Ester 4 - Biblia Maya de Yucatán con DC 1992

U yaj óolal le judíob tu yo'olal le a'almaj t'aano'

¹ Le ca tu yojéeltaj Mardoqueo tuláacal ba'ax dzo'oc u yúuchule' tu jataj u nook u chíiculal sen yaj u yóol, tu búuquintaj to'oto'och nook, ca tu tosaj u ta'anil káak tu pool ca jo'op' u máan ichil le caaj táan u yaayaj awat okol.

² Bey kuchic tac tu jool jalach naj tumen ma' tu cha'abal u yocol mix máac yéetel jun p'éel nook beyo'.

³ Bey xan ti' tuláacal le táabal caajo'ob tu'ux kuch u a'almaj t'aan ajawe', yanchaj nojoch yaj óolal ichil le judíobo', lelo'oba' tu ye'esajo'ob u yóotzil óolalo'ob yéetel su'ukinajo'ob, u ja'il u yicho'ob pa'ate' xan yéetel áacam okol, ya'ab ichilo'obe' chilajo'ob tu yóokol u ta'anil káak, tu búuquintajo'ob xan to'oto'och nooko'ob.

Estere' cu dzáic u yóol u ti'al u t'aan tu yo'olal u yéet cajalo'ob

⁴ Le x palitzilo'ob cu meyajtico'ob x ajaw Ester bey xan le j xiibo'ob canantico', tu tzicbaltajo'ob ti'e' ba'ax ca'ach cu yúuchul. X ajaw túune' seten yaaji u yóol ca tu túuchi'itaj nook ti' Mardoqueo u ti'al u kexic le to'oto'och nook u dzaamaj ca'acho', ba'ale' le ti'e ma' tu yóoltaji'.

⁵ Ester túune' tu t'anaj Hatac, máax ca'ach u náacom u aj canano'ob jalach naj, ca tu ya'alaj ti' ca xi'ic u yil Mardoqueo' ca u káatchi'it ba'ax cu yúuchul, ba'axten xan cu beetic ba'alo'ob beyo'.

⁶ Hataque j bin t'aan tu yéetel Mardoqueo, máax culucbal ca'ach tu kíiwiquil le caajo' actáan ti' u jool nail jalach naj,

⁷ Mardoqueoe' tu láaj a'alaj ti' ba'ax cu yúuchul yéetel le bajun taakin tu ya'alaj u dzáic ca'ach Amán ti' u ayikalil ajawil u ti'al ca xu'ulsa'ac le judíobo'.

⁸ Tu kubaj xan ti'e', jun p'éel u ca'a dzíibil ju'unil le a'almaj t'aan dzíibta'ab Susa tu'ux cu ya'alal unaj u xu'ulsa'al le judíobo', u ti'al ca u dzaa ti' Ester, beyo' je'el u páajtal u yojéeltic tuláacale'. Tu kubentaj xan ti' Ester ca t'aanac yéetel ajaw, u ti'al u káat óolnac tu yo'olal u yéet cajalo'ob.

⁹ Hataque suunaj ca tu tzicbaltaj ti' Ester tuláacal le ba'ax a'ala'ab ti' tumen Mardoqueo'.

¹⁰ Ester túune' ca tu ca'a' túuxtaj Hatac yéetel le núuct'aana', u ti'al Mardoqueo:

¹¹ Tuláacal le máaxo'ob meyajtic ajaw, yéetel u caajnáalilo'ob le táabal caajo'ob yano'ob tu yáanal u méektáan u ajawile', u yojelo'ob yaan jun p'éel a'almaj t'aan cu bisic ti' quíimil tuláacal j xiib wa co'olel cu yocol ichil u táancabil jalach naj u ti'al u yil ajaw, wa ma' túuxta'ac t'aanbil tumen ajaw, ba'ale' wa ajaw cu tuuch'ubtic le máac yéetel u xóolte' beeta'an yéetel oroe', lela' u chíiculal táan u ch'a'ic óotzilil ti' u yéetel cu sa'atsic u cuxtal. Wa tin wo'olale', dzo'oc u máan treinta kiino'ob ma' u t'aanen ajaw u ti'al ca xi'iquen tu táani'.

¹² Le ca tu kamaj Mardoqueo u núuct'aan Estere',

¹³ tu túuchi'itaj xan le t'aana': Teche' ma' a tuucultic wa tu yo'olal ti' yanach tu jalach naj ajawe', chéen teech le judía bíin u toc u cuxtale'.

¹⁴ Wa bajela'a' ca maquic chi'e yéetel ma' ta wa'alic mix ba'ale', u jáalkabil le judíobo' yaan u taal táanxelil, ba'ale' teech yéetel u yotochnáalo'ob a taatae' yaan u quíimilo'ob. ¡Bix wa teche' kuchech a beetabaj a x ajawil u ti'al ca a wáanto'on ti' le bix yanilo'ona'!

¹⁵ Ester túune' tu túuxtaj le núuct'aan ti' Mardoqueo beya':

¹⁶ Xeene' ca a much'quint tuláacal le judíob yano'ob Susao', u ti'al ca su'ukinaco'ob tin wo'olal. Ma' u jaantico'ob mix u yukico'ob mix ba'al ichil óox p'éel kiin yéetel óox p'éel áakab. In x palitzilo'ob pa'ate' tin wéetele' láili' bey bin c beeto', cu dzo'ocole' quin bin in wil ajaw, quex ma' bey u najmali'. Ba'ale' wa quin quíimsa'ale' ca quíimsa'aquen.

¹⁷ Merdoqueo túune' j bine' ca tu dzo'ocbesaj tuláacal ba'ax tu ya'alaj Ester ca u beeto'.