Deuteronomio 1 - Biblia Maya de Yucatán con DC 1992

U chúunpajal u dzíibil u ca'a a'almaj t'aan

¹ Le t'aano'ob beya' Moisés a'al ti' tuláacal Israel ca'aliquil ti' yano'ob ti' le x tocoy lu'um tu lakin Jordano', tu lu'umil Arabá, actáan ti' Suf yéetel tu'ux yano'ob Parán, Tofel, Labán, Hazerot yéetel Dizahab.

² Líikbal tu witzil Horeb tac cades-barneae' yaan once kiino'ob u xíimbalil tu bejil Seir.

^3-4 Tu yáax kiin ti' u once winal tu cuarenta ja'ab, cu dzo'ocol u dzáanche'eta'al tumen Moisés Seón u ajawil le amorreob cajnáal ca'ach Hesbón, bey xan Og, u ajawil Basán, cajnáal ca'ach Astarot, tu tojil tu'ux yaan Edrei, Moisese' tu ya'alaj ti' le j israelitaob tuláacal le ba'axo'ob tu túuchi'itaj Yuumtzil ca dzo'ocbesa'aco'obo'.

⁵ Ca'aliquil ti' yano'ob tu lakin u áalcab ja'il Jordán tu lu'umil Moab, Moisese' tu cáajsaj u ya'alic le tzol xiquino'oba':

⁶ Yuumtzil c Kue' bey tu ya'alaj to'on Horeba': Te'exe' dzo'oc u xáantal yanaque'ex te j witza'.

⁷ Mole'ex a nu'ucule'exe' ca xi'ique'ex tu ca'anal witzilo'ob le amorreob ti' tuláacal le cúuchilo'ob yano'ob tu tzéelo'obo': Arabá le cúuchil sen ya'ab u witzilo'ob, le táax lu'um, Néguev, u jáal ka'anab, u lu'umil le cananeob yéetel Líbano, tac tu nojoch áalcab ja'il Éufrates.

⁸ Tene' dzo'oc in kubic ti' te'ex le lu'umo'; xeene'ex a ti'alinte'ex, tumen teen Yuumtzile' tin séeb chi'itaj in dzáic ti' a máanja'an ch'i'ibale'ex, lelo' ti' Abraham, Isaac yéetel Jacob, bey xan ti' u ch'i'ilancabilo'ob.

Bix dzabic aj p'is óolo'ob

⁹ Ti' leti'e' kiine' tin wa'alaj ti' te'ex: Tin juunale' ma' bíin páatchajquen ta wéetele'exi'.

¹⁰ Sen ya'ab paalal dzo'oc u dzáic te'ex Yuumtzil a Kuex, bejela'e' te'exe' jun p'éel nojoch caaj sen ya'abe'ex bey u ya'abil u eekilo'ob j ca'ane'.

¹¹ ¡U Yuumtzil Ku a taataexe' u ya'abcunte'ex mil u téenal ti' le ya'abile'ex bejela'a', yéetel ca u qui' t'ante'ex je'el bix tu séeb chi'itilaco'!

¹² Tin juunale' ma' bíin páatchajac in muuk cuchic tuláacal a tacpole'ex yéetel a ba'atelexi'.

¹³ Le t o'olale' yéeye'ex ichil tu jujun p'éelil u múuch' cajtalil a wotochnáalexo'obe' j na'atja'ano'ob, canbalnaja'ano'ob dzo'oc xan u yiijtalo'ob u ti'al ca in dza'ob u ti'al u beeto'ob u nojchilo'ob ichile'ex.

¹⁴ Te'exe' ta núucaje'ex teen: c tucultique' ma'alob le ba'ax ca wa'alic to'ona'.

¹⁵ Teen túune' tin ch'a'aj tu jujun p'éelil u múuch' cajtalil a wotochnáale'exo'obe' le j xiibo'ob asab aj na'ato'obo' dzo'oc u yiijtalo'ob, ca tin dzaj páajtalil ti'ob ta wóokole'ex; jun jaatze' tin dzaj tu yóokolo'ob mil máaco'ob, u láako'obe' tu yóokol cien, u láako'obe' tu yóokol cincuenta, u láako'obe' tu yóokol diez, u láak jun jaatze' tin dzaj tu yóokol u jujun p'éelil u múuch' cajtalil le j otochnáalo'obo'.

