Judas 1 - Biblia Maya de Yucatán con DC 1992

Judase' cu dzíib ti' le máaxo'ob t'ana'ano'ob tumen Kuo'

¹ Teen Judas, palitzilen ti' Jesucristo yéetel íidzintzil ti' Jacobo, quin dzíibtic le ju'una' ti' le máaxo'ob t'ana'ano'ob yéetel yaabilta'ano'ob tumen Ku le Taatao', máaxo'ob cananta'ano'ob iquil nupa'anilo'ob yéetel Jesucristo.

² Kame'ex ya'ab ch'a'a óotzilil, jéedzel óolal yéetel yaacunaj.

Le máaxo'ob cu ca'ansico'ob tuuso'ob

³ In yaabilaj sucu'une'ex, nojoch dzíibolal yanji' teen in dzíib te'ex bele' quin wilic u kabéetil in dzíib te'ex u ti'al in káat óoltic te'ex ca ba'atelnaque'ex tu yo'olal le ocsaj óolal j ku'ub chéen jun téenili' ti' le máaxo'ob u ti'alo'ob Kuo'.

⁴ Tumen dze'edzec máaco'ob dzo'oc u yocolo'ob yéetel tuuso'ob, máaxo'ob úuch e'esa'aco'ob tumen le Quili'ich Dzíibo' u ti'al le xot kiin cu najmatico'obo'. Máaco'ob kasa'ano'ob, cu ch'a'ico'ob u siibal utzil c Ku je'el bix u ba'ax o'olalil u ti'al u kaakas cuxtalo'obe' yéetel cu cúulpachcuntico'ob Ku, máax chéen leti' c Yuumil, yéetel c Yuumtzil Jesucristo.

⁵ Quex te'ex a wojele'exe', in káat in ka'ajes te'exe' Yuumtzile', quex tu jóokesaj u caajil Israel ti' Egiptoe', cu dzo'ocole' tu xu'ulsaj le máaxo'ob ichilo'ob ma' táan u yocsaj óolo'obo'.

⁶ Bey xan le ángelo'ob ma' j p'áato'ob tu cúuchilo'obo' ba'ale' tu p'atajo'ob u cajtalilo'obo', Kue' u kalmajo'ob u ti'al u nojoch kiinil le p'is óolo', kaxa'ano'ob mantadz ich éekjoch'e'enil.

⁷ Bey xan Sodoma yéetel Gomorra yéetel le caajo'ob naadztaco'ob ti'obo', lelo'oba' queet je'el bix le ángelo'obo' tu kubajuba'ob u ti'al kebantal ti' u wíinclilo'obe', ca tu cha'ajo'ob u bisa'alo'ob tumen le kebano'ob yano'ob tu contra u wíinclilo'obe', cu p'áatalo'ob bey jun p'éel ca'ansaj u ti'al tuláacal máac, iquil tu mukyajtilo'ob u jaadzil le káak mina'an xu'ulul ti'o'.

⁸ Ba'ale' quex bey anilo' le máaco'ob xana', táan u cuxtalo'ob ich wayako'ob, táan u kebancuntico'ob u wíinclilo'ob, cu cúulpachcuntico'ob u páajtalil Yuumtzil, yéetel cu poch'ico'ob le ca'anal páajtalilo'.

⁹ Arcángel Miguel, le ca j ba'atelnaj tu contra kasiba'ale', táan u t'anal t'aan tu yéetel tu yo'olal u wíinclil Moisese', ma' j kuchpaj u yóol u xot kint yéetel pooch'ilo'obi', ba'ale' chéen tu ya'alaj ti': ¡Yuumtzil ca u keyech!

¹⁰ Ba'ale' le máaco'oba' cu t'aano'ob kaas tu contra le ba'alo'ob ma' u kaj óolo'obo'. Yéetel cu kascunticuba'ob ti' le ba'alo'ob u kaj óolo'obo' tumen bey sijnalo'obo', je'el bix le ba'alche'ob mina'an u na'ato'obo'.

¹¹ ¡Óotzilo'ob! Tumen dzo'oc u bino'ob tu paach ba'ax tu beetaj Caín. Tu yo'olal u náajaltico'ob taakine' dzo'oc u sa'atalo'ob je'el bix Balaam, yéetel cu xu'ulsa'alo'ob je'el bix Coré, máax quíim tu yo'olal u j ma' u'uyaj t'aanil.

