo'ob cajnáalo'ob Marote', cu ch'o'och'oticuba'ob tu yo'olal ki'inamil tumen táan u yaayantico'ob u yu'ubicuba'ob utz, tumen Yuumtzile' dzo'oc u beetic u kuchul le loob tac tu jool caajilo'ob Jerusalén.

¹³ Te'exe' u cajnáalile'ex Laquis, ta dzu'uyquintaje'ex a wóole'ex je'el bix Israele', ta wo'olale'ex j kebanchaj Sión, leche'ex le tzíiminilo'ob tu bolano'obo'.

¹⁴ A'ale'ex tac mix bikin ti' Moreset-gat. U caajil Aczibe' bíin meyajnac x léechebil ti' u ajawilo'ob Israel.

¹⁵ Yuumtzile' cu ya'alic: Te'ex u cajnáalile'ex Maresae', bíin in ca'a túuxt jun túul j pa'a muuk ta wóokole'ex, u asab yéeya'an j xiixib máaquil Israel, bíin xi'ic u jupubáa ichil u yáactunil Adulam.

¹⁶ Teche' u caajil Sión, kolist a jo'ol u ti'al u yila'al táan a mukyaj, tu yo'olal le a paalal a sen yabiltmajo'obo'. Kolist a jo'ol tac quéen p'áatac táax bey u pool jun túul j ch'oome', tumen a paalale' bíin bisa'aco'ob táanxel lu'umil.