¹⁶ Le jeedzaco' tin dzaj ti' le aj toj p'is óolo'ob le tzol xiquino'oba': Táan óolte'ex tuláacalo'ob, beete'ex xan ti'ob ba'ax tu beel, je'el bix yéetel a wéet caajale'exe' bey xan yéetel le j táanxel lu'umilo'obo';

¹⁷ le quéen xot kiinaque'exe', ma' a dzáicaba'ex tu tzéel mix máac: táan óolte'ex le óotzilo'obo' bey xan le ayikalo'obo', ma' a ch'a'ique'ex sajaquil ti' mix máac, tumen le xot kiino' u ti'al Ku. Wa ca wilique'ex yaan ba'al talame' taase'ex ti' teen in wu'uyej.

¹⁸ Ti' le jeedzaco' tin sen tzolaj te'ex ba'ax unaj a beetique'ex.

Cu túuchi'ita'al doce xakalo'ob

¹⁹ Le ca jóoko'on Horebe', j bino'on tu tojil u witzilo'ob le amorreob u ti'al c u'uyaj t'antic u tzolbe'en t'aano'ob Yuumtzil c Ku. T xíinbaltaj tuláacal le nojoch sajbe'entzil x tocoy lu'um ta wilaje'exo' tac kuchico'on Cades-barnea.

²⁰ Te'elo' tin wa'alaj te'ex: Dzo'oc kuchule'ex tu pu'uco'ob le amorreob, cu dza'abal to'on tumen Yuumtzil c Kuo'.

²¹ Yuumtzil a Kuexe' cu kubic te'ex le lu'uma'. Ooquene'ex, cajlaque'ex ichil je'el bix tu ya'alajilac Yuumtzil, u Ku a taataex. Ma' a ch'a'ique'ex sajaquil mix u lúubul a wóole'ex.

²² Ba'ale' te'exe' j taale'ex a wa'ale'ex teen Asab ma'alob ca xi'ic wa jay túul ti' to'one' u xakalto'ob le lu'umo', ca suunaco'ob u ya'alo'ob to'on ba'ax bejil unaj c bisic yéetel ba'ax ti' caajil unaj u páajtal c ocol.

²³ Le tuucul ta dzáajexo' tin wilaj ma'alob, ca túun tin yéeyaj doce ichile'ex jujun túul ti' tu jujun p'éelil le u múuch' cajtalil le a wotochnáalexo'obo',

²⁴ ca j bino'ob tu tojil le witzo'obo' ca j kucho'ob tu táax kóomil Escol, ca tu láaj bojlajo'ob le cúuchilo'.

²⁵ Cu dzo'ocole' tu ch'a'ajo'ob u yich le lu'umo' ca tu taasajo'ob to'on, yéetel le péectzila': Le lu'um cu dzáic to'on c Kuo' sen ma'alob.

²⁶ Ba'ale' te'exe' ma' ta wóoltaje'ex j bini', ta j ma' u'uyaj t'ante'ex u túuchi' t'aan Yuumtzil c Ku tu dzaj te'ex ca'acho',

²⁷ ichil a wotoche'exe' jo'op' a x mucul t'aane'ex iquil a wa'alique'ex: Yuumtzile' ma' u yaabiltmajo'oni'; tu jóokeso'on Egipto chéen u ti'al u kubico'on tu kab le amorreob u ti'al u xu'ulsico'on.

²⁸ Bejela'a' túune' ¿tu'ux bíin xi'ico'on? c éet caajalo'obe' cu ya'alico'ob to'on, te'elo' yaan máaco'ob asab mu'uka'an bey xan asab ca'analo'ob ti' to'on, yaan xan u nucuch caajilo'obe' bakpachta'ano'ob yéetel ca'anal pako'ob, cu dzo'ocole' tu yilajo'ob xan u ch'i'ibal j wa'apáach' Anac. Tuláacal lelo' dzo'oc u sen lúubsic c óol.

²⁹ Teen túune' tin núucaj te'ex: Ma' u ja'akal a wóole'ex. Ma' a ch'a'ique'ex sajaquil ti'ob.