¹² Leti'obe' jun p'éel subtalil ti' le kiinbesajo'ob ich yaacunaj yaan ti' te'exo, tu'ux cu janalo'ob yéetel cu yukulo'ob c ma' tziiquilil, yéetel beyo'ob canan j tamano'ob chéen cu cananticuba'ob tu junalo'obe'. Leti'obe' múuyalo'ob mina'an u ja'il cu bisa'alo'ob tumen iik; che'ob ma' táan u yichanquilo' tu kiinil; quimeno'ob ca'a téen; joca'ano'ob pa'ate' yéetel u mootzo'ob.

¹³ Leti'obe' u mu'ukan cuclil ka'anab, táan u túul u subtzil meyajo'ob. Leti'obe' eeko'ob dzo'oc u sa'atalo'ob; xot kinta'ano'ob u ti'al u máanso'ob le kiino'ob mina'an u xuulo' ichil sen éekjoche'enil.

¹⁴ Bey xan Enoc, máax u sieteil cu dzo'ocol Adán, j t'aanaj yéetel u sáasil Ku tu yo'olal lelo'oba' le ca tu ya'alaj: Tin wilaj Yuumtzil táan u taal yéetel u mililo'ob le máaxo'ob u ti'alo'obo'

¹⁵ u ti'al u p'is óolt tuláacal máac yéetel u ti'al u xot kint tuláacal le máaxo'ob kasa'ano'obo' tu yo'olal tuláacal le kaas u beetmajo'ob ichil u kasa'anilo'obo', yéetel tu yo'olal tuláacal le chichich t'aano'ob dzo'oc u ya'ala'al tu contra tumen le kaakas j kebano'obo'.

¹⁶ Leti'obe' cu tutucchi'ob yéetel cu ya'alico'ob ba'al, táan u caxtico'ob u dzo'ocbesico'ob chéen u dzíibolalo'ob. Cu ya'alico'ob t'aano'ob ich ca'anal ichil, yéetel u ti'al u jóokesico'ob wa ba'ax utzil u ti'alo'ob.

Tzol xiquino'ob ti' le j ocsaj óolo'obo'

¹⁷ Ba'ale' te'exe', in yaabilaj sucu'une'ex, ka'ajac te'exe' u apóstolo'ob c Yuumtzil Jesucristoe' j t'aanajo'ob tu yo'olal le ba'alo'oba'

¹⁸ le ca tu ya'alajo'ob te'ex: Ti' le u dzo'oc kiino'obo' yaan u yantal máaco'ob bíin u p'a'asto'ob le quili'ich ba'alo'obo' yéetel bíin cuxlaco'ob je'el bix u káat u kaakas dzíibolalo'obe'.

¹⁹ Lelo'oba' leti'ob máaxo'ob cu beetico'ob u yantal jatzlantáambailo'ob; cu beetico'ob u cuentail u lu'umcabil dzíibolalo'obe' yéetel mina'an le Quili'ich Pixan ti'obo'.

²⁰ Ba'ale' te'exe', in yaabilaj sucu'une'ex, jéedzel p'áatene'ex ti' a quili'ich ocsaj óolale'ex. Payalchi'nene'ex yéetel u páajtalil le Quili'ich Pixano'.

²¹ P'áatene'ex ti' u yaacunaj Ku yéetel pa'ate'ex u ch'a'a óotzilil c Yuumtzil Jesucristo u ti'al cuxtal mina'an u xuul.

²² Ocse'ex le ca'ansajo'oba' tu tuucul le máaxo'ob ca'a p'éel u yóolo'obo'.

²³ Toque'exo'ob, táan a jáampaytique'exo'ob ti' le káako'; yéetel ch'a'ex óotzilil ti' u láak máaco'ob, ba'ale' canantaba'ex, táan a ch'a'a p'ectique'ex tac le nook u kascuntmajo'ob yéetel u kaakas cuxtalo'obo'.

U dzo'oc qui'iqui' t'aan

²⁴ Ti' le máax yaan páajtalil ti' u ti'al u canantique'ex x ma' lúubulil yéetel u ti'al u taasique'ex x ma' kaasil tu táan u nojbe'enil yéetel qui'imac óolale'.

²⁵ Ti' le jun túulili' Ku c Tocsajil tu yo'olal Jesucristo c Yuumtzilo', ti' leti' yanac le nojbe'enilo', le nojochilo', le páajtalilo' yéetel le jalachilo', ma'ili' cáajac le kiino'obo', bejela'e', yéetel u ti'al kiino'ob mina'an u xuul. Amén.