Hageo 1 - Biblia Maya de Yucatán con DC 1992

Cu tzol xiquinta'al ca ca'a líiksa'ac kulnaj

¹ Tu ca'a ja'abil u méektáan Darío, ti' u yáax kiinil ti' u seis winalil, Yuumtzile' tu túuchi'itaj aj bóobat Hageo j t'aan tu yéetel Zorobabel u paal Salatiel u méektáan u lu'umil Judá, tu t'anaj xan Josué u paal Josadac u noojoch aj kiino'ob.

^2-3 Lela' leti' ba'ax cu ya'alic Yuumtzil u yuumil tuláacal páajtalil tu chi' aj bóobat: Le wíinico'oba' cu ya'alico'ob ma' kuchuc u kiinil u yutzquinta'al in kulnaji'.

⁴ ¿U kiinil wa túun a cajtale'ex ti' qui'ichquelem najo'ob, ca'aliquile' in kulnaje' chéen x lab pak?

⁵ Teen Yuumtzil u yuumil tuláacal páajtalil, tene' quin wa'alic ti' te'ex ca a tuculte'ex ma'alob bix a cuxtale'ex.

⁶ Te'exe' ya'ab ba'ax ca pakique'ex, ba'ale', chéen jun p'íit ba'ax ca jochique'ex; ca janale'ex, ba'ale' ma' ta na'ajtale'ex; ca wukule'ex, ba'ale' ma' tu máan a wukajile'ex; ca tep'caba'ex, ba'ale' ma' ta kíintale'ex; le máax cu con meyajo' ti' ba'ax joomol cu dzáic u náajal.

⁷ Teen Yuumtzil, u yuumil tuláacal páajtalil, tene' quin wa'alic ti' te'ex ca a tuculte'ex ma'alob bix a cuxtale'ex.

⁸ Xeene'ex te j pu'uco'obo' ca a taase'ex che' u ti'al a beetique'ex le túumben kulnajo'. Tene' bíin qui'imacchajac in wóoli', bíin in we'es xan in nojbe'enil.

⁹ Te'exe' ya'ab a caxane'ex, ba'ale' chéen jun p'íit ba'al ca nuptáantique'ex; cu dzo'ocole' le ba'axo'ob ca ta'aquique'ex ta wotoche'exo', tene' quin lukesic ti' te'ex yéetel jun p'éel ustajil. ¿Ba'ax o'olal? Tumen in wotoche' najile' chéen x lab pak, ba'ale' te'exe' chéen a najile'ex ca tucultique'ex a beetique'ex. Teen Yuumtzil, teen a'alic.

¹⁰ Le t o'olal ma' tu káaxal ja' ta lu'ume'ex, mix a pakale'ex cu dzáic u yich.

¹¹ Teen máax j taas yáax kiinil tu yóokol a coole'ex yéetel tu yóokol le pu'uco'obo', bey xan tu yóokol trigo, tu yóokol pakal uva, tu yóokol u pakalil higoo, tu yóokol u joochilo'ob coolo'ob, tu yóokol wíinico'ob bey xan tu yóokol ba'alche'ob, bey xan tu yóokol tuláacal meyajo'ob.

¹² Zorobabel, Josué yéetel u yalab le caajo', tu ch'a'ajo'ob sajaquil ca tu yu'ubajo'ob ba'ax cu ya'alic Yuumtzil tu chi' aj bóobat Hageo, tumen lelo' leti' j a'ala'ab ti' tumen Yuumtzil ca u ya'al.

¹³ Hageo u aj túuchi' túun Yuumtzile', j t'aanaj tu kaaba' Kue' ca tu ya'alaj ti'ob: Yuumtzile' cu ya'alic: Teen Yuumtzil, tene' quin wa'alic: tene' ti' yanen ta wéetele'exe'.

^14-15 Beyo' Yuumtzile' tu dzaj tu yóol Zorobabel, u méektáan Judá, bey xan Josué tu dzaj nojochil ti' le aj kiino'ob bey xan ti' yalab le caajo', tu veinticuatro ti' u seis winal ti' u ca'a ja'abil u ajawil Darioe', ca jo'op' u yutzquinta'al u kulnaj Ku, u Yuumtzilil tuláacal páajtalil.