³⁰ Yuumtzil a Kuexe' cu bin táanil ti' te'ex u ti'al j ba'atel ta wo'olale'ex je'el bix ta wilaje'ex tu beetaj Egiptoo'

³¹ yéetel ti' le x tocoy lu'umo'. Yuumtzil a Kuexe' tu méekaje'ex u ti'al u taasique'ex ti' tuláacal le bej ta xíimbalte'ex tac kuchique'ex wayo', bey je'el bix jun túul taata cu méekic u paale'.

³² Chéen ba'ale' te'exe' ma' wocsa óolte'ex ti' Yuumtzil a Kuex,

³³ cu bin táanil ti' te'ex u ti'al u yéey le cúuchil tu'ux a je'elele'exo'. Yéetel áakabe' cu ye'esic yéetel káak a beele'ex, yéetel kiine' cu ye'esic yéetel jun p'éel múuyal.

Yuumtzile' cu p'u'ujul tu yo'olal le j israelitaobo'

³⁴ Le ca tu yu'ubaj Yuumtzil a x mucul t'aane'exe' sen p'u'uj ca tu ya'alaj le jalach t'aana':

³⁵ Mix jun túul ti' le kaakas máaco'oba', bíin u yila'a' le lu'um tin séeb chi'itaj in dzáic ti' a máanja'an ch'i'ibale'exo'.

³⁶ Ma' bey Caleb, u paal Jefonee', leti'e' bíin u yilej, bíin xan in dzáa ti' leti' yéetel ti' u ch'i'ilancab le lu'um tu'ux bíin pe'echaknaque', tumen tu táan óoltaj Yuumtzil yéetel chuca'an óolal.

³⁷ Ta wo'olale'exe', Yuumtzile' j kuuxilnaj tin wéetel ca tu ya'alaj teen: mix teech bíin ocoquech ti' le lu'umo'.

³⁸ Josué u paal Nune' bíin ococ leti' bíin u jeelint teech. Líikes u yóol tumen leti' bíin kubic le lu'umo'ob ti' Israel.

³⁹ Quex tumen te'ex ta tucultaje'ex je'el ca'ach u jáanpayta'al a watane'ex yéetel a paalale'ex tumen le aj p'eeco', le mejen paalal ma' yanac u na'ato'obo', leti'ob bíin ococo'ob te j lu'umo'; bíin in dzáa u ti'alinto'ob.

⁴⁰ Te'exe', ¡suunene'ex te x tocoy lu'umo'! ¡Xeene'ex tu ca'a téen te j chac ka'anabo'!

Ba'ax o'olal dzáanche'eta'ab le j israelitaobo'

⁴¹ Te'ex túune' ta núucaje'ex teen: Dzo'oc c kebantal ti' Yuumtzil, ba'ale' tu séeblaquil bíin xi'ico'on j ba'atel je'el bix tu ya'alajilac to'on Yuumtzilo'. Ta ch'a'aje'ex a máascabe'exe', tumen ta tuculte'ex chéen ch'a'abil u na'acal máac te j witzo'.

⁴² Ba'ale' Yuumtzile' tu ya'alaj teen ca'a in dzáa te'ex le ka'asaj iika': Ma' a bine'ex ba'atel; ma' a dzáicaba'ex tu beel a aj p'eeque'exo'ob u ti'al ca dzáanche'ete'ex, tumen tene' mina'anen ta tzéele'ex.

⁴³ Tene' tin ka'asaj a wiike'ex, ba'ale' te'exe' ma' ta táan óoltene'exi', ma' ta wóotaje'ex a wu'uye'ex ba'ax tu ya'alaj Yuumtzili', yéetel ca'anal ichil j na'aque'ex te j witzo'obo'.

⁴⁴ Le amorreob túun j cajnáalo'ob te j witzo'obo', jóoko'ob u nactáante'ex bey u nactáanta'al máac tumen xuuxe', ca j áalcabansa'abe'ex, ca j dzáanche'eta'abe'ex líikbal Seire' tac u kuchbal Horma.

⁴⁵ Le ca j suunaje'exe', okolnaje'ex tu táan Yuumtzil, ba'ale' leti'e' ma' tu táan óoltaj a yaj óole'exi'.

⁴⁶ Le t o'olal j p'áate'ex cajtal ya'ab kiino'ob tu lu'umilo'ob Cades.