San Juan 1 - Biblia Maya de Yucatán con DC 1992

Le t'aano' tu beetubáa máaquil

¹ Le ca j chu'unpaj tuláacale', yanili' le t'aano'. Le t'aano' ti' yanili' tu yicnal Kue', leti'e' Kuli'e'.

² Ti' u cáajbal túune', leti'e' ti' yanili' tu yicnal Kue'.

³ Tu yo'olal leti'e' Kue' tu beetaj tuláacal ba'al. Ti' le ba'alo'ob yano' mixba'al beeta'ab wa ma' tu yo'olal leti'.

⁴ Ti' leti' yanili' le cuxtalo', le cuxtalo' tu taasaj sáasil ti' máaco'ob.

⁵ Le sáasilila' cu léembal ich éekjoch'e'enil, le éekjoch'e'enilo' ma' páatac u tupqui'.

⁶ Yanji' jun túul máac túuxta'ab tumen Ku, u kaaba'e' Juan.

⁷ J taal u ti'al u ya'al u jaajil tu yo'olal le sáasilo', u ti'al ca ocsaj óolnac tuláacal máac tu yo'olal ba'ax cu ya'alic.

⁸ Juane' ma' leti' le sáasilo'. Leti'e' chéen jun túul máac túuxta'ab u ti'al t'aan tu yo'olal le sáasilo'.

⁹ Le jaajil sáasilo', le cu sáasilcuntic tuláacal máaco'obe', táan u kuchul yóolkolcaab.

¹⁰ Le T'aano' ti' yaan yóokolcaabe'. Quex tumen Ku tu beetaj yóokolcaab tu yo'olal leti'e', u máaquilo'ob yóokolcaabe' ma' tu kaj óoltajo'obi'.

¹¹ J taal ti' jun p'éel yóokolcaab u ti'al, ba'ale' ma' j ka'am tumen le u ti'alo'obo'.

¹² Ba'ale' yaan dze'edzec tu kamajo'ob yéetel tu yocsaj u yóolo'ob ti'. Tu dzaj páajtalil ti'ob u béeychajlo'ob u paalalo'ob Ku.

¹³ Lelo'oba' ma' beyo'ob je'el bix u paalalo'ob máac, cu síijilo'ob ti' u bakel máaque' wa tu yo'olal u dzíibolal wa máax máaquil, ba'ale' u paalalo'ob Ku.

¹⁴ Le t'aano' tu beetubáa máaquil ca j cajlaj ichilo'on. To'one' t ilaj u qui'ichquelemil, u qui'ichquelemil u jun túulili' u Paal le Taatao', chuup yéetel yaacunaj yéetel jaaj.

¹⁵ Juane' j t'aanaj tu yo'olal, ca tu ya'alaj: Lela' leti' le máax t'aanajen tu yo'olal, le ca tin wa'alaj: Le máax cu taal paachal ti' tene' leti' táanil ti' teen, tumen yanili'e' ma'ili' yanaquen tene'.

¹⁶ Tuláacalo'on dzo'oc c kamic ti' u ya'abcach ayikalilo'ob, siibal utzil yóokol siibal utzil.

¹⁷ Le a'almaj t'aano' j dza'ab tu yo'olal Moisés, le yaacunaj yéetel le jaajilo' j taalo'ob tu yo'olal Jesucristo.

¹⁸ Mix jun téen ila'ac Ku tumen mixmáac; ba'ale' u jun túulili' Paal, ti' yaan naadz tu pucsi'ikal le Taatao', leti' dzo'oc u ca'ansic to'on bix Ku.

Juan Bautistae' cu t'aan tu yo'olal Jesucristo

¹⁹ U judíoilo'ob Jerusalene' tu túuxtajo'ob aj kiino'ob yéetel levitaob u ti'al u káato'ob ti' Juan: ¿Teche' máaxech?

²⁰ Leti'e' jach t'áalcab tu ya'aljilac: Ma' teen le Cristoo'.

²¹ Tu káat chi'ito'ob ti' tu ca'a téen: ¿Máaxech túun? ¿Teech wa aj bóobat Elías? Juane' ca tu ya'alaj: Ma' teni'. Cu dzo'ocole' ca tu káat chi'ito'ob ti': ¿Teech wa le aj bóobat bíin taalaco'? Leti'e' tu núucaj: Ma'.

²² Ca túun tu ya'alajo'ob ti' ¿Máaxech túun? Yaan c a'alic ba'ax ta núucaj to'on ti' le máaxo'ob túuxto'ono'. ¿Ba'ax ca wa'alic to'on ta wo'olal?

²³ Juane' ca tu núucaj ti'ob: Tene' jun túul máax cu ka'am a'alic te x tocoy cúuchilo: Nu'ucbese'ex jun p'éel toj bej ti' Yuumtzil, je'el bix tu ya'alaj aj bóobat Isaiase'.

²⁴ Le máaxo'ob j bino'ob t'aan yéetel Juane' j túuxta'abo'ob tumen le fariseobo',

²⁵ ca tu káatajo'ob ti': Wa ma' teech le Cristoo', mix Elías, mix le aj bóobat, ¿ba'axten túun ca dzáic ocja'?

²⁶ Juanae' tu ya'alaj ti'ob: Tene' quin dzáic ocja' yéetel ja', ba'ale' ichile'exe' yaan jun túul máac ma' a kaj óolexi'.

²⁷ Paachil ti' teen cu taal, quex leti' táanil ti' teen. Tene' ma' táan in najmatic in wach'ic mix u táabil u xaanab.

