Éxodo 1 - Biblia Maya de Yucatán con DC 1992

U mukyajo'ob le j israelitaob tu lu'umil Egiptoo'

¹ Lelo'oba' leti' u kaaba'ob le j israelitaob j kucho'ob yéetel Jacob tu caajil Egipto, tu jujun túulil yéetel u láaktzilo'ob:

² Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad yéetel Aser.

⁵ Tuláacal u ch'i'ibalo'ob Jacobe', setentaob. Josee', ti' yanili' tu lu'umil Egiptoe'.

⁶ José yéetel u sucu'uno'ob, bey xan tuláacal u yéet kiinilo'obe' j quíimo'ob;

⁷ Ba'ale' le israelitaobo' yanchaj sen ya'ab u paalalo'ob, ca asab ya'abchajo'ob, tac u kuchul u sen mu'uka'antalo'ob. Tuláacal u lu'umil Egiptoe', j chu'up tu yéetelo'ob.

⁸ Cu máan kiine' yanchaj jun túul túumben ajaw Egiptoe', ma' u kaj óoltmaj ca'ach Josei', ca tu ya'alaj ti' u caajal:

⁹ Ile'ex, le israelitaobo' sen ya'abo'ob yéetel asab mu'uka'ano'ob ti' to'one'ex;

¹⁰ let o'olale' unaj c tuclic wa ba'ax u ti'al c wet'ic u bin u ya'abtalo'ob, tumen ma' xan ca kuchuc u kiinil ba'atel, ca u dzáuba'ob tu tzéel c p'eec óole'exi', ca xi'ico'ob ti' le lu'uma'.

¹¹ Let o'olale' le egipciobo' tu dzáajo'ob j mayolo'ob, kubenta'ab ti'ob ca u dza'ob le israelitaob ti' chichich meyajo'ob. J dzaabo'ob u beeto'ob u caajilo'ob Pitón yéetel Ramsés, tu'ux cu ka'alal ba'al jaantbil tumen le faraono'.

¹² Ba'ale' je'el bix u bin u sen loobilta'alo'obe' bey u bin u ya'abtalo'ob. Bey túuno' le j egipciobo' sen sajacchajo'ob ti'ob.

¹³ Le j egipciobo' tu yaayaj palitzilto'ob le j israelitaobo',

¹⁴ káajcunta'ab u cuxtalo'ob iquil u beeta'al u chichich meyajo'ob ti' u bokoltico'ob luuk u ti'al u beetico'ob ladrillos, yéetel u táan óoltico'ob tuláacal u meeyjulo'ob káax. Ti' tuláacal le je'elo' le j israelitaobo' cu ye'edzelo'ob.

¹⁵ Tu yóokol lelo' u ajawil Egiptoe' j t'aanaj yéetel Sifra bey xan yéetel Fuá u x aalansajo'ob le x hebreaobo', ca tu ya'alaj ti'ob:

¹⁶ Le quéen a táanalte'ex le x hebreaob ti' u síijsajo'obe', ile'ex ba'ax le paal cu síijilo'. Wa x ch'úupale' cha'ex u cuxtal, ba'ale' wa j xi'ipale' quíimse'ex.

¹⁷ Chéen ba'ale' le x aalansajo'obo' tu ch'a'ajo'ob sajacquil ti' Ku, ma' tu beetajo'ob le ba'ax a'ala'ab ti'ob tumen u ajawil Egiptoo', tu p'atajo'ob u cuxtal le mejen j xi'ipalalo'obo'.

¹⁸ U ajawil Egipto túune' tu tu'uxtaj t'anbilo'ob ca tu káat chi'itaj x ti'ob: ¿Ba'ax teen ta cha'aje'ex u cuxtal le mejen j xi'ipalalo'obo'?

¹⁹ Ca tu núucaajo'ob leti'ob: Tumen le co'olelo'ob hebreabo', ma' je'el bixo'ob le x egipciobo'. Jela'ano'ob, sen mu'uka'antaco'ob, cu síijsajo'ob ma'ayli' kuchco'on u ti'al c táanalto'obe'.

^20-21 Bey túuno' le j israelitaobo' tu bin u sen ya'abtalo'ob, tuláacal kiine' tu bin u mu'uka'antalo'ob. Tu yo'olal j yanchaj u sajbe'entzil Ku ti' le x aalansajo'obo', j beeta'ab utz ti'ob tumen leti', ca tu ya'abcuntaj u paalalo'ob.

²² Le faraono' tu ya'alaj ti' tuláacal le caajo': Pule'ex ichil áalcab ja' tuláacal le mejen j xibil paalal hebreoil cu síijilo'obo', ba'ale' le mejen x ch'úupalalo' cha'ex u cuxtalo'ob.