Joel 1 - Biblia Maya de Yucatán con DC 1992

Le sáako'obo' cu kascuntico'ob le paakalo'obo'.

¹ Le péectzila' Yuumtzil j a'al ti' Joel, u paal Petuel.

² U'uye'ex ma'alob, u nuuquile'ex, yéetel tuláacale'ex u cajnáalile'ex le lu'uma'. ¿A wilmaje'ex wa ti' u láak kiin ba'al beya'? ¿J ila'ab wa ba'al chica'an ti' lela', tu kiinilo'ob a taataex?

³ Tzicbalte'ex ti' a paalale'ex, leti'obe' ca u tzicbalto'ob ti' u paalalo'ob xan, u paalalo'obe' ti' le máaxo'ob ma' síijico'obo'.

⁴ Tuláacal ba'ax j p'áate' jaanta'ab tumen le j sáako'obo': le dze'edzec j p'áato', j taalo'ob u láako'obe' ca tu jaantajo'ob.

⁵ ¡Cala'ane'ex, te'exe' aajene'ex! ¡okolnaque'ex, j ukul vinoex, tumen tac u kab uvae' bíin lukesa'ac ti' te'ex!

⁶ Tumen le j sáako', bey jun p'éel nojoch mu'uka'an aj ba'atelo'obe', yaan u cojo'ob león yéetel u dza'ayo'ob leónae', dzo'oc u chupico'ob in múuch' caajalo'ob.

⁷ Dzo'oc u ch'éejsico'ob c pakal uvaob, dzo'oc u xe'exet'ico'ob c higueraob; dzo'oc u láaj dzíilico'ob, dzo'oc xan u p'atico'ob sac u kabo'ob.

⁸ Bey x dzo'ocol beel x ch'úupale' cu yokol, cu búuquintic u nookil quimen tu yo'olal j quíim le máax dzáa u t'aanil dzo'ocol beel ti'o',

⁹ bey u yokolo'ob le aj kiino'obo' tumen j kulnaje' mina'an janalbe'en neeko'ob mix vino' u ti'al u ti'ibil óolal Yuumtzil.

¹⁰ Le coolo'obo' j ch'éejsa'abo'ob, le lu'umo'obo' ichil okom óol yanilo'ob. Le trigoo' dzo'oc u sa'atal, u x péet pachilo'ob le uvao' dzo'oc u tijil le olivo'ob xano' dzo'oc u quíimilo'ob.

¹¹ Te'ex máaxe'ex ca meyaje'ex te j coolo'obo' yéetel te tu x péet pachil le uvaobo', okolnene'ex yéetel óotzil óolal, tumen j kaschaj le pakalo'obo' bey xan u joochilo'ob trigo yéetel cebadaa.

¹² Dzo'oc u tijil u x péet pachil uvaob dzo'oc xan u kastal le higueraobo'. J tij le granadaobo', le xa'ano'obo' le manzanaobo' yéetel tuláacal u che'ilo'ob káax. ¡Bey xu'ulic u qui'imac óolal tuláacal le máaco'obo'!

¹³ Te'ex aj kiine'ex, u aj meeyjule'ex u multuunil kultaj, búuquinte'ex to'oto'och nooko'ob, okolnene'ex yéetel yaayaj óolal, tumen tu kulnaj u Kue' mina'an janalbe'en neeko'ob mix vino u ti'al ti'ibil óolalo'ob.

¹⁴ T'ane'ex le caajo', ka'ayte'ex su'ukin; much'quinte'ex tu kulnaj Yuumtzil Ku le u nuuquilo'ob yéetel tuláacal u cajnáalilo'ob le caajo'oba', u ti'al ca a payalchi'ite'ex ti' Yuumtzil.

¹⁵ ¡Yaj yanilo'on, táan u náadzal u kiinil Yuumtzil! ¡U kiinil sajbe'entzil, tumen cu taasic xu'ulsajil le máax yaan tuláacal u páajtalile'!

¹⁶ Tu táan c icho'obe' lukesa'ab le janal ti' to'ono', ca j dzo'oc le qui'imac óolal tu kulnaj c Kuo'.

¹⁷ Le i'inajo' j quíim te tu t'o'ol le lu'umo', le trigoo' dzo'oc u kastal le ch'iilo'obo' xano' dzo'oc u je'enelo'ob.

¹⁸ ¡Buca'aj óotzilil u yáacam le wacaxo'! Chéen cunel u caxantico'ob su'uc le x wacaxo'obo'; u múuch'cabil le j tamano'obo' táan u quíimilo'ob.

¹⁹ ¡Ti' teech quin káat óolal Yuumtzil, tumen le káako' dzo'oc u tóoquic u xíiwilo'ob le x tocoy lu'um yéetel u che'ilo'ob le káaxo'!

²⁰ ¡Tac u ba'alche'ilo'ob le káaxo' cu káat óolalo'ob ti' teech, tumen dzo'oc u tijil le t'o'ol ja'obo', le káako' cu tóoquic le su'uco'obo'!