²⁸ Tuláacal lela' j úuch ti' le cúuchil cu kaaba'intic Betábara yaan tu j lakin u ja'il Jordán, tu'ux cu dzáic ocja' Juano'.

Jesús u j taman Yuum Ku

²⁹ Ti' u jeel kiine' Juane' tu yilaj Jesús táan u náadzal tu yicnal, ca tu ya'alaj: Ile'ex, lela' u j taman Ku, máax cu lukesic u keban yóokolcaab.

³⁰ Tu yo'olal leti' t'aanajen le ca tin wa'alaj: Paachil ti' teen cu taal jun túul máac leti' táanil ti' teen, tumen leti' yáax anchaj ma'ili' yanaquene'.

³¹ Tene' ma' in wojel ca'ach máaxi'. Ba'ale' taalaja'anen in dzáa ocja' yéetel ja' u ti'al ca kaj óolta'ac tumen u caajil Israel.

³² Juane' tu ya'alaj xan: Tene' tin wila u je'epajal ca'ane' yéetel u yéemel Quili'ich Pixan bey jun túul palomae' ca j p'áat tu yóokol.

³³ Tene' la'ili ma' in wojel ca'ach máaxi', ba'ale' le máax j túuxten in dzáa ocja' yéetel ja'e' tu ya'alaj teen: Le quéen a wil u yéemel Quili'ich Pixan yéetel u p'atal yóokol jun túul máaque', leti' le máax cu dzáic ocja' yéetel Quili'ich Pixano'.

³⁴ Tene' dzo'oc in wilic, le beetic quin jaajcuntique' leti' u Paal Ku.

U yáax aj canbalo'ob Jesús

³⁵ Tu jeel kiine', Juane' ti' yaan tu ca'a téen te'elo' yéetel ca'a túul u aj tzaypacho'ob.

³⁶ Le ca tu yilaj u máan Jesuse' tu ya'alaj: Ile'ex, leti' u j taman Ku.

³⁷ Le ca'a túul u aj tzaypacho'ob Juano' tu yu'ubajo'ob u ya'alic lela', ca j bino'ob tu paach Jesús.

³⁸ Jesuse' j paacatnaj paachil, le ca tu yilaj táan u tzaypachta'al tumeno'obe', ca tu ya'alaj ti'ob: ¿Ba'ax ca caxtique'ex? Leti'obe' tu ya'alajo'ob ti': Aj ca'anbesaj, ¿tu'ux caja'anech?

³⁹ Jesuse' tu núucaj ti'ob: Co'otene'ex a wile'ex. J bino'ob túune' ca tu yilajo'ob tu'ux caja'an, ca tu máanso'ob u yala' le kiin tu yéetelo', tumen ta'aytac u bin kiin.

⁴⁰ Ti' le ca'a túul tu yu'ubajo'ob Juane', tu tzaypachto'ob Jesús, jun túule' Andrés, u yíidzin Simón Pedro.

⁴¹ Ba'ax tu yáax beetaj Andrese' j bin u caxant Simón u sucu'une' ca tu ya'alaj ti': Dzo'oc nuptáantic le Mesíaso' (u káat u ya'ale' le Cristoo').

⁴² Cu dzo'ocole' Andrese' tu bisaj Simón tac tu'ux yaan Jesús. Le ca j ila'ab tumen Jesuse' ca j a'ala'ab ti': Teche' Simonech, u paal Jonás, ba'ale' yaan a kaaba'intic Cefas (U káat ya'ale' Pedro).

Jesuse' cu t'anic Felipe yéetel Natanael

⁴³ Tu jeel kiine' tu yóoltaj bin Jesús tu lu'umil Galilea, ca tu yilaj Felipee' ca tu ya'alaj ti': Tzaypach teni'.

⁴⁴ Le Felipea' Betsaida u caajal, tu'uxilo'ob xan Andrés yéetel Pedro.

⁴⁵ Felipee' j bin u caxant Natanael ca tu ya'alaj ti': Dzo'oc c ilic le máac tu yo'olal máax dzíibnaj Moisés ti' u dzíiba'an ju'unil le a'almaj t'aano', tu yo'olal máax dzíibnajo'ob xan le aj bóobato'obo'. Leti'e' Jesús, u paal José, ti' u caajil Nazaret.

⁴⁶ Natanaele' tu ya'alaj: ¿Je'el wa u páajtal u jóokol ba'al ma'alob ti' u caajil Nazarete'? Felipee' tu núucaj ti': Co'oten a wile.

⁴⁷ Le ca tu yilaj Jesús táan u nadzcubáa Natanaele' tu ya'alaj: Je'el cu taal jun túul jach Israelita, ti' máax mina'an tuus.

⁴⁸ Natanaele' tu káataj túun ti': ¿Bix a kaj óolilen? Jesuse' tu ya'alaj ti': Ma'ili' u t'anech Felipee' tin wilajech culucbalech ca'ach yaanal jun cúul higo.

⁴⁹ Natanaele' tu ya'alaj túun ti': Aj ca'anbesaj, teech u Paal Ku, teech u Ajawil Israel.

⁵⁰ Jesuse' tu núucaj ti': ¿Ca wocsaj óoltiquen chéen tu yo'olal úuchic in wa'alic teech tin wilajech yáanal jun cúul higo? Bíin a ca'aj a wil ba'alo'ob mas nuuctac ti' lela'.

⁵¹ Jesuse' tu ya'alaj xan: Tu jaajil quin wa'alic ti' te'exe' yaan a wilique'ex je'ekab le ca'ano' yéetel u ángelo'ob Ku táan u na'acalo'ob yéetel táan u yéemelo'ob tu yóokol u Paal Máac.