Cantares 1 - Biblia Maya de Yucatán con DC 1992

¹ U asab jadzutz kaayo'ob Salomón.

Yáax kaay Atantzil

² ¡dzu'udzen yéetel u bóoxel a chi'! tumen a yaacunaje' asab ch'ujuc ti' vinoo,

³ ch'ujuc in wu'uyic a booc, a kaaba'e' bey wecbil qui'iboc ja'e'. ¡Le t o'olal yaabilta'anech tumen co'olelo'ob!

⁴ ¡Bisen ta wéetel tu séeblaquil! ¡In ajaw, bisen tu káasabilo'ob a wotoch! Ta wéetel bíin jach qui'imacchajac c óol; bíin j ka'ajse a yaacunaj, asab ti' vino. ¡Le t o'olal bacáan le co'olelo'obo' u yaabiltmajecho'ob!

Aj kaayo'ob Atantzil

⁵ U co'olelile'ex Jerusalén, booxen, ba'ale' qui'ichpamen; booxen je'el bix u chuybil najilo'ob Cedar, qui'ichpamen je'el bix u káasab nook Salomone'.

⁶ Ma' a wilique'ex wa booxen, mix a wilique'ex wa tóoca'an in woot'el tumen kiin. In láako'obe' kuuxilnajo'ob tin wéetel ca tu dzajeno'ob in canant u x péet pachil uva, ¡u x péet pachil in uvae' ma' tin canantaji'!

⁷ A'alten, u yaacunaj in cuxtal, ¿Tu'ux ca tzéentic a j tamano'ob? ¿tu'ux ca bisico'ob je'elel chúumuc kiin? ¿Ba'axten bíin máanaquen bey jun túul x ma' beel pa'ate' yéetel u j tamano'ob a wéet meyajo'ob?

Aj kaayo'ob

⁸ Qui'ichpam ichil le qui'ichpamo'ob, wa teech ma' a wojel tu'uxe', xeen tu'ux ca wilic cu pe'echak le j tamano'obo', tzéent a j mejen yuuco'ob naadz ti' le paselo'ob tu'ux cu je'elel le j canan tamano'obo'.

Íichamtzil

⁹ In aj yaabilaj, in ti'al tene', teche' qui'ichpamech bey le x ch'upul tzíimino'ob cu jíiltico'ob u bolan faraón.

¹⁰ ¡Buca'aj jadzutzil a pu'uc yáanal a tuupo'ob! ¡Buca'aj jadzutzil yanil a caal chúumuc le x léechcal beeta'an yéetel ya'ax tuun!

¹¹ ¡Bíin c beet a ti'al tuupo'ob oro u ca'ajo'ob, baxa'an plata ti'ob!

Atantzil

¹² Ca'aliquil culucbal jun tzéel ti' u mayacche'e', in nardoe' cu kitic u qui'iboquil.

¹³ In ti'al tene', in aj yaabilaje', bey jun p'éel u chan to'il mirra ch'uyucbal mantadz chúumuc ti' in wiimo'obe'.

¹⁴ In ti'al tene', in aj yaabilaje' bey jun p'éel u nicte'il alheña ichil u x péet pach uva tu lu'umil En-gadi.

Íichamtzil

¹⁵ ¡In x yaabilaj jach qui'ichpamech, jach tu jaajil, jach qui'ichpamech! ¡A wicho'obe' bey ca'a túul sacapacalo'obe'!

Atantzil

¹⁶ ¡In aj yaabilaj qui'ichquelmech, tu jaajil jach qui'ichquelmech! ¡C kaane' bey ya'ax su'uque'!

Íichamtzil

¹⁷ Le kulche'o' u jool najilo'ob c otoch, le cipreso'obo' u yóokol c otoch cu pixico'on.