Eclesiastés 1 - Biblia Maya de Yucatán con DC 1992

Tuláacal ba'al chéen cunel waya'as

^1-2 lelo'oba' u cóomcom tze'equil u ca'anbesajo'ob Salomón u paal David, máax ajawnaj tu caajil Jerusalén. ¡Cunel waya'as, cunel waya'as! ¡Tuláacal cunel waya'as!

³ ¿Ba'ax utzil cu kamic wíinic iquil u sen meyaj way yóokolcaabe'?

⁴ Dze'edze'eque' cu síijilo'ob, dze'edzeque' cu quíimilo'ob ba'ale' le lu'uma' ma'atech u kexpajal.

⁵ Cu tíip'il kiin, cu t'úubul kiin, séeb u suut tu cúuchil u ti'al u ca'a tíip'il.

⁶ U tojil j noojol cu yustaj iik, cu dzo'ocole' cu suticubáa tu tojil j xaman. ¡Cu sutulsut le iiko'! ¡cu suut, cu suut tu ca'a téen!

⁷ Tuláacal áalcab ja'obe' cu bino'ob ka'anab, ba'ale' ka'anabe' ma'atech u tuul; áalcab ja'obe' cu suuto'ob tu'ux luko'ob u ti'al u xíimbaltic láili' le bejo'.

⁸ Mina'an mix máac cu páajtal ya'alic buca'aj náacsaj óolal yaan ti' tuláacal ba'al; Mix máac cu yu'ubaj ya'ab wa cu yilaj ya'ab u ti'al ca p'áatac jach utz tu yóol.

⁹ Mix ba'al bíin anac wa ma' yanac ca'achi'; mix ba'al bíin beeta'ac wa ma' beeta'an ca'achi' ¡Mix ba'al túumben way yóokolcaabe'!

¹⁰ Ma' bíin p'áatac u yantal máax a'alic: ¡Le ba'ala' jach yáax u beeta'al! Tu jaajile' lelo' jach úuch beeta'ac, beeta'ab ma'ili' síijico'oni'.

¹¹ Le úuchben ba'alo'obo' dzo'oc u láaj tu'ubsa'alo'ob, bíin láaj tu'ubsa'aco'ob, xan tumen le bíin talaco'obo'.

Ba'axo'ob u túuntaj tu cuxtal aj tze'ec

¹² Teen, aj tze'eco', ajawnajen ca'ach Israel tu caajil Jerusalén,

¹³ ca tin jach kubajimbáa in xakalt caxant yéetel in canic u nu'uctajil tuláacal ba'ax cu yúuchul way yóokolcaabe'. ¡sen nojoch meyaj tu p'ataj Ku ti' wíinico'ob u ti'al u paj u subtal yéetelo'ob!

¹⁴ Ca tin wilaje' tuláacal ba'ax cu beeta'al way lu'ume' cunel waya'as, bey ca a wóolt a lap' iike'.

¹⁵ ¡Ma' tu páajtal u tojquinta'al ba'ax keechel, mix tu páajtal u xo'ocol jay p'éel ba'alo'ob yaan ti' ba'axo'ob ma' dzaca'ani'!

^16-17 Ca tin wa'alaj tin báil: Je'elena', nojoch ba'alen, u asab aj ojéelaj ti' tuláacal le ajawnajo'ob Jerusalén táanil ti' teen; tin jach kubajinbáa chéen u ti'al in ti'altic ojéelajil yéetel kaj óolaj, bey xan le ba'ax mix ba'al u biilal yéetel j ma' ojéelajil, chéen u ti'al ca kuchuquen in na'at bey xan lela', bey ca wíinic u lap' le iiko'.

¹⁸ Jach tu jaajile' wa nojoch ojéelaje', nucuch xan chi'ibal poolil; wa ya'ab ba'ax a wojele', ya'ab xan u mukyajil.