Efesios 1 - Biblia Maya de Yucatán con DC 1992

Pabloe' cu dzíib ti' u iglesiail Éfeso

¹ Teen Pabloe', u apóstol Jesucristo, tumen bey tu yóoltil Kue', ti' le máaxo'ob u ti'alo'ob Kuo' yéetel tu yocsaj óoltico'ob Cristo Jesús, máaxo'ob yano'ob tu caajil Éfeso.

² Kame'ex u siibal utzil yéetel u jéedzel óolal Ku c Taata yéetel Yuumtzil Jesucristo.

Ca'anil qui'iqui' t'aano'ob cu taalo'ob tu yo'olal Cristo

³ Co'ox qui'iqui' t'antic Ku yéetel u taata c Yuumtzil Jesucristo, tumen tu yo'olal nupa'ano'on ti' Cristoe' leti'e' dzo'oc u qui'iqui' t'antico'on yéetel tuláacal u jejeláasil pixanbe'en qui'iqui' t'aano'ob ti' ca'anil cúuchilo'ob.

⁴ Kue' tu yéeyajo'on ti' Cristo ma'ili' beeta'ac u yóokolcaabe', u ti'al ca yanaco'on tu táan yéetel kub óolal bey xan yéetel x ma' si'ipilil.

⁵ Tu yo'olal u yaacunaje' tu dzajo'on u ti'al lela', ma'ili' yanaco'one', u ti'al ca ka'amaco'on je'el bix u paalalo'obe' tu yo'olal Jesucristo je'el bix tu yóoltaj u beete'.

⁶ Le o'olale' mantadz táan c qui'iqui' t'antic Ku tu yo'olal u nojbe'en utzil, yéetel le u yutzila' tu qui'iqui' t'antajo'on le ca j nu'upo'on yéetel u yaabilaj u paale'.

⁷ Tu yo'olal u nojoch siibal utzile', Kue' dzo'oc u toquico'on tu yo'olal u ki'ikel u paal, iquil tu sa'atsajil c kebano'ob.

⁸ Kue' jach ya'ab u siibal utzil tu ye'esaj to'on, tumen tu dzaj to'on tuláacal kaj óolalil yéetel na'atil,

⁹ Yéetel dzo'oc u beetic c kaj óoltic u ta'acbil dzíibolala', u káat u ya'ale', le ba'ax u tucultmaj u dzo'ocbesic leti'o'.

¹⁰ Ti' le ba'ax tuculta'an cun úuchula', yéetel yaan u yúuchul le quéen kuchuc u kiinile', Kue' yaan u nupic yáanal u páajtalil Cristoe' tuláacal ba'al, le yano'ob ca'ano' bey xan le yano'ob lu'umo'.

¹¹ Tu yo'olal nupa'anilo'on ti' Cristoe' Kue' tu yéeyajo'on ma'ili' yanaco'one' u ti'al c kamic le jaatz c ti'alintico' ti' le ba'ax cun u dzáa leti'o'; tuláacal lela' ma'alob yanil yéetel ba'ax u tucultmaj Ku, máax cu beetic tuláacal ba'ax je'el bix cu tucultic ma'alobe'.

¹² Tu beetaj beyo', u ti'al ca cuxlaco'on to'on máaxo'on yáax ocsaj óolt Cristo, nu'upe'ex ti' leti'o' u ti'al ca qui'iqui' t'anta'ac Ku tu yo'olal u nojbe'enil.

¹³ Bey xan te'ex, le ca ta wu'uye'ex ma'alob u péectzilil le jaajilo', yéetel ca ta wocsaj óolte'ex Cristoe', j nu'upe'ex ti' leti' bey xan sellarta'abe'ex yéetel le quili'ich Pixan u ya'almaj u dzáico'.

¹⁴ Le Quili'ich Pixano' u chíiculal yaan c kamic le ayikalil bíin u dzáa to'on Kuo' le quéen chúucpajac u toquic le máaxo'ob u ti'alo', u ti'al ca qui'iqui' t'anta'ac leti' tu yo'olal u nojbe'enil.

Pabloe' cu káatic ti' Ku ca u dzáa u na'at le ocsaj óolo'obo'

¹⁵ Le o'olal tene', le ca tin wojéeltaj le ocsaj óolal yaan te'ex ti' Yuumtzil Jesuso', yéetel le yaacunaj yaan te'ex u ti'al tuláacal le máaxo'ob u ti'alo'ob Kuo',

¹⁶ ma' tu jáawal in dzáic nib óolal ta wo'olale'ex le quéen in ka'ajse'ex ichil in payalchi'ob.

¹⁷ Quin káatic ti' u Ku c Yuumtzil Jesucristo, ti' le nojbe'en taatao', ca u dzáa te'ex u pixanil na'at yéetel chíicbesajil u ti'al ca a kaj óolte'ex mas ma'alob.

¹⁸ Quin káatic ca sáasilcunta'ac a tuucule'ex tumen Ku, u ti'al ca a wojéelte'ex u ti'al máacalmáac alab óolalil tu t'anajile'exo', bey xan buca'aj u nojbe'enil yéetel u ayikalil le siibal cu dzáic Ku ti' le máaxo'ob u ti'alo'obo',

¹⁹ yéetel buca'aj u nojochil yéetel kina'amil u p'iisil u páajtalil, le cu meyaj ti' to'on le máaxo'ob dzo'oc c ocsaj óoltico'. Le páajtalila' leti' le tu ye'esaj Ku yéetel nojoch muuk

²⁰ le ca tu ca'a púut cuxquintaj Cristo ti' le quíimilo', ca tu beetaj u cutal tu x no'oj kab j ca'ano'.

²¹ Ca tu dzaj tu yóokol páajtalilo'ob, jalachilo'ob, muukilo'ob yéetel yuumtzililo'ob yano'ob te j ca'ano', yéetel yóokol tuláacal kaaba' cu páajtal u ya'ala'al ma' chéen ti' le kiino'oba' ba'ale' tac ti' le kiino'ob bíin taalaco'.

²² Tu dzaj tuláacal ba'al yáanal u yooc Cristo, yéetel Cristoe' j dzaab ti' le iglesiao' je'el bix u pool tuláacal ba'ale'.

²³ Tumen le iglesiao' u wíinclil Cristo, leti' u túulisil Cristo. Cristo xane' cu láaj chupic tuláacal ba'al.