Ezequiel 1 - Biblia Maya de Yucatán con DC 1992

U náayil u jalach káanche' Ku

^1-3 Teen, aj kiin Ezequiel, u paal Buzi, ti' u ja'abil treinta, u can p'éel winalil, cu dzo'ocol cinco ja'abo'ob bisa'ac kalbil táanxel lu'umil ajaw Joaquine', ti' yanen ca'ach tu jáal u áalcab ja'il Quebar, tu lu'umil Babilonia te táanxel lu'um tu'ux bisa'abo'ono', je'epaj le ca'ano' ca tin wilaj Ku ichil jun p'éel náay. Yuumtzile' tu dzaj u kab tin wóokol.

⁴ Ca túun tin wilaj táan u taal j noojole' jun p'éel chac ikal; ti' jun p'éel nojoch múuyale' cu jóokol ca'ach káak bey u jaadz cháaque', tu bakpache' cu jóokol ca'ach táaj sáasjome'enil. Tu dzu' le káako' cu jóopbal ca'ach jun p'éel ba'al bey jun p'éel máascab ma'alob ja'aba'anil u yeje',

⁵ tu dzu' xane' yaan ca'ach can túul aj cuxa'ano'ob beyo'ob wíinico'obe'.

⁶ Tu jujun túulilo'obe' yaan can p'éel u táan yicho'ob yéetel can p'éel u xiiko'ob;

⁷ tojtac u tzeleco'ob yéetel yaan u maayo'ob bey u maayo'ob mejen wacaxo'obe', cu léembalo'ob xan bey bronce ma'alob ja'aba'anile'.

⁸ Tu yáanal u xiiko'ob tu can tzéelilo'obe' yaan u kabo'ob bey u kabo'ob j wíinique'.

⁹ U xiiko'obe' cu nupicuba'ob tu jujun p'éelil, ma' tu suuto'ob tu paacho'ob quéen xíimbalnaco'ob, chéen actáan u xíimbalo'ob.

¹⁰ Bey ca'ach u táan yich le aj cuxa'ano'oba': actáane' bey u yich jun túul j xiibe', tu x no'oje' bey u yich jun túul leóne', tu x dzíique' bey u táan yich jun túul wacaxe', tu paachile' bey u yich jun túul j cóote'.

¹¹ U xiiko'obe' cu tíich'il tac ca'anal. Ca'a p'éel cu meyaj u ti'al u nupicuba'obi' yéetel u láak ca'a p'éele' cu meyaj u ti'al u pixico'ob u wíinclilo'obi'.

¹² Tuláacalo'ob cu xíimbalo'ob actáan, ma'atech u cucul paacho'ob, cu bino'ob tu tojil tu'ux cu bisa'alo'ob tumen u páajtalil Ku.

¹³ Le aj cuxa'ano'obo' beyo'ob chúuco'ob t'aba'antaco'ob, yaan u chica'anil ti' táaj che'ob cu bino'ob yéetel cu ca'a suuto'ob chúumuc ti'obe'; le káako' cu jóopbal ca'ach yéetel cu jóokol u jaadz cháaco'ob ti'.

¹⁴ Le aj cuxa'ano'obo' cu bino'ob yéetel cu ca'a suuto'ob séeba'an bey u jaadz cháaque'.

¹⁵ Tin wilaj le aj cuxa'ano'obo', ca tin wilaj yaan te j lu'um tu tzéel u jujun túulilo'ob yaan ca'ach junjun p'éel petenche'.

¹⁶ Le can p'éel petenche'obo' lajqueet u nuuquilo'ob, bey xan wíinclilo'ob, cu jóopbalo'ob ca'ach bey topacioe'. Cu yila'al óoli' bey yaan jun p'éel petenche' ichil u láak petenche'e'.

¹⁷ Cu páajtal u bino'ob tu tojil u can ti'itzo'obe', ma' kabéet ca u sutuba'ob paachili'.

¹⁸ Tin wilaj yaan u x coplajilo'ob le can p'éel petenche'obo', chuuptaco'ob yéetel ba'alo'ob cu juulo'ob tu súutpacho'ob.

¹⁹ Le quéen náachaco'ob ca'ach le aj cuxa'ano'obo', cu pa'ate' náachtalo'ob xan le petenche'ob tu yéetelo'ob, le quéen líikico'ob tu yóokol le lu'umo' cu líikilo'ob xan le petenche'obo'.

²⁰ Le aj cuxa'ano'obo' cu bino'ob tu tojil tu'ux cu bisa'alo'ob tumen u páajtalil Ku, le petenche'obo' cu líikilo'ob tu yéetelo'ob, tumen le petenche'obo' taacalo'ob yéetel u wíinclilo'ob le aj cuxa'ano'obo'.

²¹ Le quéen péecnac ca'ach le aj cuxa'ano'obo', cu péec xan le petenche'obo', le quéen wa'alaco'obe' cu wa'atalo'ob; le quéen líikico'ob le aj cuxa'ano'ob tu yóokol lu'ume', cu líikilo'ob xan le petenche'ob tu yéetelo'ob, tumen le petenche'obo' jun tacáalil cuxlico'ob tu yéetel le aj cuxa'ano'obo'.

²² Tu yóokol u poolo'obe' cu yila'al jun p'éel ba'al bey nakca'an cu léembal bey néene'.

²³ Tu yáanal le nakca'ano' cu toj xit'ic u xiiko'ob le aj cuxa'ano'obo', ca'a p'éel u xiiko'obe' cu nupicuba'ob, yéetel u láak ca'a p'éele' u xiiko'obe' u ti'al u pixico'ob u wíinclilo'ob.

²⁴ Tin wu'uyaj xan bix u juum u xiiko'ob ca'aliquil táan u náacchtalo'ob: Bey ca'ach u juum u ja'il jun p'éel áalcab ja' táan u túule', Bey u juum u t'aan le aj Páajtalilo', bey u juum ya'abcach aj ba'atelo'obe'. Le quéen wa'alaco'ob ca'ache' cu yéemsico'ob u xiiko'ob.

²⁵ Jóok jun p'éel juum tu yóokol le nakca'an yaan tu yóokol u poolo'obo'.

²⁶ Tu yóokol le nak ca'ano' tin wilaj jun p'éel ba'al bey jalach káanche' je'el bix zafiroe', tu yóokol le ba'al bey jalach káanche'o' yaan máax culucbal bey je'el bix jun túul j xiibe'.

²⁷ Líikbal tu kaxnak tac ca'anale', tin wilaj táan u léembal bey ma'alob ja'aba'an fierro súutpachta'an tumen káake', líikbal tu kaxnak tac caabale' tin wilaj jun p'éel ba'al bey káake'. Tu súutpache' yaan ca'ach jun p'éel léembal

²⁸ bey le chéel cu chíicpajal ich múuyal tu kiinil táan u káaxal ja'e'. Bey úuchic in wilic u nojbe'enil Yuumtzilo'. Le ca tin wilaje' j noclajen j lu'um.